ଛତ୍ରପୁର,୨୨ା୫(ଡି.ଏନ.ଏ): ଗଞ୍ଜାମ ଜିଲା ଛତ୍ରପୁର ଆରଡବ୍ଲ୍ୟୁଡି ସବଡିଭିଜନ ଅଧୀନରେ ଚାଲିଥିବା ୫ଟି ପ୍ରଧାନମନ୍ତ୍ରୀ ସଡକ ନିର୍ମାଣରେ ଅହେତୁକ ବିଳମ୍ବ ଦେଖାଦେଇଛି। ଠିକାଦାରଙ୍କ ସହ ଚୁକ୍ତି ହୋଇଥିବା ନିର୍ମାଣ କାର୍ଯ୍ୟ ଅବଧି ସରିଗଲାଣି। ଏନେଇ ବାରମ୍ବାର ଆରଡବ୍ଲ୍ୟୁଡି ଗଞ୍ଜାମ -୨ ବିଭାଗ ପକ୍ଷରୁ ସମ୍ପୃକ୍ତ କାର୍ଯ୍ୟରେ ନିୟୋଜିତ ଠିକାଦାରମାନଙ୍କୁ ଚିଠି ସହ ଅନୁରୋଧ ଓ ନିର୍ଦ୍ଦେଶ ପରେ ମଧ୍ୟ ଠିକାଦାରମାନେ ନୀରବ ରହୁଛନ୍ତି ା ଏହି ଖିଲାପି ଠିକାଦାରମାନଙ୍କୁ ବ୍ରହ୍ମପୁରସ୍ଥିତ ଆରଡବ୍ଲ୍ୟୁ ଡିଭିଜନ-୨ ଗଞ୍ଜାମର ଅଧୀକ୍ଷଣ ଯନ୍ତ୍ରୀଙ୍କ ପକ୍ଷରୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି । ଏସବିଡି କ୍ଲଜ୍ ୫୨.୨(ଏ), (ଏଚ୍) ଆଧାରରେ ଉକ୍ତ କାରଣଦର୍ଶାଅ ନୋଟିସ୍ ଜାରି କରାଯିବା ସହ କାହିଁକି ଚୁକ୍ତି ବାତିଲ କରାନଯିବ ଏବଂ କ୍ଷତିଭରଣା କାହିଁକି କରାନଯିବ ସେ ସମ୍ପର୍କରେ ୭ ଦିନ ମଧ୍ୟରେ ଉତ୍ତର ଦେବାକୁ ନିର୍ଦ୍ଦେଶ ଦିଆଯାଇଛି ।
ମିଳିଥିବା ସୂଚନା ଅନୁସାରେ, ଛତ୍ରପୁର ବ୍ଲକ ର ଦିବ୍ୟସିଂହପୁର ଠାରୁ ଭାଗିରଥିପୁର ଭାୟା ବଉଳଗାଁ-ବଡମାଧପୁର-ବରଙ୍ଗ ରାସ୍ତା, ଏନଏଚ୍-୧୬ ଠାରୁ ଉପୁଲାପୁଟି ପିଡବ୍ଲ୍ୟୁଡି ରୋଡ୍ ଭାୟା ଶ୍ରୀରାମଚନ୍ଦ୍ରପୁର-ପାଇକପଡା-କାଳିପଲ୍ଳୀ-ବାସନାପୁଟି-ଉପୁଲାପୁଟି ରାସ୍ତା ଏବଂ ଦିବ୍ୟସିଂହପୁର ଠାରୁ ଗୋବା ଭାୟା ବଉଳଗାଁ-ସିଙ୍ଗିପୁର-ଖୁରିଗାଁ-ରଙ୍ଗମାଟିଆ-ଗୋବା ରାସ୍ତା ପ୍ରଧାନମନ୍ତ୍ରୀ ସଡକ ଯୋଜନାରେ ୩ ଟି ରାସ୍ତା ନିର୍ମାଣ ପାଇଁ ୬୩୩.୯୦ ଲକ୍ଷ ଟଙ୍କା ଆକଳନ ହୋଇଥିଲା । ଏଥିପାଇଁ ଠିକାଦାରଙ୍କ ସହ ୨୦୨୨ ସେପ୍ଟେମ୍ବର ୧୨ରେ ଏଗ୍ରିମେଣ୍ଟ ହୋଇଥିଲା । ତେବେ ଏପର୍ଯ୍ୟନ୍ତ ମାତ୍ର ୮.