ଭୁବନେଶ୍ୱର,୨୬।୮ (ରବିନାରାୟଣ ଜେନା): ରାଜ୍ୟରେ କୃଷକମାନଙ୍କୁ ସ୍ବାବଲମ୍ବୀ କରିବା ସହିତ ଆଳୁ ଚାହିଦା ମେଣ୍ଟାଇବା ଲାଗି ରାଜ୍ୟ ସରକାରଙ୍କ ପକ୍ଷରୁ ୨୦୧୪-୧୫ରେ ‘ଆଳୁ ମିଶନ’ ଆରମ୍ଭ ହୋଇଥିଲା। ଏହାର ଉଦ୍ଦେଶ୍ୟ ରହିଥିଲା ଓଡ଼ିଶାରେ ଆଳୁ ଉତ୍ପାଦନ ବଢ଼ାଇବା ସହିତ ରାଜ୍ୟକୁ ଆଳୁ ଉତ୍ପାଦନ କ୍ଷେତ୍ରରେ ଆତ୍ମନିର୍ଭର କରିବା। ୨୦୧୫-୧୬ରୁ ଏହା କାର୍ଯ୍ୟକାରୀ ହୋଇଥିଲା। ପ୍ରାରମ୍ଭିକ ପର୍ଯ୍ୟାୟରେ ମିଶନ ପାଇଁ ୫୦ କୋଟି ଟଙ୍କାର ବଜେଟ ବ୍ୟବସ୍ଥା କରାଯାଇଥିଲା। ଚଳିତ ବଜେଟ(୨୦୨୬-୨୭)ରେ ଏହି ପରିମାଣ ବୃଦ୍ଧି କରାଯାଇ ୩୬୬.୯୦ କୋଟି ଟଙ୍କା କରାଯାଇଛି। ହେଲେ ଏପର୍ଯ୍ୟନ୍ତ ବିଭାଗ ପକ୍ଷରୁ ଗୋଟିଏ ବି ଟଙ୍କା ଖର୍ଚ୍ଚ ହୋଇନାହିଁ। ସରକାରୀ ଯୋଜନା କାର୍ଯ୍ୟକାରୀ କରିବା ଲାଗି ରାଜ୍ୟ ସରକାରଙ୍କ ଉଦ୍ୟାନ କୃଷି ବିଭାଗ ପକ୍ଷରୁ ବରିଷ୍ଠ ଆଇଏଏସ୍ ଅଧିକାରୀଙ୍କଠାରୁ ଆରମ୍ଭକରି ଓଏଏସ୍ ଅଧିକାରୀଙ୍କ ସହ ଯନ୍ତ୍ରୀ ଓ ଅନ୍ୟାନ୍ୟ ବର୍ଗର ଅଧିକାରୀ ଏବଂ କର୍ମଚାରୀ ରହିଛନ୍ତି। ସେମାନଙ୍କ ପାଇଁ ଗାଡ଼ି, ଗସ୍ତଖର୍ଚ୍ଚଠାରୁ ଆରମ୍ଭକରି ବିଦେଶ ଭ୍ରମଣ ପର୍ଯ୍ୟନ୍ତ ଶହ ଶହ କୋଟି ଟଙ୍କା ସରକାରୀ ତହବିଲରୁ ଖର୍ଚ୍ଚ ହେଉଛି। ହେଲେ ସରକାରୀ ଯୋଜନା କାର୍ଯ୍ୟକାରୀ ବେଳକୁ ସେମାନଙ୍କ ଜୁ ପାଉନାହିଁ। ଏଭଳି କେତେକ ଘଟଣାକୁ ନେଇ ନିକଟରେ ଉପମୁଖ୍ୟମନ୍ତ୍ରୀ ତଥା କୃଷିମନ୍ତ୍ରୀ କନକ ବର୍ଦ୍ଧନ ସିଂଦେଓ ବିରକ୍ତି ପ୍ରକାଶ କରିଥିଲେ। ରାଜ୍ୟରେ କାହିଁକି ଅଧିକ ଶୀତଳଭଣ୍ଡାର ସୃଷ୍ଟି ହୋଇପାରୁନାହିଁ ତାକୁ ନେଇ ଅଧିକାରୀଙ୍କ ଉପରେ ବର୍ଷିଥିଲେ। ଏବେ ‘ଧରିତ୍ରୀ’କୁ ଏକ ସାଂଘାତିକ ତଥ୍ୟ ହସ୍ତଗତ ହୋଇଛି, ଯେଉଁଥିରେ ଆଳୁ ମିଶନ ସହିତ ଅନ୍ୟ କେତେକ ଯୋଜନାରେ ଜୁଲାଇ ସୁଦ୍ଧା ଗୋଟିଏ ବି ଟଙ୍କା କାର୍ଯ୍ୟକାରୀ ହୋଇ ନ ଥିବା ନିକଟରେ ଉଦ୍ୟାନ ବିଭାଗ ସମୀକ୍ଷା ବୈଠକରୁ ଜଣାଯାଇଛି।
