ବରଗଡ଼,୨୫।୭(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ନିଶା କାରବାର ଥମିବା ନାଁ ନେଉନାହିଁ। ତେବେ କିଛି ପୋଲିସ କର୍ମଚାରୀ ନିଶା ବେପାରୀଙ୍କ ସହିତ ସମ୍ପର୍କ ରଖିଥିବା ଯୋଗୁ ଏଭଳି କାରବାରକୁ ଜିଲାରେ ଦମନ କରାଯାଇ ପାରୁନାହିଁ ବୋଲି ଶୁକ୍ରବାର ବରଗଡ଼ ସାମ୍ବାଦିକ ସଂଘ ସଭାକକ୍ଷରେ ଅନୁଷ୍ଠିତ ଖବରଦାତା ସମ୍ମିଳନୀରେ ଏକଦା ପୋଲିସ୍ ଇନ୍ଫର୍ମର ଭାବେ କାର୍ଯ୍ୟ କରିଥିବା ଏମ୍. ଦୁର୍ଗାପ୍ରସାଦ କହିଛନ୍ତି।
ଖବରଦାତା ସମ୍ମିଳନୀରେ ଦୁର୍ଗାପ୍ରସାଦ କହିଥିଲେ, ଦୀର୍ଘ ୧୨ବର୍ଷ ହେଲା ସେ ପୋଲିସ ଇନ୍ଫର୍ମର କାର୍ଯ୍ୟ କରିଆସିଛନ୍ତି। ଜିଲାରେ ଚାଲିଥିବା ନିଶା କାରବାର ଉପରେ ତାଙ୍କ ପାଖରେ ଅନେକ ସୂଚନା ରହିଛି। ତାଙ୍କ ସୂଚନାକୁ ଆଧାର କରି ବିଗତ ଦିନରେ ପୋଲିସ ଅନେକ ସଫଳତା ମଧ୍ୟ ପାଇଛି। ବର୍ତ୍ତମାନ ନିଶା ବେପାରୀଙ୍କ ସହିତ ସମ୍ପର୍କ ରଖିଥିବା କିଛି ପୋଲିସ୍ କର୍ମଚାରୀ ତାଙ୍କୁ ଫସାଇବାକୁ ଉଦ୍ୟମ କରୁଛନ୍ତି ବୋଲି ସେ କହିଛନ୍ତି। ସେ କିଛି ନିର୍ଦ୍ଦିଷ୍ଟ ପୋଲିସ କର୍ମଚାରୀଙ୍କ ନାମ ଉଲ୍ଲେଖ କରି ସେମାନେ କଲେକ୍ସନ ଏଜେଣ୍ଟ ସାଜିଥିବା ଏବଂ ନିଶା ବେପାରୀଙ୍କଠାରୁ ମାସିକିଆ ବଟି ଅସୁଲ କରୁଥିବା ଅଭିଯୋଗ କରିଛନ୍ତି। ଏ ନେଇ ସେ ତତ୍କାଳୀନ ଏସ୍ପି ପ୍ରହଲ୍ଲାଦ ସହାୟ ମୀନାଙ୍କଠାରେ ଅଭିଯୋଗ କରିବା ପରେ ସମ୍ପୃକ୍ତ ୨ପୋଲିସ କର୍ମଚାରୀଙ୍କୁ ବରଗଡ଼ ଟାଉନ ଥାନାରୁ ଅନ୍ୟତ୍ର ବଦଳି କରାଯାଇଥିଲା। କିନ୍ତୁ ଏସ୍ପି ମୀନାଙ୍କ ବଦଳିର ୧୦ଦିନ ନ ହେଉଣୁ ସମ୍ପୃକ୍ତ ୨କର୍ମଚାରୀଙ୍କୁ ପୁଣି ବରଗଡ଼ ଟାଉନ ଥାନାରେ ଅବସ୍ଥାପିତ କରାଯାଇଛି ଏବଂ ସେମାନଙ୍କ ମଧ୍ୟରୁ ଜଣେ ପୂର୍ବଭଳି