ନୂଆପଡ଼ା,୨୨ା୮ (ମକାରୁ ବେମାଲ): ନୂଆପଡ଼ା ଜିଲାରେ ୟୁରିଆ ସାରର କୃତ୍ରିମ ଅଭାବ ଦେଖାଦେଇଛି। ଡିଲରମାନେ ମନଇଚ୍ଛା ଦରରେ ସାର ବିକ୍ରୟ କରୁଛନ୍ତି। ଏହା ପ୍ରତିବାଦରେ ଶୁକ୍ରବାର ଜିଲା କଂଗ୍ରେସ କମିଟି ଜିଲାପାଳଙ୍କ ଦ୍ୱାରସ୍ଥ ହୋଇଛ। କମିଟିର ଜିଲା ସଂଯୋଜକ ଘାସିରାମ ମାଝିଙ୍କ ନେତୃତ୍ୱରେ ଦଳୀୟ କର୍ମକର୍ତ୍ତା ଅତିରିକ୍ତ ଜିଲାପାଳ ସୁବାସ ଚନ୍ଦ୍ର ରଏତଙ୍କୁ ଦାବିପତ୍ର ପ୍ରଦାନ କରି ଦୁଇ ଦିନ ଭିତରେ ୟୁରିଆ ସାର ଯୋଗାଇ ନ ଦେଲେ ଆସନ୍ତା ୨୫ରୁ ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛନ୍ତି। ଜିଲାର ୮୦ ପ୍ରତିଶତ ଲୋକ ଚାଷ ଉପରେ ନିର୍ଭର କରିଥାନ୍ତି ା ଧାନ ସହ ମାଣ୍ଡିଆ, ଗୁର୍ଜି, କୋଦୋ ଡାଲିଜାତୀୟ ଅର୍ଥକରୀ ଫସଲ କରିଥାନ୍ତି। ସ୍ବଳ୍ପ ବୃଷ୍ଟିପାତ ଯୋଗୁ ରୁଆ ବେଉଷଣ ହୋଇପାରି ନ ଥିଲା। ବର୍ତ୍ତମାନ ଲଘୁଚାପ ଜନିତ ବର୍ଷା ହେବାରୁ ଚାଷୀମାନେ ରୁଆ ବେଉଷଣ କାମ ଆରମ୍ଭ କରିଛନ୍ତି। ଏପରି ସମୟରେ ଜିଲାରେ ରାସାୟନିକ ସାରର କୃତ୍ରିମ ଅଭାବ ଦେଖାଦେଇଥିବାରୁ ଚାଷୀମାନେ ଡିଲରଙ୍କଠାରୁ ଚଢା ଦରରେ ସାର କିଣୁଡଛନ୍ତି। ସରକାରୀ ମୂଲ୍ୟ ୟୁରିଆ ସାର ୨୬୬ ଟଙ୍କା ୫୦ ପଇସା ଥିବାବେଳେ ୮ ଶହରୁ ଏକ ହଜାର ଟଙ୍କାରେ ବିକ୍ରୟ ହେଉଛି। ଡିଏପି ସାର ୧୮୪୬ର ମୂଲ୍ୟ ୧୩୫୦ ଟଙ୍କା, ୧୬୧୬ର ମୂଲ୍ୟ ୧୬ ଶହ ଓ ୨୦୨୦ର ମୂଲ୍ୟ ୧୪୫୦ ଟଙ୍କା ରହିଥିବା ବେଳେ ଡିଲରମାନେ ୨ ହଜାରରୁ ଊର୍ଦ୍ଧ୍ୱ ଟଙ୍କାରେ ବିକ୍ରୟ କରୁଥିବା କର୍ମକର୍ତ୍ତା ଦର୍ଶାଇଛନ୍ତି। ଏହାର ସମାଧାନ ନ ହେଲେ ଜିଲା କଂଗ୍ରେସ କିଷାନ ସେଲ ପକ୍ଷରୁ ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛ। ଏହି ସମୟରେ କଂଗ୍ରେସ ଜିଲା ସଂଯୋଜକ ମାଝି ସମେତ ଯୁବ କଂଗ୍ରେସ ଜିଲା ସଭାପତି ଅମିତ କୁମାର ଅହିର, ହରି ମାଝି, ଆଶିଫ ଖାନ, ଇଶାଫ ଖାନ, ସୁଶାନ୍ତ ସାହୁ, ସିଦମ ସାହୁ ପ୍ରମୁଖ ଉପସ୍ଥିତ ଥିଲେ।
