କୁଜଙ୍ଗ,୨୯।୨ (ମନୋଜ ପ୍ରଧାନ)ମାଟିରେ ମିଳାଉ ନ ଥିବା ପ୍ଲାଷ୍ଟିକ, ଧୂଳି, ଧୂଆଁ ଓ ଶିଳ୍ପ ସଂସ୍ଥାରୁ ନିର୍ଗତ ବର୍ଜ୍ୟ ଯୋଗୁ ବାୟୁମଣ୍ଡଳ ଦିନକୁ ଦିନ ପ୍ରଦୂଷିତ ହେବାରେ ଲାଗିଛି। ଏହାଦ୍ୱାରା ମଣିଷ ସ୍ବଚ୍ଛ ପବନରେ ନିଃଶ୍ୱାସ ପ୍ରଶ୍ୱାସ ନେଇପାରୁନାହିଁ। ଫଳରେ ଲୋକେ ବିଭିନ୍ନ ଦୁରାରୋଗରେ ଆକ୍ରାନ୍ତ ହେଉଛନ୍ତି। ଏହି ପରିବେଶକୁ ପ୍ରଦୂଷଣମୁକ୍ତ ରଖିବାପାଇଁ କୁଜଙ୍ଗ ବ୍ଲକ ଅନ୍ତର୍ଗତ ଗଣ୍ଡକିପୁର ଗ୍ରାମର ଯୁବକ ପ୍ରଶାନ୍ତ ମାଝି ଉଦ୍ୟମ କରି ଚାଲିଛନ୍ତି ା ସେ ପେସାରେ ଜଣେ ଶ୍ରମିକ ହୋଇଥିଲେ ବି ସେଥିରୁ ପ୍ରତ୍ୟହ କିଛି ସମୟ କାଢି ମନ୍ଦିର, ବିଦ୍ୟାଳୟ, ନଦୀକୂଳ ଓ ସର୍ବସାଧାରଣ ସ୍ଥାନରୁ ପ୍ଲାଷ୍ଟିକ ଗୋଟାଇ ଏକତ୍ରିତ କରନ୍ତି। ଏତଦ୍ବ୍ୟତୀତ ଖୋଲାସ୍ଥାନ ଓ ନଦୀବନ୍ଧମାନଙ୍କରେ ନିଜର ସ୍ବଳ୍ପ ମଜୁରିରୁ କିଛି ଖର୍ଚ୍ଚକରି ଚାରାରୋପଣ କରନ୍ତି। ଅନ୍ୟପଟେ ମନ୍ଦିର ଯିବା ସମୟରେ ପଲିଥିନି ବଦଳରେ କାଠ ଚାଙ୍ଗୁଡି ବ୍ୟବହାର କରିବା, ପରିବା ଓ ରାଶନ ସାମଗ୍ରୀ କିଣିଲା ବେଳେ କପଡା ବ୍ୟାଗ ବ୍ୟବହାର କରିବା ଓ ବ୍ୟବସାୟୀ ଭାଇମାନଙ୍କୁ କାଗଜ ଠୁଙ୍ଗାରେ ଜିନିଷ ଦେବା ପାଇଁ ପ୍ରବର୍ତ୍ତାଇବା, ଘରୁ ବାହାରୁଥିବା ଅଳିଆ ଆବର୍ଜନାକୁ ଏଣେତେଣେ ନ ପକାଇ ଡଷ୍ଟବିନରେ ପକାଇବା ପାଇଁ ଜନସାଧାରଣଙ୍କୁ ସଚେତନ କରାଇଥାନ୍ତି। ଉକ୍ତ କାର୍ଯ୍ୟ ପାଇଁ ସେ କାହାର ସହାୟତା ଉପରେ ନିର୍ଭର କରନ୍ତି ନାହିଁ।
ଏ ସମ୍ପର୍କରେ ପ୍ରଶାନ୍ତକୁ ପଚାରିବାରେ, ନିଜର ପରିବାର ପ୍ରତିପୋଷଣ ବାଦ ସମାଜର ମଙ୍ଗଳ ପାଇଁ ସେ ଦୈନିକ କିଛି ନା କିଛି କାମ କରିବେ ବୋଲି ଶପଥ ନେଇଛନ୍ତି। ଅନ୍ୟମାନଙ୍କୁ କାହିଁକି ସାଥିରେ ନେଉନାହାନ୍ତି ପଚାରିବାରେ ସେ କୁହନ୍ତି, କର୍ମମୟ ଜୀବନ ମଧ୍ୟରେ ବ୍ୟସ୍ତ ରହୁଥିବା ମଣିଷ ଅନ୍ୟ ପାଇଁ ଟିକେ ସମୟ କାଢ଼ିବାକୁ ମନ ବଳାଉ ନାହାନ୍ତି। ତେଣୁ କାହାକୁ ଉକ୍ତ କାମ କରିବାକୁ ଡାକିଲେ ବିଭିନ୍ନ ଆଳ ଦେଖାଇ ଆସୁନାହାନ୍ତି। ତେଣୁ ସେ ନିଜ କର୍ତ୍ତବ୍ୟ ଓ କ୍ଷମତା ପରିସର ଭିତରେ ଯେତିକି ପାରିବେ ପରିବେଶ ସୁରକ୍ଷା ପାଇଁ ସେତିକି କାମକରିବେ ବୋଲି କହିଛନ୍ତି ା ତାଙ୍କର ଏହି ମହତ୍ କାର୍ଯ୍ୟ ପାଇଁ ଅଧ୍ୟାପକ ହିରଣ୍ୟ ସ୍ବାଇଁ, ସାମାଜିକ କର୍ମୀ ସୁଧାଂଶୁ ମହାପାତ୍ର, ଶ୍ରମିକ ନେତା ଅଭୟ ସାମଲ, ସାମାଜିକ କର୍ମୀ ଗୌରହରି ସ୍ବାଇଁ, ସଂଗ୍ରାମ ରାଉତରାୟ, ସଞ୍ଜୟ ମହାରଣା ପ୍ରମୁଖ ଶୁଭେଚ୍ଛା ଜଣାଇଛନ୍ତି।
