ବାରିପଦା ଅଫିସ,୧୯ ।୨ ମୟୂରଭଞ୍ଜ ଜିଲାର ୫ ବ୍ଲକରେ ଶୁକ୍ରବାର ପଞ୍ଚାୟତ ନିର୍ବାଚନର ଦ୍ୱିତୀୟ ପର୍ଯ୍ୟାୟ ଭୋଟ ଶେଷ ହୋଇଛି। ଶୁଳିଆପଦା ବ୍ଲକର କୁଜିଡିହୀ, ଫାନିଆ, ବାଘଡ଼ା ଓ ଦେଉଳି ପଞ୍ଚାୟତରେ ଅବ୍ୟବସ୍ଥାକୁ ନେଇ ଉତ୍ତେଜନା ଦେଖାଦେଇଛି। ଭୋଟର ତାଲିକାରେ ନଁା ନ ଥିବାରୁ ଦୁଇଟି ବୁଥ୍ର ଜନସାଧାରଣ ମୁଖ୍ୟ ଫାଟକରେ ତାଲା ପକାଇ ଧାରଣା ଦେଇଥିଲେ। ଅସନବଣୀ ଗ୍ରାମବାସୀ ମୌଳିକ ସମସ୍ୟାକୁ ନେଇ ଭୋଟ ବର୍ଜନ କରିଥିବାରୁ ଖାଲି ବାକ୍ସ ନେଇ ପୋଲିଂ ଅଧିକାରୀମାନେ ନିରାଶ ହୋଇ ଫେରିଛନ୍ତି। ସେହିପରି ଦୁଇଟି ବୁଥ୍ରେ ବାଲଟ ପେପରରେ ସରପଞ୍ଚ ପ୍ରାର୍ଥୀଙ୍କ ଚିହ୍ନ ନ ଥିବାରୁ ଗ୍ରାମବାସୀ ଭୋଟ୍ ଦେଇପାରି ନାହାନ୍ତି। ଏହାକୁ କେନ୍ଦ୍ରକରି ଉତ୍ତେଜନା ଦେଖା ଦେବାରୁ ପୋଲିସ ପହଞ୍ଚି ବୁଝାଶୁଝା କରିବା ପରେ ପରିସ୍ଥିତି ସ୍ବାଭାବିକ ହୋଇଥିଲା। ଉକ୍ତ ଦୁଇ ବୁଥ୍ରେ ସରପଞ୍ଚ ପଦବୀ ନିମନ୍ତେ ସାନି ନିର୍ବାଚନ କରାଯିବ ବୋଲି ଜିଲା ପଞ୍ଚାୟତ ଅଧିକାରୀ ଭଗବାନ ଗୌଡ଼ ପ୍ରକାଶ କରିଛନ୍ତି। ଜିଲାର ୨୬ ବ୍ଲକ ମଧ୍ୟରୁ ୧୨ଟିରେ ଦୁଇଟି ପର୍ଯ୍ୟାୟରେ ନିର୍ବାଚନ ଶେଷ ହୋଇଛି। କପ୍ତିପଦା, ବାରିପଦା, ବେତନଟୀ, ଶୁଳିଆପଦା ଓ ସାରସକଣାରେ ଦ୍ୱିତୀୟ ପର୍ଯ୍ୟାୟ ମତଦାନ ହୋଇଛି। ଶୁଳିଆପଦା ବ୍ଲକର ବାଘଡ଼ା ପଞ୍ଚାୟତ ମହୁଲକୁଣ୍ଡିଆ ଗ୍ରାମର ୧୩ ନଂ. ବୁଥ୍ ଓ ଦେଉଳି ପଞ୍ଚାୟତ ବେଢ଼ି ଗ୍ରାମର ୧୨ନଂ. ବୁଥ୍ରେ ସରପଞ୍ଚ ଭୋଟ୍କୁ ସ୍ଥଗିତ ରଖାଯାଇଛି। ଦୁଇ ବୁଥ୍ରେ ପୃଥକ୍ ଭାବେ ୭ ଓ ୮ଜଣ ସରପଞ୍ଚ ପ୍ରାର୍ଥୀ ରହିଛନ୍ତି। ପୋଲିଂ ଅଧିକାରୀ ପ୍ରାର୍ଥୀ ତାଲିକାକୁ ସ୍ବତନ୍ତ୍ର ଦୃଷ୍ଟି ଦେଇ ନ ଥିଲେ। ବାଲଟ ପେପରକୁ ଠିକ୍ ସଂଖ୍ୟକ ପ୍ରାର୍ଥୀଙ୍କ ଚିହ୍ନ ନ ଦେଖି ୪ ଜଣଙ୍କ ଚିହ୍ନ ରଖି ଅବଶିଷ୍ଟ ଭାଙ୍ଗି ଦେଇ ଭୋଟରମାନଙ୍କୁ ଦିଆଯାଇଥିଲା। ବାଲଟ ପେପର ପ୍ରଦାନରେ ତ୍ରୁଟି ଯୋଗୁ ଭୋଟ ଗ୍ରହଣ ସ୍ଥଗିତ ରଖାଯାଇଛି।
କୁଜିଡିହୀ ପଞ୍ଚାୟତର ୧୫ ନଂ. ବୁଥ୍ର ଅସନବଣୀ ଗ୍ରାମକୁ ପକ୍କାରାସ୍ତା ନ ଥିବାବେଳେ ବହୁ ଲୋକ ଆବାସ ଯୋଜନାରୁ ବଞ୍ଚିତ ହୋଇଛନ୍ତି। ଗଁାର ନାଁ ଏବେ ତହସିଲରୁ କଟି ଯାଇଥିବାରୁ ବହୁ ଲୋକ ଜମିପଟ୍ଟା ପାଇପାରି ନାହାନ୍ତି। ଗ୍ରାମର ଅନେକ ବୃଦ୍ଧାବୃଦ୍ଧ ଭତ୍ତା ପାଇ ନ ଥିବାବେଳେ ମୌଳିକ ସମସ୍ୟା ସମାଧାନ ପ୍ରତି କୌଣସି ଲୋକପ୍ରତିନିଧି ଦୃଷ୍ଟି ଦେଉନାହାନ୍ତି। ଏଥିରେ ଅସନ୍ତୋଷ ପ୍ରକାଶ କରି ୨୧୩ ଭୋଟର ମତଦାନ କରିନାହାନ୍ତି। ଫାନିଆ ପଞ୍ଚାୟତ କୁଣ୍ଡିଆଶୋଳ ଗ୍ରାମର ୨ ଓ ୩ ନଂ. ବୁଥ୍ର ତାଲିକାରେ ଅଧା ଭୋଟରଙ୍କ ନଁା ନ ଥିବାରୁ ଗ୍ରାମବାସୀ ଭୋଟ ଦେବାରୁ ବଞ୍ଚିତ ହୋଇଛନ୍ତି। ଉତ୍ତ୍ୟକ୍ତ ଲୋକେ ଭୋଟ ଗ୍ରହଣ କେନ୍ଦ୍ରର ମୁଖ୍ୟ ଫାଟକରେ ତାଲା ପକାଇ ଧାରଣାରେ ବସିଥିଲେ। ପୋଲିସ ପହଞ୍ଚି ବୁଝାଶୁଝା କରିଥିଲା। ତେବେ ଭୋଟ ଗ୍ରହଣ ସମୟ ଅତିବାହିତ ହେବା ପରେ ମଧ୍ୟ ବାକି ଥିବା ଭୋଟରଙ୍କୁ ମତଦାନ ପାଇଁ ସୁଯୋଗ ଦିଆଯାଇଥିଲା।
