ନୂଆଦିଲ୍ଲୀ,୧୩।୨: କଂଗ୍ରେସର ପୂର୍ବତନ ଅଧ୍ୟକ୍ଷ ତଥା ୬ ଥର ଲୋକ ସଭା ଏମ୍ପି ସୋନିଆ ଗାନ୍ଧୀ ଏଥର ରାଜ୍ୟ ସଭା ଯିବେ। ସେ ରାଜସ୍ଥାନରୁ ରାଜ୍ୟ ସଭା ଲାଗି ଦାବି ଉପସ୍ଥାପନ କରିବେ। ସୋନିଆ ଲୋକ ସଭା ନିର୍ବାଚନରେ ପ୍ରତିନ୍ଦ୍ୱନ୍ଦ୍ୱିତା ନ କରିବା ଯୋଗୁ ରାଏବରେଲି ଆସନ ଖାଲି ରହିବ। ଏଠାରୁ ଝିଅ ପ୍ରିୟଙ୍କା ଭଦ୍ରାଙ୍କୁ ନିର୍ବାଚନରେ ଛିଡ଼ା କରିବା ନେଇ ଚର୍ଚ୍ଚା ହେଉଛି। ଏସବୁ ମଧ୍ୟରେ ସୋନିଆ କାହିଁକି ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହାପଛରେ ୩ଟି ପ୍ରମୁଖ କାରଣ ଥିବା କୁହାଯାଉଛି।
୧୯୯୯ ରେ ଆମେଠୀରୁ ଲୋକ ସଭା ନିର୍ବାଚନରେ ଜିତି କଂଗ୍ରେସ ଅଧ୍ୟକ୍ଷ ଭାବରେ ସଂସଦୀୟ ରାଜନୀତି ଆରମ୍ଭ କରିଥିଲେ ସୋନିଆ। ୨୦୦୪ ମସିହାରୁ ଏଯାବତ ସେ କ୍ରମାଗତ ଭାବରେ ରାଏବରେଲୀର ଏମ୍ପି ରହିଆସିଛନ୍ତି। ଯଦିଓ ଏଥର ତାଙ୍କୁ ରାଜ୍ୟ ସଭାରୁ ପଠାଇବା ନେଇ ଗାନ୍ଧୀ ପରିବାରରେ ସହମତି ପ୍ରକାଶ ପାଇଛି। ସୋନିଆ ଗାନ୍ଧୀ ହିମାଚଳ କିମ୍ବା ରାଜସ୍ଥାନରୁ ନାମାଙ୍କନ ଦାଖଲ କରିବାକୁ ପ୍ରସ୍ତୁତ ହେଉଛନ୍ତି।
୩ କାରଣ ଯାହାକି ସୋନିଆଙ୍କୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାରେ ବାଧା ଦେଉଛି:
୧. ସୋନିଆ ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା ନ କରିବାର ସବୁଠାରୁ ବଡ କାରଣ ହେଉଛି ତାଙ୍କ ବୟସ ଏବଂ ଅସୁସ୍ଥତା। ସେ ରାଏବରେଲି ଯିବାକୁ ସକ୍ଷମ ନୁହନ୍ତି। ନିକଟରେ ସେ ରାଏବରେଲିର କର୍ମକର୍ତ୍ତାଙ୍କୁ ଏକ ବାର୍ତ୍ତା ପଠାଇଥିଲେ ଯେ ସେ ନିର୍ବାଚନମଣ୍ଡଳୀକୁ ଯାଇପାରିବେ ନାହିଁ କିମ୍ବା ସେଠାକାର ଲୋକଙ୍କୁ ଭେଟିବାକୁ ମଧ୍ୟ ସକ୍ଷମ ନୁହନ୍ତି। ତେଣୁ ସେ ବିବେକ ଦୃଷ୍ଟିରୁ ଏଠାରୁ ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଚାହୁଁନାହାନ୍ତି।
୨- ଦ୍ୱିତୀୟ କାରଣ ହେଉଛି ରାହୁଲ ଗାନ୍ଧୀଙ୍କ ଇଚ୍ଛା। କହିବାର ଅର୍ଥ ରାହୁଲ ନିଜେ, ସୋନିଆ ଏବଂ ଭଉଣୀ ପ୍ରିୟଙ୍କା ଅର୍ଥାତ ପରିବାରର ସମସ୍ତ ତିନିଜଣ ସଦସ୍ୟ ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରନ୍ତୁ ବୋଲି ଚାହୁଁନାହାନ୍ତି। ଏହା ଦେଶବାସୀଙ୍କୁ ଭଲ ବାର୍ତ୍ତା ପଠାଇବ ନାହିଁ ବୋଲି ସେ ବିଶ୍ୱାସ କରନ୍ତି।
୩- ଯଦି ସୋନିଆ ଲୋକ ସଭା ପରିବର୍ତ୍ତେ ରାଜ୍ୟ ସଭାର ସଦସ୍ୟ ରୁହନ୍ତି, ତେବେ ବରିଷ୍ଠତା ଦୃଷ୍ଟିରୁ ୧୦ ଜନପଥରେ ଥିବା ବଙ୍ଗଳାକୁ ତାଙ୍କୁ ବଣ୍ଟନ କରାଯିବ। ଏଣୁ ଯଦି ସୋନିଆ ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା ନ କରନ୍ତି, ତେବେ ତାଙ୍କୁ ରାଜ୍ୟସଭାକୁ ପଠାଯିବା ଉଚିତ ବୋଲି ଗାନ୍ଧୀ ପରିବାର ଚାହାନ୍ତି।
କହିରଖୁଛୁ, ରାଜସ୍ଥାନ କଂଗ୍ରେସ କମିଟିର ପ୍ରସ୍ତାବ ଉପରେ ସୋନିଆଙ୍କୁ ରାଜସ୍ଥାନରୁ ରାଜ୍ୟ ସଭାକୁ ପଠାଇବା ପ୍ରସ୍ତାବ ଉପରେ ମଧ୍ୟ ଆଲୋଚନା ଚାଲିଛି। ଗଣମାଧ୍ୟମ ସହ କଥାବାର୍ତ୍ତା ବେଳେ କଂଗ୍ରେସ ସାଧାରଣ ସମ୍ପାଦକ ରଣଦୀପ ସିଂ ସୁରଜେୱାଲା ଏହା ମଧ୍ୟ କହିଛନ୍ତି ଯେ ଦଳର ସଭାପତି ମଲ୍ଲିକାର୍ଜୁନ ଖାର୍ଗେ ଏହା ଉପରେ ନିଷ୍ପତ୍ତି ନେବେ। ଦଳ ନିଷ୍ପତ୍ତି ନେବା ମାତ୍ରେ ଏହାର ସୂଚନା ଦିଆଯିବ।
