ଭଦ୍ରକ ଅଫିସ, ୯ା୨: ଭଦ୍ରକ ଜିଲାରେ ଆଳୁ ଚାଷ ପ୍ରତି ଚାଷୀଙ୍କ ଆଗ୍ରହ ରହୁ ନ ଥିବା ଦେଖିବାକୁ ମିଳିଛି। ସରକାର ଆଳୁ ଚାଷକୁ ପ୍ରୋତ୍ସାହିତ କରିବା ପାଇଁ ବିହନ ଯୋଗାଣ ସହ ହେକ୍ଟର ପିଛା ସର୍ବାଧିକ ୫୮ ହଜାର ଟଙ୍କା ସବ୍ସିଡି ଘୋଷଣା କରିଛନ୍ତି। ତଥାପି ଆଳୁ ଚାଷ ଜିଲାରେ ବୃଦ୍ଧି ବଦଳରେ ହ୍ରାସ ପାଇଥିବା ପରିଲକ୍ଷିତ ହୋଇଛି। ଜିଲାରେ ଆଳୁ ମିଶନ ଫେଲ ମାରିଥିବା ଅଭିଯୋଗ ହୋଇଛି।
ଗତବର୍ଷ ଜିଲାରେ ପ୍ରାୟ ୮୮ ହେକ୍ଟର ଜମିରେ କେବଳ ଆଳୁ ଚାଷ କରାଯାଇଥିବା ବେଳେ ଚଳିତ ବର୍ଷ ୫୯ ହେକ୍ଟର ଚାଷ ହୋଇଛି। ଜିଲାର ୭ଟି ବ୍ଲକ ମଧ୍ୟରୁ କେବଳ ୫ ବ୍ଲକରେ ଆଳୁ ଚାଷ ହୋଇଥିବା ବେଳେ ତିହିଡ଼ି ଓ ଧାମନଗର ବ୍ଲକରେ ଜଣେ ହେଲେ ଚାଷୀ ଆଳୁ ଚାଷ କରିନାହାନ୍ତିି। ଚାନ୍ଦବାଲି ବ୍ଲକରେ ସର୍ବାଧିକ ୧୩ ହେକ୍ଟର ଜମିରେ ଆଳୁ ଚାଷ ହୋଇଥିବା ବେଳେ ଭଦ୍ରକରେ ୯.୯୬ ହେକ୍ଟର, ଭଣ୍ଡାରିପୋଖରୀରେ ୩.୩୩ ହେକ୍ଟର ଏବଂ ବାସୁଦେବପୁର ଓ ବନ୍ତ ବ୍ଲକରେ ୬.୬୬ ହେକ୍ଟର ଲେଖାଏ ଜମିରେ ଆଳୁ ଚାଷ ହୋଇଛି। ଚଳିତବର୍ଷ ସରକାରୀ ଭାବେ ଜିଲାରେ ୮୯୯ କୁଇଣ୍ଟାଲ ଆଳୁ ବିହନ ଯୋଗାଇ ଦିଆଯାଇଛି। ଚଳିତ ବର୍ଷ ପ୍ରାୟ ୧୦ ହଜାର ମେଟ୍ରିକ ଟନ ଆଳୁ ଉପତ୍ାଦନ ଲକ୍ଷ୍ୟ ରଖାଯାଇଛି। ଘରୋଇ ବଜାର ସର୍ବେକ୍ଷଣ ରିପୋର୍ଟ ଅନୁଯାୟୀ ଭଦ୍ରକ ଜିଲାରେ ବାର୍ଷିକ ପ୍ରାୟ ୩ ଲକ୍ଷ ୫୦ ହଜାର ମେଟ୍ରିକ ଟନ ଆଳୁର ଆବଶ୍ୟକତା ରହିଛି। ହେଲେ ଜିଲାରେ ନୈରାଶ୍ୟଜନକ ଆଳୁ ଉପତ୍ାଦନ ଯୋଗୁ ପଡ଼ୋଶୀ ରାଜ୍ୟ ଉପରେ ନିର୍ଭର କରିବାକୁ ପଡ଼ୁଛି।
ରାଜ୍ୟରେ ଗୁରୁତର ଆଳୁ ସଙ୍କଟକୁ ଦୃଷ୍ଟିରେ ରଖି ସରକାର ୨୦୧୫-୧୬ ରେ ଆଳୁ ମିଶନ ଆରମ୍ଭ କରିଥିଲେ। ରାଜ୍ୟରେ ବ୍ୟାପକ ଭାବେ ଆଳୁଚାଷ କରିବାକୁ ସରକାରୀ ପ୍ରୋସତ୍ାହନ ସହ ଆଳୁକୁ ଦୀର୍ଘଦିନ ଧରି ସଂରକ୍ଷିତ କରି ରଖିବାକୁ ରାଜ୍ୟବ୍ୟାପୀ ଅଧିକରୁ ଅଧିକ ଶୀତଳ ଭଣ୍ଡାର ଖୋଲିବାକୁ ପ୍ରୟାସ କରିଥିଲେ। ସରକାରୀ ପ୍ରୋତ୍ସାହନ ସତ୍ତ୍ୱେ ଜିଲାରେ ଆଳୁ ଚାଷ ପ୍ରତି ଚାଷୀଙ୍କ ଆଗ୍ରହ ହେଉ ନ ଥିବା ନେଇ ଜିଲା ସହକାରୀ ଉଦ୍ୟାନ କୃଷି ନିର୍ଦ୍ଦେଶକ କନ୍ଦ ଜେନା କହନ୍ତି ଆଳୁ ମୁଖ୍ୟତଃ ଅକ୍ଟୋବର ଏବଂ ନଭେମ୍ବର ମାସରେ କରାଯାଇ ଜାନୁଆରୀ ଫେବୃଆରୀରେ ଅମଳ କରାଯାଇଥାଏ। ହେଲେ ଜିଲାରେ ବିଳମ୍ବିତ ଖରିଫ ଧାନ ଅମଳ ଯୋଗୁ ଚାଷ ବିଳମ୍ବିତ ହେଉଛି। ଫଳରେ ଆଳୁ ଉପତ୍ାଦନ ହ୍ରାସ ପାଉଛି। ଫଳରେ ଆଳୁ ଚାଷ ପ୍ରତି ଚାଷୀଙ୍କ ଆଗ୍ରହ ରହୁନାହିଁ।
