ଜେରୁଜେଲମ,୧୪।୧୦: ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଗୁରୁବାର ହମାସ ସହିତ ଯୁଦ୍ଧର ତଦାରଖ କରିବା ପାଇଁ ବିରୋଧୀ ଦଳର ନେତା ବେନି ଗାଣ୍ଟଜ୍ଙ୍କ ସହଯୋଗରେ ଏକ ଜରୁରୀକାଳୀନ ଏକତା ସରକାର ଗଠନ କରିଛନ୍ତି। ତେଲ ଅବିବରେ ସେନା ମୁଖ୍ୟାଳୟର ଏକ ଅଭିଭାଷଣରେ ନେତାନ୍ୟାହୁ କହିଛନ୍ତି ଯେ, ଇସ୍ରାଏଲ ଦେଶ ଏକଜୁଟ ହୋଇଛି ଏବଂ ବର୍ତ୍ତମାନ ନେତୃତ୍ୱ ମଧ୍ୟ ଏକଜୁଟ ହୋଇଛନ୍ତି।
ଏହି ଖବର ସାମ୍ନାକୁ ଆସିବା ପରେ ଅନେକ ଲୋକଙ୍କ ମନରେ ପ୍ରଶ୍ନ ଉଙ୍କି ମାରୁଛି ଯେ ଏହା କେଉଁ ପ୍ରକାରର ସରକାର, ଯେଉଁଥିରେ ବିରୋଧୀ ମଧ୍ୟ ସାମିଲ ଅଛନ୍ତି। ଲୋକମାନେ ଜାଣିବାକୁ ଚାହାଁନ୍ତି ଯେ ‘ଏକତା ସରକାର’ କ’ଣ? ଏଠାରେ ଆମେ ଇସ୍ରାଏଲର ଏକତା ସରକାର କ’ଣ ଏବଂ ଏହା କାହିଁକି ଆବଶ୍ୟକ ତାହା ବିସ୍ତୃତ ଭାବରେ ବର୍ଣ୍ଣନା କରିବାକୁ ଯାଉଛୁ।
ହମାସ ଆକ୍ରମଣ ପରେ ଇସ୍ରାଏଲର ସଂସଦ ଗୁରୁବାର ଏକତା ଚୁକ୍ତି କରିଛି, ଯେଉଁଥିରେ ନେତନ୍ୟାହୁର ଅନ୍ୟ ଜଣେ ପ୍ରତିଦ୍ୱନ୍ଦ୍ୱୀ ବେନି ଗାଣ୍ଟଜ ଏବଂ ତାଙ୍କ ବ୍ଲୁ ଆଣ୍ଡ ହ୍ବାଇଟ ଦଳର ୫ ଜଣ ସଦସ୍ୟ ମଧ୍ୟ ସରକାରରେ ଯୋଗ ଦେଇଛନ୍ତି। ଏହି ଚୁକ୍ତିନାମା ଅନୁଯାୟୀ ଏକ ଜରୁରୀକାଳୀନ ଯୁଦ୍ଧ ମନ୍ତ୍ରିମଣ୍ଡଳର ଗଠନ କରାଯାଇଛି, ଯେଉଁଥିରେ ପ୍ରଧାନମନ୍ତ୍ରୀଙ୍କ ଲିକୁଡ ପାର୍ଟିରୁ ନେତାନ୍ୟାହୁ ନିଜେ ସାମିଲ ହୋଇଥିବାବେଳେ ଅନ୍ୟପଟେ ଗାଣ୍ଟଜ ଏବଂ ୟୋଭ ଗାଲାଣ୍ଟ ଅଛନ୍ତି। ଗାଣ୍ଟଜ ଜଣେ ପୂର୍ବତନ ସେନା ମୁଖ୍ୟ।
ଚୁକ୍ତିନାମା ଅନୁଯାୟୀ, ଏକତା ସରକାର ଯୁଦ୍ଧର ଅବଧି ପାଇଁ କାର୍ଯ୍ୟ କରିବ। ଜରୁରୀକାଳୀନ ଯୁଦ୍ଧ କ୍ୟାବିନେଟ ଯୁଦ୍ଧର ଆଚରଣ ସମ୍ବନ୍ଧରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେବ ବୋଲି ଆଶା କରାଯାଉଛି। ଫାଇନାନ୍ସିଆଲ ଟାଇମ୍ସ ରିପୋର୍ଟ ଅନୁଯାୟୀ, ଯେ ପର୍ଯ୍ୟନ୍ତ ହମାସ ସହିତ ଇସ୍ରାଏଲର ଯୁଦ୍ଧ ଜାରି ରହିବ, ଯୁଦ୍ଧ ସମ୍ବନ୍ଧୀୟ ଆଇନ ବ୍ୟତୀତ ଅନ୍ୟ କୌଣସି ଆଇନ ପାରିତ ହେବ ନାହିଁ। ଏହାର ଅର୍ଥ ହେଉଛି ଯେ ନେତାନ୍ୟାହୁ ସରକାର ଦେଇଥିବା ବିବାଦୀୟ ନ୍ୟାୟିକ ସଂସ୍କାର ଆଇନ ମଧ୍ୟ ବର୍ତ୍ତମାନ ପର୍ଯ୍ୟନ୍ତ ଅଟକି ରହିଛି।
