ମୁମ୍ବାଇ, ୧୨।୪- ଅଷ୍ଟ୍ରେଲିଆର ପୂର୍ବତନ କ୍ରିକେଟ ଅଧିନାୟକ ରିକି ପଣ୍ଟିଂ ଚଳିତ ଆଇପିଏଲରେ ଦିଲ୍ଲୀ କ୍ୟାପିଟାଲ୍ସର କୋଚ୍ଭାବେ ଉଦାହରଣ ସୃଷ୍ଟି କରିଛନ୍ତି। ଦଳର ନିୟମିତ ଅଧିନାୟକ ଶ୍ରେୟାସ ଆୟାର ଆହତ ସମସ୍ୟା ଯୋଗୁ ଏବେ ଡାକ୍ତରଖାନାରେ ଚିକିତ୍ସିତ ଅଛନ୍ତି। ତାଙ୍କ ସ୍ଥାନରେ ରିଷଭ ପନ୍ତଙ୍କୁ ଦଳର ନେତୃତ୍ୱଭାର ପ୍ରଦାନ କରାଯାଇଛି। ମାତ୍ର ଶନିବାର ଚେନ୍ନାଇ ସୁପରକିଙ୍ଗ୍ସ ବିପକ୍ଷରେ ଦିଲ୍ଲୀର ବିଜୟ ପରେ ଆୟାରଙ୍କ ସହ ଭର୍ଚୁଆଲ ବାର୍ତ୍ତାଳାପ ପରି ଭିଡିଓକୁ ଖେଳାଳିଙ୍କ ମଧ୍ୟରେ ଶେୟାର କରିଛନ୍ତି। ଏହି ବାର୍ତ୍ତାଳାପ ଅବସରରେ ପଣ୍ଟିଂ ଦଳ ତାଙ୍କୁ ମିସ୍ କରୁଥିବା କହିବା ସହ ତାଙ୍କ ହେୟାର ଷ୍ଟାଇଲ୍କୁ ପ୍ରଶଂସା କରିଥିଲେ। ”ତୁମକୁ ମିସ୍ କରୁଛୁ, ପୂର୍ବପରି ଅନୁଭବ ହେଉନାହିଁ। ଆସ, ଆମ ସହିତ ଯୋଗଦିଅ, ମାତ୍ର ୭ ଦିନର କ୍ୱାରାଣ୍ଟାଇନ୍। ଏହି ଦିନଗୁଡ଼ିକ ଶୀଘ୍ର ଅତିବାହିତ ହୋଇଯିବ, ମୋତେ ବିଶ୍ୱାସ କର। ଆମେ ଏକ ଦ୍ୱାଦଶ ଖେଳାଳି ଆବଶ୍ୟକ କରୁଛୁ, ଯିଏକି ଆମ ପାଇଁ ଡ୍ରିଙ୍କ୍ସ ଯୋଗାଇପାରିବେ“ ବୋଲି ପଣ୍ଟିଂ କହିଥିବା ଭିଡିଓ ଖେଳାଳିଙ୍କ ମଧ୍ୟରେ ଶେୟାର କରାଯାଇଛି।
