ବେଗୁନିଆପଡ଼ା,୨୩ା୩: ଜାନୁୟାରୀ ୨୯ରେ ଘଟିଥିବା ଗରିବ ଦାଶ ମୃତ୍ୟୁ ଘଟଣାରେ ଏବେ ଚାଞ୍ଚଲ୍ୟକର ଖୁଲାସା ସାମ୍ନାକୁ ଆସିଛି। ଗରିବ ଦାଶଙ୍କ ମୃତ୍ୟ ଆତ୍ମହତ୍ୟା ବୋଲି ଆଶଙ୍କା କରାଯାଉଥିଲା ବେଳେ ବ୍ୟବଚ୍ଛେଦ ରିପୋର୍ଟ ଏବଂ ଫୋନ କଲ୍ ତଥ୍ୟକୁ ଆଧାର କରି ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଜଣାପଡିଛି।
ପ୍ରକାଶ ଯେ, ଜାନୁୟାରୀ ୨୯ ତାରିଖ ରାତିରେ ଅଙ୍ଗାରଗାଁ -ଗିଲିଣ୍ଡା ରାସ୍ତାରେ ଥିବା ଏକ କୂଅରୁ ଗରିବ ଦାଶଙ୍କ କ୍ଷତାକ୍ତ ଗଳିତ ମୃତଦେହ ଜବତ ହୋଇଥିଲା। ପ୍ରାଥମିକ ତଦନ୍ତରୁ ଏହା ଏକ ଆତ୍ମହତ୍ୟା ବୋଲି ଜଣାପଡିଥିବା ବେଳେ ପରବର୍ତ୍ତୀ ସମୟରେ ଗରିବଙ୍କ ସ୍ତ୍ରୀଙ୍କ ଉପରେ ସନ୍ଦେହ ଉପୁଜିଥିଲା। ପୋଲିସ ବିଭିନ୍ନ ଦିଗରୁ ଅନୁସନ୍ଧାନ ପରେ ଏହା ଏକ ପ୍ରେମଜନିତ ସୁପରିକଳ୍ପିତ ହତ୍ୟାକାଣ୍ଡ ବୋଲି ଜାଣିବାକୁ ପାଇଥିଲେ। ବେଗୁନିଆପଡା ଥାନା ଆଇଆଇସି ପୂର୍ଣ୍ଣଚନ୍ଦ୍ର ପ୍ରଧାନ ପୁଣି ଘଟଣା ସ୍ଥଳରେ ପହଞ୍ଚି କୂଅରୁ ମୃତକଙ୍କ ମୋବାଇଲ, ଏବଂ ହତ୍ୟାରେ ବ୍ୟବହୃତ ପଥର ଜବତ କରିଥିଲେ। ଗିରଫ ହୋଇଥିବା ସ୍ତ୍ରୀ ଏବଂ ପ୍ରେମିକକୁ ଦଫା ୩୦୨ ରେ ଗିରଫ କରି କୋର୍ଟ ଚାଲାଣ କରାଯାଇଥିବା ନେଇ ଥାନା ଅଧିକାରୀ ପ୍ରଧାନ କହିଛନ୍ତି।