ବିଭାଗର ଜଣେ ବରିଷ୍ଠ ଅଧିକାରୀ ନିଜ ନାମ ଗୋପନ ରଖି ପ୍ରଦାନ କରିଥିବା ତଥ୍ୟ ଅନୁଯାୟୀ, ଚଳିତବର୍ଷ କୃଷି ବଜେଟରେ ଆଳୁ ମିଶନ ସହିତ ଅନ୍ୟ ୭ଟି ଯୋଜନାରେ ଜୁଲାଇ ଶେଷ ସୁଦ୍ଧା ଗୋଟିଏ ବି ଟଙ୍କା ଖର୍ଚ୍ଚ ହୋଇନାହିଁ। ଆଳୁ ମିଶନ ସହିତ ପରିବା ଏବଂ ମସଲା ମିଶନ ଲାଗି ସରକାରଙ୍କ ପକ୍ଷରୁ ବଜେଟରେ ୩୬୬.୯୦ କୋଟି ଟଙ୍କା ବ୍ୟୟବରାଦ କରାଯାଇଥିଲା। ସେହିପରି ସ୍ବୟଂ ସହାୟକ ଗୋଷ୍ଠୀ(ଏସ୍ଏଚ୍ଜି)ଗୁଡ଼ିକୁ ଛତୁଚାଷ ଏବଂ ଫୁଲଚାଷ ପାଇଁ ପ୍ରୋତ୍ସାହନ ଦେବା ଲାଗି ବଜେଟରେ ୫୭ କୋଟିର ବ୍ୟବସ୍ଥା କରାଯାଇଥିଲେ ମଧ୍ୟ ଗୋଟିଏ ବି ଟଙ୍କା ଖର୍ଚ୍ଚ ହୋଇ ନ ଥିବାବେଳେ ଭିତ୍ତିଭୂମି ବାବଦକୁ ଥିବା ୧୦ କୋଟି, କୃଷି ଉତ୍ପାଦକ ସଙ୍ଗଠନ ପାଇଁ ୫ କୋଟି, ଶୀତଳଭଣ୍ଡାର ଲାଗି ୬୩ କୋଟି, ସାର ଓ ଅନ୍ୟାନ୍ୟ କୀଟନାଶକ ପାଇଁ ଚାଷୀଙ୍କ ରିହାତି ବାବଦକୁ ୧୫.୩୦ କୋଟି ଏବଂ ଉଦ୍ୟାନ କୃଷି ମିଶନର ୧୨.୫୧ କୋଟି ଭଳି ଅନ୍ୟାନ୍ୟ ଯୋଜନାର ଅର୍ଥ ମଧ୍ୟ ଖର୍ଚ୍ଚ ହୋଇ ନ ଥିବା ରିପୋର୍ଟରୁ ଜଣାଯାଇଛି। ତେବେ ବ୍ଲକସ୍ତରରେ ଥିବା ବିଭିନ୍ନ ନର୍ସରୀ ଓ ବିକ୍ରୟ କେନ୍ଦ୍ର ପାଇଁ ବଜେଟରେ ବ୍ୟବସ୍ଥା ହୋଇଥିବା ୧୪.୫୦ କୋଟିରୁ ୩୩.୬୬ ଲକ୍ଷ ଟଙ୍କା ଖର୍ଚ୍ଚ ହୋଇଛି। ଉଦ୍ୟାନ କୃଷି ବିଭାଗର ପ୍ରାୟ ୧୫ଟି ଯୋଜନା ଲାଗି ବଜେଟରେ ପ୍ରସ୍ତୁତ ହୋଇଥିବା ୭୮୭କୋଟି ୪୧ଲକ୍ଷ ୫୩ହଜାର ଟଙ୍କାରୁ ବିଭାଗ ମାତ୍ର ୩୩.୬୬ଲକ୍ଷ ଟଙ୍କା ଖର୍ଚ୍ଚ କରିଥିବା ଜଣାଯାଇଛି। ସବୁଠାରୁ ବଡ଼କଥା ହେଲା, ରାଜ୍ୟରେ କୃଷକମାନଙ୍କୁ ଆର୍ଥିକ ସଶକ୍ତୀକରଣ କରିବା ସହିତ ସେମାନଙ୍କ ଆୟ ବୃଦ୍ଧି ଲାଗି ସରକାରଙ୍କ ପକ୍ଷରୁ ସ୍ବତନ୍ତ୍ର କୃଷି ବଜେଟ ପ୍ରସ୍ତୁତ କରାଯାଇଛି। ହେଲେ ଏପର୍ଯ୍ୟନ୍ତ ବଜେଟ ଅର୍ଥ ଟଙ୍କାଟିଏ ଖର୍ଚ୍ଚ ନ ହେବା କେବଳ ଯେ ବିଭାଗୀୟ ଅଧିକାରୀଙ୍କ ଦକ୍ଷତା ଉପରେ ପ୍ରଶ୍ନ ଉଠାଉଛି ତାହା ନୁହେଁ, କୃଷିକ୍ଷେତ୍ର ଓ କୃଷକଙ୍କ ପାଇଁ ସରକାର ଯେଉଁ ସ୍ବପ୍ନ ଦେଖୁଛନ୍ତି ତାହା ସଫଳ ହେବାରେ ଅନ୍ତରାୟ ସୃଷ୍ଟି ହେଉଛି। ଆଳୁ ମିଶନର ମୂଳ ଲକ୍ଷ୍ୟ ଓ ବର୍ତ୍ତମାନର ଆଳୁ ଉତ୍ପାଦନ-ଉପଲବ୍ଧତା ସ୍ଥିତି ମଧ୍ୟରେ କେତେ ସଫଳତା ମିଳିଛି, ସେନେଇ ପ୍ରଶ୍ନ ଉଠୁଛି।