୭୮ ପ୍ରତିଶତ ତଥା ୫୫.୬୭ ଲକ୍ଷ ଟଙ୍କାର ନିର୍ମାଣ କାର୍ଯ୍ୟ ସରିଛି । ଏହି କାମ ଅତ୍ୟନ୍ତ କଚ୍ଛପ ଗତିରେ ଚାଲୁଥିବାରୁ ସମ୍ପୃକ୍ତ ଠିକାଦାରଙ୍କୁ କାରଣ ଦର୍ଶାଅ ନୋଟିସ୍ ଜାରି ହୋଇଥିବା ସୂଚନା ଦିଆଯାଇଛି । ସେହିପରି କରାତଳି ଠାରୁ ବ୍ରାହ୍ମଣିଆପଲ୍ଲୀ ଆରଡି ରୋଡ୍ ଭାୟା ଶ୍ରୀରାମପୁର ରୋଡ୍ ପ୍ରଧାନମନ୍ତ୍ରୀ ସଡକ ଯୋଜନାରେ ୨୦୫.୫୫ ଲକ୍ଷ ଟଙ୍କାରେ ନିର୍ମାଣ ପାଇଁ ଆକଳନ ହୋଇଥିଲା । ଠିକାଦାରଙ୍କ ସହ ୨୦୨୧ ଜାନୁଆରୀ ୨୧ରେ ଚୁକ୍ତି ହୋଇଥିଲା ଏବଂ ଏହି ରାସ୍ତା ନିର୍ମାଣ କାମ ୨୦୨୨ ସେପ୍ଟେମ୍ବର ୨୧ରେ ସରିବା ଲାଗି ଧାର୍ଯ୍ୟ ହୋଇଥିଲା । ତେବେ ବର୍ତ୍ତମାନ ସୁଦ୍ଧା ମାତ୍ର ୨୦.୧୫ ପ୍ରତିଶତ କାମ ତଥା ୪୧.୪୨ ଲକ୍ଷ ଟଙ୍କାର କାମ ସରିଛି । ଏହି ରାସ୍ତା ନିର୍ମାଣର ଅବଧି ସରିବାର ୬ ମାସ ରୁ ଉର୍ଦ୍ଧ୍ୱ ସମୟ ବିତିଲାଣି ା ତେବେ କାମ ଅଧାରୁ ବନ୍ଦ ରହିଛି । ସମ୍ପୃକ୍ତ ଠିକାଦାରଙ୍କୁ କାରଣ ଦର୍ଶାଅ ନୋଟିସ୍ ଜାରି ହୋଇଛି । ଆହୁରି ଜଣାଯାଇଛି ଯେ ପିଡବ୍ଲ୍ୟଡି ରୋଡ୍ ଠାରୁ ସାନଗୋପାଳପୁର ଭାୟା ଲାଉପୁଟ ରାସ୍ତା ପ୍ରଧାନମନ୍ତ୍ରୀ ସଡକ ଯୋଜନାରେ ନିର୍ମାଣ ପାଇଁ ୩୬୧.୮୩ ଲକ୍ଷ ଟଙ୍କା ଆକଳନ ହୋଇଥିଲା । ଏଥିପାଇଁ ୨୦୨୧ ସେପ୍ଟେମ୍ବର ୮ରେ କାମ ଆରମ୍ଭ ହୋଇଥିଲା ଏବଂ ୨୦୨୨ ଅଗଷ୍ଟ ୭ରେ କାମ ସରିବାକୁ ଦିନ ଧାର୍ଯ୍ୟ ହୋଇଥିଲା। ତେବେ ଅବଧିକୁ ୮ ମାସ ବିତିଯାଇଥିବା ବେଳେ ବର୍ତ୍ତମାନ ସୁଦ୍ଧା ୫୬.୩୦ ପ୍ରତିଶତ ତଥା ୨୦୩.୭୨ ଲକ୍ଷ ଟଙ୍କାର କାମ ଶେଷ ହୋଇଛି। ଏହି ବିଳମ୍ବ ଯୋଗୁଁ ସମ୍ପୃକ୍ତ ଠିକାଦାରଙ୍କୁ କାରଣ ଦର୍ଶାଅ ନୋଟିସ୍ ଜାରି ହୋଇଛି ।
