କେନ୍ଦ୍ରାପଡ଼ା ଅଫିସ,୧୧ା୨: କେନ୍ଦ୍ରାପଡ଼ା ଜିଲା ବିକାଶର ନମୁନା ପ୍ରତ୍ୟେକ ନିର୍ବାଚନ ସମୟରେ ଦେଖିବାକୁ ମିଳୁଛି। ସ୍ବାଧୀନତାର ୭୫ ବର୍ଷରେ ମଧ୍ୟ ଜିଲାର ବିଭିନ୍ନ ଗ୍ରାମକୁ ଯିବାକୁ ଉପଯୋଗୀ ରାସ୍ତା ନାହିଁ। ପୋଲିଂ କର୍ମଚାରୀ ବୁଥ୍କୁ ଚାଲି ଚାଲି ଯିବାକୁ ଥିବାବେଳେ ସରଞ୍ଜାମ ନିଜକୁ ବୋହିବାକୁ ପଡିବ। ସେହିପରି ମତଦାନ କେନ୍ଦ୍ର ପାଇଁ ୫୧ଟି ସ୍ଥାନରେ ଅସ୍ଥାୟୀ ଟେଣ୍ଟ ନିର୍ମାଣ କରିବାକୁ ପଡିବ। ତେବେ ଚଳିତ ତ୍ରିସ୍ତରୀୟ ନିର୍ବାଚନର ସୁପରିଚାଳନା ପାଇଁ ମୋଟ ୪,୨୫୮ ପୋଲିଂ କର୍ମଚାରୀ ନିଯୁକ୍ତ ହୋଇଥିବା ଜିଲା ପଞ୍ଚାୟତ ବିଭାଗ ପକ୍ଷରୁ ତଥ୍ୟ ମିଳିଛି।
ଆସନ୍ତା ୧୬ ତାରିଖରୁ ପ୍ରଥମ ପର୍ଯ୍ୟାୟ ନିର୍ବାଚନ ହେବ। ଆଳି ବ୍ଲକ ଏହି ପ୍ରଥମ ପର୍ଯ୍ୟାୟରେ ଥିବା ବେଳେ ନଳପାହି, ଦକ୍ଷିଣଡିହା, ଏକମାଣିଆ ଓ ପଦନୀପାଳ ଗ୍ରାମକୁ ରାସ୍ତା ନାହିଁ। ଆଳି ବ୍ଲକର ଏହି ଦୁଇ ଗ୍ରାମ ସହ ମହାକାଳପଡ଼ାର ବତିଘର ପଞ୍ଚାୟତକୁ ଯିବାକୁ ମଧ୍ୟ ରାସ୍ତା ନାହିଁ। ଏକାଧିକ ବୁଥରେ ଏହି ଅଞ୍ଚଳରେ ମତଦାନ କାର୍ଯ୍ୟ ଚାଲିବ। ସେହିପରି ଜିଲାର ଉପାନ୍ତ ରାଜନଗର ବ୍ଲକ ଅଞ୍ଚଳରେ କେତେଗୋଟି ବୁଥକୁ ରାସ୍ତା ନାହିଁ। ନଦୀ ଏଥିରେ ବାଧକ ସାଜିଛି। ସେତୁ ନ ଥିବାରୁ ପୋଲିଂ କର୍ମଚାରୀ ଡଙ୍ଗାରେ ଯାଇ ନଦୀ ଆରପଟରୁ ବୁଥ୍କୁ ଚାଲିକି ଯିବାକୁ ପଡିବ। କେତେକ ସ୍ଥାନରେ ବାଇକ୍ ଓ ଅଟୋ ରିକ୍ସା ବ୍ୟବସ୍ଥା ଥିଲେ ମଧ୍ୟ ପୋଲିଂ କର୍ମଚାରୀଙ୍କ ଦୁର୍ଦ୍ଦଶା ବଢ଼ିବ। ଜିଲାରେ ୩,୬୯୮ ବୁଥ୍ ପ୍ରସ୍ତୁତ ହୋଇଛି। ବାଲଟ ବକ୍ସ, କାଗଜପତ୍ର, ଲଣ୍ଠନ, କର୍ମଚାରୀଙ୍କ ଅତ୍ୟାବଶ୍ୟକୀୟ ସାମଗ୍ରୀ ପାଇଁ ୭୪୬ଟି ଛୋଟ, ବଡ଼ ଗାଡ଼ି ସହ ବାଇକ୍ ବ୍ୟବସ୍ଥା ହୋଇଛି। ଡେରାବିଶ ବ୍ଲକ ଅଞ୍ଚଳର ୩୭୧ ବୁଥ୍ରେ ଭୋଟ ଗ୍ରହଣ ହେବ। ତେବେ ଏଠାରେ ଆବଶ୍ୟକ ସ୍ଥାୟୀ ଗୃହ ନ ଥିବାରୁ ୧୯ଟି ମତଦାନ କେନ୍ଦ୍ର ପ୍ରସ୍ତୁତ କରାଯିବ। ସେହିପରି ମାର୍ଶାଘାଇ ବ୍ଲକ ଅଞ୍ଚଳରେ ୫ଟି, ରାଜନଗରରେ ୫ଟି, କେନ୍ଦ୍ରାପଡ଼ା ବ୍ଲକରେ ୧୭ଟି ଓ ଗରଦପୁର ବ୍ଲକ ଅଞ୍ଚଳରେ ୬ଟି ଅସ୍ଥାୟୀ କେନ୍ଦ୍ର ନିର୍ମାଣ ହେବ। ନଦୀ ପାର ପାଇଁ ଡଙ୍ଗା ବ୍ୟବସ୍ଥା ହୋଇଥିବା ଜିଲାପାଳ ଅମୃତ ଋତୁରାଜ ସୂଚନା ଦେଇଛନ୍ତି। ଜିଲାପାଳ ଋତୁରାଜ କହିଛନ୍ତି ଯେ, ସମସ୍ତ କର୍ମଚାରୀଙ୍କୁ ନିର୍ବାଚନର ସୁପରିଚାଳନା ପାଇଁ ତାଲିମ ସହ ଦାୟିତ୍ୱ ବଣ୍ଟନ ହୋଇଛି। ଇତିମଧ୍ୟରେ ଜିଲାର ୧୫୭୫ ଉତ୍ତେଜନାପ୍ରବଣ ବୁଥ୍ଗୁଡିକ ଚିହ୍ନଟ ହୋଇଛି। ଏହାର ସୁପରିଚାଳନା ପ୍ରତି ଦୃଷ୍ଟି ଦିଆଯାଇଥିବା ଜିଲାପାଳ ସୂଚନା ଦେଇଛନ୍ତି।
