କୋଲକାତା,୨୮।୩ : ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଙ୍ଗଳବାର ବେଲୁର ମଠ ପରିଦର୍ଶନ କରିଛନ୍ତି। ଶ୍ରୀ ଶ୍ରୀ ଠାକୁର ରାମକୃଷ୍ଣ ପରମହଂସ ଏବଂ ମା ଶାରଦା ଦେବୀଙ୍କର ଦର୍ଶନ କରିଥିଲେ। ରାଷ୍ଟ୍ରପତି ମଠର ମୁଖ୍ୟ ମନ୍ଦିର ସହିତ ସ୍ବାମୀ ବିବେକାନନ୍ଦଙ୍କ କୋଠରୀ ପରିଦର୍ଶନ କରିଥିଲେ ଯେଉଁଠାରେ ସ୍ବାମୀଜୀ ଧ୍ୟାନ କରୁଥିଲେ। ରାଷ୍ଟ୍ରପତି ଦୁଇ ଦିନିଆ ଗସ୍ତରେ ପଶ୍ଚିମବଙ୍ଗକୁ ଆସିଛନ୍ତି। ମଙ୍ଗଳବାର ହେଉଛି ରାଷ୍ଟ୍ରପତିଙ୍କ ଗସ୍ତର ଦ୍ୱିତୀୟ ଦିନ।
ରାଷ୍ଟ୍ରପତିଙ୍କୁ ମିଶନର ମହାସଚିବ ସ୍ବାମୀ ସୁବିରନ୍ଦାଜୀ ମହାରାଜ ସ୍ବାଗତ କରିଥିଲେ। ଉନବିଂଶ ଶତାବ୍ଦୀର ଶେଷ ଭାଗରେ ସ୍ବାମୀ ବିବେକାନନ୍ଦଙ୍କ ଦ୍ୱାରା ପ୍ରତିଷ୍ଠିତ ରାମକୃଷ୍ଣ ମିଶନର ବିଶ୍ୱସ୍ତରୀୟ ମୁଖ୍ୟାଳୟ ଏହି କମ୍ପ୍ଲେକ୍ସର ସ୍ଥାପତ୍ୟ ହିନ୍ଦୁ, ଇସଲାମ, ଖ୍ରୀଷ୍ଟିଆନ ଏବଂ ବୌଦ୍ଧ କଳାର ମିଶ୍ରଣ ପାଇଁ ଉଲ୍ଲେଖନୀୟ। ରାଷ୍ଟ୍ରପତି ସମଗ୍ର କ୍ୟାମ୍ପସ ପରିଦର୍ଶନ କରିଥିଲେ। ରାଷ୍ଟ୍ରପତିଙ୍କ ଗସ୍ତ ଏବଂ ସୁରକ୍ଷାକୁ ଦୃଷ୍ଟିରେ ରଖି ସମସ୍ତ ପରିଦର୍ଶକଙ୍କ ପାଇଁ ମଙ୍ଗଳବାର ସକାଳେ ଏହି ମଠ କିଛି ସମୟ ପାଇଁ ବନ୍ଦ ରହିଥିଲା। କଡା ସୁରକ୍ଷା ବ୍ୟବସ୍ଥା ମଧ୍ୟରେ ରାଷ୍ଟ୍ରପତି ପୂର୍ବାହ୍ନ ୯ଟାରେ ବେଲୁର ମଠ ପାଇଁ କୋଲକାତା ଛାଡିଥିଲେ । ସେଠାରେ ସେ ଅଧ ଘଣ୍ଟା ରହିଥିଲେ ।
