ନୂଆଦିଲ୍ଲୀ, ୩।୧୦: ଉତ୍ତରପ୍ରଦେଶ ହାଥରସ୍ରେ ଘଟିଥିବା ବଳାତ୍କାର ଘଟଣା ନେଇ ଏବେ ଦେଶରେ ରାଜନୈତିକ ସ୍ଥିତି ସରଗରମ ହେବାରେ ଲାଗିଛି। ଭାଜପା ଏବଂ କଂଗ୍ରେସ ଏନେଇ ପରସ୍ପର ଉପରକୁ କାଦୁଅ ଫିଙ୍ଗା ଜାରି ରଖିଛନ୍ତି। ପୀଡ଼ିତା ପରିବାରଙ୍କୁ ନ୍ୟାୟ ମିଳିବା ତ ଦୂର କଥା, ମାତ୍ର ଏହି ମାମଲାରୁ ରାଜନୈତିକ ଦଳ ଗୁଡ଼ିକ ନିଜ ନିଜ ଫାଇଦା ପାଇବା ଲାଗି ଅଣ୍ଟା ଭିଡ଼ିବା ଆରମ୍ଭ କରିଛନ୍ତି। କଂଗ୍ରେସ ପକ୍ଷରୁ ରାହୁଲ ଗାନ୍ଧୀ ପୀଡ଼ିତା ପରିବାର ସଦସ୍ୟଙ୍କୁ ଭେଟିବା ଉଦ୍ୟମ ନେଇ ଭାଜପା କହିଛି ଯେ, ରାଜସ୍ଥାନରେ ବଳାତ୍କାର ମାମଲା ଦେଶରେ ସର୍ବାଧିକ। ଏପରିସ୍ଥଳେ କଂଗ୍ରେସ ଉତ୍ତରପ୍ରଦେଶ ନ ଯାଇ ରାଜସ୍ଥାନ ମୁହାଁ ହେବା ଆବଶ୍ୟକ। ରାଜନୈତିକ ଦଳ ମଧ୍ୟରେ ବଳାତ୍କାର ମାମଲାକୁ ନେଇ ଏଭଳି ପରସ୍ପର ବିରୋଧୀ ମନ୍ତବ୍ୟ ଯୋଗୁ ପୀଡ଼ିତା ପରିବାରଙ୍କୁ ନ୍ୟାୟ ମିଳିବା ନେଇ ସନ୍ଦେହ ସୃଷ୍ଟି ହୋଇଛି। ୨୦୧୯ରେ ଦେଶରେ ୩୨ ହଜାର ୩୩ ବଳାତ୍କାର ମାମଲା ଘଟିଥିଲା। ସେଥିମଧ୍ୟରେ ରାଜସ୍ଥାନରେ ସର୍ବାଧିକ ୫ ହଜାର ୯୯୭ ଘଟଣା ଘଟିଥିଲା। ଏହାପଛକୁ ଉତ୍ତରପ୍ରଦେଶ ରହିଥିଲା। ଏଠାରେ ୩ ହଜାର ୬୫ ଘଟଣା ଘଟିଥିଲା। ସେହିପରି ମଧ୍ୟପ୍ରଦେଶରେ ୨ ହଜାର ୪୮୫, ମହାରାଷ୍ଟ୍ରରେ ୨ ହଜାର ୨୯୯ ଏବଂ କେରଳରେ ୨ ହଜାର ୨୩ଟି ଏଭଳି ଘଟଣା ଘଟିଥିଲା ବୋଲି ସରକାରୀ ରିପୋର୍ଟରେ ପ୍ରକାଶ ପାଇଛି। ଏହି ରିପୋର୍ଟକୁ ନେଇ ଏବେ ରାଜନୈତିକ ଦଳଗୁଡ଼ିକ ପୀଡ଼ିତା ପରିବାରଙ୍କୁ ନ୍ୟାୟ ଦେବା ବଦଳରେ ପରସ୍ପର ମଧ୍ୟରେ ଲଢ଼େଇ ଆରମ୍ଭ କରିଛନ୍ତି। ସୂଚନାଯୋଗ୍ୟ, ୨୦୧୫ରୁ ୨୦୧୯ ଗତ ୫ ବର୍ଷ ମଧ୍ୟରେ ଦେଶରେ ମୋଟ ଲକ୍ଷେ ୭୧ ହଜାର ୫୪୬ଟି ବଳାତ୍କାର ଘଟଣା ଘଟିଛି। ସେଥିମଧ୍ୟରୁ ୨୦୧୯ରେ ୩୨ ହଜାର ୩୩ ବଳାତ୍କାର ମାମଲା ଘଟିଥିବାବେଳେ ୨୦୧୮ରେ ୩୩ ହଜାର ୩୫୬, ୨୦୧୭ରେ ୩୨ ହଜାର ୫୫୯, ୨୦୧୬ରେ ୩୮ ହଜାର ୯୪୭ ଏବଂ ୨୦୧୫ରେ ୩୪ ହଜାର ୬୫୧ଟି ଘଟଣା ଘଟିଛି।