କଲେକ୍ସନ ଏଜେଣ୍ଟ ସାଜିଥିବା ପ୍ରସାଦ ଅଭିଯୋଗ କରିଛନ୍ତି। ଏପରିକି ୨ଦିନ ତଳେ ବ୍ରାଉନସୁଗାର ମାମଲାରେ ଗିରଫ ହୋଇଥିବା ଜଣେ ଅଭିଯୁକ୍ତ ଟାଉନ ଥାନାରେ କାର୍ଯ୍ୟରତ ଅନ୍ୟ ଜଣେ ପୋଲିସ କର୍ମଚାରୀଙ୍କ ସହିତ ଏକାଠି ହୋଇଥିବା ଫଟୋ ମଧ୍ୟ ପ୍ରସାଦ ଦେଖାଇଥିଲେ।
ଉଲ୍ଲେଖନୀୟ, ଜିଲାରେ ପୋଲିସ-ଅପରାଧୀ ସମ୍ପର୍କ ନୂଆ ନୁହେଁ। ବିଗତ କିଛିବର୍ଷ ଆଗରୁ ଅମ୍ବାଭୋନା ଥାନାର ତତ୍କାଳୀନ ଥାନାଧିକାରୀଙ୍କ ସମ୍ପର୍କ ଗଞ୍ଜେଇ ବେପାରୀଙ୍କ ସହିତ ରହିଥିବା ଜଣାପଡ଼ିବା ପରେ ତାଙ୍କ ବିରୋଧରେ ମାମଲା ରୁଜୁ ସହିତ ତାଙ୍କୁ ନିଲମ୍ବନ କରାଯାଇଥିଲା। ସେହିପରି କିଛିମାସ ତଳେ ଝାରବନ୍ଧ ଥାନାରେ ପୋଲିସ୍-ଗଞ୍ଜେଇ ବେପାରୀଙ୍କ ମଧ୍ୟରେ ଚାଲିଥିବା ଡିଲ୍ ଧରାପଡ଼ିବା ପରେ ସମ୍ପୃକ୍ତ ପୋଲିସ ଅଧିକାରୀ, କର୍ମଚାରୀଙ୍କୁ ନିଲମ୍ବନ କରାଯାଇଥିଲା। ଏହାପୂର୍ବରୁ ଜିଲାରେ ଗାଡ଼ିଚୋରି ର଼୍ୟାକେଟ୍ ମାମଲାରେ ଜଣେ ପୋଲିସ୍ ଏସ୍ଆଇଙ୍କୁ ଜେଲ୍ ଯିବାକୁ ପଡ଼ିଥିବାବେଳେ ସ୍ପେଶାଲ ସ୍କ୍ବାଡ୍ରେ ରହି ଲୋକଙ୍କୁ ଭୟଭୀତ କରି ଟଙ୍କା ନେବା ମାମଲାରେ ପୋଲିସ କର୍ମଚାରୀ ନିଲମ୍ବିତ ଏବଂ ଗିରଫ ହେବାର ନଜିର ରହିଛି। ଏବେ ଖୋଦ୍ ପ୍ରସାଦ ପୋଲିସ-ଅପରାଧୀ ସମ୍ପର୍କ ନେଇ ମୁହଁ ଖୋଲିବା ପରେ ଏହା ଆଗକୁ କିଭଳି ମୋଡ଼ ନେଉଛି, ତାହା ସମୟ କହିବ। ଏ ସମ୍ପର୍କରେ ବରଗଡ଼ ଟାଉନ ଥାନା ଆଇଆଇସି ଚିତ୍ତରଞ୍ଜନ ମେହେରଙ୍କୁ ପଚାରିବାରୁ ଦୁର୍ଗାପ୍ରସାଦଙ୍କ ଅଭିଯୋଗ ଉପରେ କିଛି କହିବାକୁ ମନା କରିଦେଇଥିଲେ। ପୋଲିସ ତାର କାମ ଠିକ୍ ଭାବେ ନିର୍ବାହ କରୁଛି ଏବଂ ଆଗକୁ ମଧ୍ୟ କରିଚାଲିବ ବୋଲି ମେହେର କହିଥିଲେ।
Dharitri – Odisha’s No.1 Odia Daily
