ଶ୍ରୀନଗର,୩ା୪: ଜମ୍ମୁ-କଶ୍ମୀରର କୁପଓ୍ବାଡ଼ା ଜିଲାରେ ୮ବର୍ଷର ନାବାଳିକାଙ୍କ ମୃତ୍ୟୁ ଘଟଣାର ପର୍ଦ୍ଦାଫାଶ ହୋଇଛି। ନାବାଳିକାଙ୍କ ବାପା ତାଙ୍କ ହତ୍ୟାକାରୀ ବୋଲି ପୋଲିସ ତଦନ୍ତରୁ ଜାଣିବାକୁ ପାଇଛି। ଅଭିଯୁକ୍ତ ୪୫ ବର୍ଷୀୟ ମହମ୍ମଦ ଇକ୍ବାଲଙ୍କୁ ପୋଲିସ ହତ୍ୟା ଅଭିଯୋଗରେ ଗିରଫ କରିଛି। ଏନେଇ ସୋମବାର ବରିଷ୍ଠ ପୋଲିସ ଅଧିକ୍ଷକ କୁପଓ୍ବାଡା ଯୁଗଲ ମନହାସ ଏକ ଖବରଦାତା ସମ୍ମିଳନୀ କରି ସୂଚନା ଦେଇଛନ୍ତି। ଘଟଣାର ତଦନ୍ତ ସମୟରେ ଇକ୍ବାଲ ନିଜ ଅପରାଧକୁ ସ୍ବୀକାର କରିଛନ୍ତି ବୋଲି ତଦନ୍ତକାରୀ ପୋଲିସ ଅଧିକାରୀ କହିଛନ୍ତି। ସୂଚନାଯୋଗ୍ୟ, ମାର୍ଚ୍ଚ ୨୯ରେ ଇକ୍ବାଲ ନିଜ ସ୍ତ୍ରୀଙ୍କ ସହ ଝଗଡ଼ା କରିବା ପରେ ସେ ଏକ ଛୁରି ନେଇ ଘରୁ ବାହାରିଯାଇଥିଲେ। ଆତ୍ମହତ୍ୟା ଉଦ୍ୟମ କରୁଥିବା ବେଳେ ତାଙ୍କୁ ଝିଅ ଅଟକାଇଥିଲେ। ତେବେ ୮ ବର୍ଷର ଝିଅ ତାଙ୍କ ପାଖ ଛାଡ଼ି ନ ଥିଲା। ଏପରିକି ଇକ୍ବାଲ ଝିଅକୁ ୧୦ଟଙ୍କା ଦେଇ ଟଫି କିଣିବାକୁ ଯିବାକୁ କହିଥିଲେ ମଧ୍ୟ ସେ ଯାଇ ନ ଥିଲା। ଫଳରେ ସେ ଆତ୍ମହତ୍ୟା କରି ନ ପାରି ଉତ୍କ୍ଷିପ୍ତ ହୋଇ ଇକ୍ବାଲ ଝିଅକୁ ଶ୍ୱାସରୁଦ୍ଧ କରି ହତ୍ୟା କରିବା ପରେ ତଣ୍ଟି କାଟିଦେଇଥିଲେ।
