ଚଣ୍ଡିଖୋଲ,୧୫।୨(ଡି.ଏନ.ଏ.): ଗ୍ରାମାଞ୍ଚଳକୁ ଭଲ ରାସ୍ତା ତିଆରି ପାଇଁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାର ପରିକଳ୍ପନା କରାଯାଇଥିଲା। ତେବେ ଏହି ଯୋଜନାରେ କରାଯାଉଥିବା ରାସ୍ତା କେତେ ନିମ୍ନମାନର ତାହା ଜାରକା ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ଥିବା ବଡ଼ଚଣା ବ୍ଲକର ବାଲିଚନ୍ଦ୍ରପୁର-ଦେକୁରୀ ରାସ୍ତାରେ ଦେଖିବାକୁ ମିଳିଛି। ୨୦୧୮ ଏପ୍ରିଲରେ ୪ କୋଟି ୧୦ ଲକ୍ଷ ଟଙ୍କା ବ୍ୟୟରେ ୧୧.୨ କିମି ଲମ୍ବ ଏହି ରାସ୍ତାର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ୨୫ ଏପ୍ରିଲ ୨୦୧୯ରେ କାର୍ଯ୍ୟ ଶେଷ ହେବାକୁ ଥିଲା। ମାତ୍ର ଏହାର ଏକ ବର୍ଷ ପରେ ଅର୍ଥାତ୍ ମାର୍ଚ୍ଚ ୨୦୨୦ରେ କାର୍ଯ୍ୟ ଶେଷ ହୋଇଥିଲା। ତେବେ ଜୁନ ଶେଷ ଭାଗ ଅର୍ଥାତ୍ କାର୍ଯ୍ୟ ଶେଷ ହେବାର ୪ ମାସ ନ ପୂରୁଣ ବିଭିନ୍ନ ସ୍ଥାନରେ ଖାଲ ସୃଷ୍ଟି ହୋଇଥିଲା। ଏନେଇ ଖବର ପ୍ରକାଶ ପାଇବା ପରେ ଠିକା ସଂସ୍ଥା ପକ୍ଷରୁ ରାସ୍ତା ମରାମତି କରାଯାଇଥିଲା। ଏବେ ପୁଣି ସେହିସବୁ ସ୍ଥାନରେ ପିଚୁ ଉଠିଯାଇ ଖାଲଖମାରେ ଭର୍ତ୍ତି ହୋଇଗଲାଣି। ନିମ୍ନମାନର କାର୍ଯ୍ୟ ଯୋଗୁ ଏପରି ସମସ୍ୟା ହେଉଥିବା ଲୋକେ ଅଭିଯୋଗ କରିଛନ୍ତି। ରାସ୍ତା ନିର୍ମାଣରେ ଅନିୟମିତତା ନେଇ ବିକ୍ରମତିରଣ ପଞ୍ଚାୟତ ପ୍ରାକ୍ତନ ସମିତିସଭ୍ୟ ସର୍ବେଶ୍ୱର ସାମଲ ମୁଖ୍ୟ ଶାସନ ସଚିବ, ୫ଟି ସଚିବ, ବିଭାଗୀୟ ମୁଖ୍ୟଯନ୍ତ୍ରୀ ଓ ଭିଜିଲାନ୍ସ ବିଭାଗର ଦୃଷ୍ଟି ଆକର୍ଷଣ କରିବା ସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ରାସ୍ତା ଶୋଚନୀୟ ହେବା ପରେ ଜୁଲାଇରେ ଅଞ୍ଚଳବାସୀ ଗ୍ରାମ୍ୟ ଉନ୍ନୟନ ବିଭାଗ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଥିଲେ। ମାତ୍ର ନିର୍ବାହୀ ଯନ୍ତ୍ରୀ ଆସି ନିମ୍ନମାନର କାର୍ଯ୍ୟକୁ ଅସ୍ବୀକାର କରିବା ସହ ଭାରିଯାନ ଓ ଟ୍ରାକ୍ଟର ଚଳାଚଳ ଯୋଗୁ ଏପରି ଅବସ୍ଥା ହୋଇଛି ବୋଲି କହିଥିଲେ। ଏବେ ରାସ୍ତାରେ ଭାରିଯାନ ଚଳାଚଳ ଅସମ୍ଭବ। ଚାରିନଙ୍ଗଳ ନିକଟରେ ରାସ୍ତା ମଝିରେ ବିଦ୍ୟୁତ୍ ଖୁଣ୍ଟ ରହିଛି। ସେହିପରି ବିଭିନ୍ନ ସ୍ଥାନରେ ରାସ୍ତା ପାର୍ଶ୍ୱରେ ବିଦ୍ୟୁତ୍ ଖୁଣ୍ଟ ଓ ଗଛ ଯୋଗୁ ଭାରିଯାନ ଚଳାଚଳ ହୋଇପାରୁନି। ତା୧୬ା୧୧ା୨୦ରେ ମୁଖ୍ୟଯନ୍ତ୍ରୀ ପରିଦର୍ଶନରେ ଆସି ରାସ୍ତାର ଉଭୟ ପାର୍ଶ୍ୱରେ ମୁଖ୍ୟ କେନାଲ ଓ ଶାଖା କେନାଲ ଯୋଗୁ ଏପରି ଅବସ୍ଥା ସୃଷ୍ଟିି ହୋଇଥିବା ତାଙ୍କ ପତ୍ର ସଂଖ୍ୟା ୨୩୨୨୧, ତା ୨ା୧୪।୨୦ରେ ଦର୍ଶାଇଥିଲେ। ଏଥିସହ ପ୍ରଥମ ବର୍ଷ ମରାମତି ପାଇଁ ରହିଥିବା ଅର୍ଥରେ ତୁରନ୍ତ ରାସ୍ତା ମରାମତି ପାଇଁ ନିର୍ବାହୀଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଥିଲେ। ମୁଖ୍ୟଯନ୍ତ୍ରୀଙ୍କ ଗସ୍ତକୁ ତିନିମାସ ବିତି ଥିଲେ ମଧ୍ୟ ରାସ୍ତା ମରାମତି କରାଯାଇ ନାହିଁ। ଗୋଟିଏ ପଟେ ନିର୍ବାହୀ ଯନ୍ତ୍ରୀ ରାସ୍ତା ଖରାପ ପାଇଁ ଭାରିଯାନ ଚଳାଚଳକୁ ଦାୟୀ କରୁଥିବା ବେଳେ ମୁଖ୍ୟଯନ୍ତ୍ରୀ କେନାଲକୁ ଦାୟୀ କରୁଛନ୍ତି। ବିଭାଗୀୟ ଯନ୍ତ୍ରୀଙ୍କ ଦୁଇ ପ୍ରକାର ବୟାନକୁ ଅଞ୍ଚଳବାସୀ ଗ୍ରହଣ କରିପାରୁନାହାନ୍ତି। ଏସବୁରୁ ଠିକାଦାରଙ୍କୁ ସୁରକ୍ଷା ଦେବା ପାଇଁ ବିଭାଗୀୟ ଅଧିକାରୀ ଚେଷ୍ଟା କରୁଥିବା ଅଭିଯୋଗ ହୋଇଛି।
ରାସ୍ତା ନିର୍ମାଣ ସମୟରେ ତିନିଥର ଆକଳନ ମୂଲ୍ୟ ପରିବର୍ତ୍ତନ କରାଯାଇ ୫୧ ଲକ୍ଷ ଟଙ୍କା ଅଧିକ ମଞ୍ଜୁର କରାଯାଇଥିଲା। ତେବେ ଠିକାଦାରଙ୍କ ମନମୁଖି କାର୍ଯ୍ୟ ପାଇଁ ପ୍ରାୟ ୩୦୦ ମିଟର ନିର୍ମାଣାଧୀନ ଗାଡ ର୍ୱାଲ(ସୁରକ୍ଷା ପ୍ରାଚୀର)ଭୁଶୁଡି ଯାଇଥିଲା। ସ୍ଥାନୀୟ ଲୋକେ ବହୁବାର ଅଭିଯୋଗ କରିଥିଲେ ମଧ୍ୟ କାର୍ଯ୍ୟାନୁଷ୍ଠାନ ନିଆଯାଇ ନାହିଁ। ବରଂ ଭୁଶୁଡି ଥିବା ଗାର୍ଡ ୱାଲକୁ କେତେକ ସ୍ଥାନରେ ଠିକା ସଂସ୍ଥା ପକ୍ଷରୁ ପୋତି ଦିଆଯାଇଥିଲା। ମାତ୍ର ଆଉ ଗାର୍ଡ ୱାଲ କରାଯାଇ ନ ଥିଲା। ଏ ସମ୍ପର୍କରେ ଗ୍ରାମ୍ୟ ଉନ୍ନୟନ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ତୁଳସୀ ପାତ୍ର କହିଛନ୍ତି, ରାସ୍ତା ଖରାପ ଥିବା ଆମେ ଅବଗତ ଅଛୁ। ତେଣୁ ତୁରନ୍ତ ମରାମତି ପାଇଁ ଠିକାଦାରଙ୍କୁ ନିର୍ଦ୍ଦେଶ ଦିଆସରିଛି। ତେବେ କେବେ ଏହାର ମରାମତି ହେଉଛି ତାହା ଦେଖିବାକୁ ଅପେକ୍ଷା।
