କେସିଙ୍ଗା,୧୯।୮(ତୁମେଶ୍ୱର ସାହୁ): କେସିଙ୍ଗା ପୋଲିସ ଶନିବାର ୨ ଲୁଟେରାଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ କେସିଙ୍ଗା ୧୦ ନମ୍ବର ୱାର୍ଡରେ ରହୁଥିବା ଅନୁ ସୁନା(୨୨) ଏବଂ କଲମପୁର ଥାନା ମଣ୍ଡଳର ଇନ୍ଦ୍ରମଣୀ ନାଏକ(୨୮)।
ମିଳିଥିବା ସୂଚନା ମୁତାବକ, ନର୍ଲା ବ୍ଳକର ରାଣୀପଟା ଗ୍ରାମର ବସନ୍ତ ସା(୨୩) ବାହାର ରାଜ୍ୟକୁ ଦାଦାନ ଖଟିଯିବା ପାଇଁ କେସିଙ୍ଗା ଷ୍ଟେଶନରେ ଟ୍ରେନ୍କୁ ଅପେକ୍ଷା କରିଥିଲେ। ହେଲେ ସେ ଷ୍ଟେଶନ ବାହାରକୁ ଟିଫିନ ଖାଇବା ପାଇଁ ଯାଇଥିଲେ। ସେତିକିବେଳେ ୨ଜଣ ଯୁବକ ବସନ୍ତଙ୍କୁ ମାଡ଼ ମାରି ଧରିଥିବା ୧୧ ଶହ ଟଙ୍କା ଏବଂ ମୋବାଇଲ ଫୋନ ଛଡେଇ ଫେରାର ହୋଇଯାଇଥିଲେ।
ହେଲେ ଜଣେ ଯୁବକ ଏହାର ଏକ ଭିଡିଓ ପୋଲିସକୁ ପଠାଇ ୧୧୨କୁ ଫୋନ୍ କରି ଘଟଣା ସମ୍ପର୍କରେ ଜଣାଇଥିଲେ। ପୋଲିସ ତତ୍କ୍ଷଣାତ ପଦକ୍ଷେପ ନେଇଥିଲା। ପୋଲିସ ଟିମ୍ ଅଭିଯୁକ୍ତ ଅନୁଙ୍କୁ କେସିଙ୍ଗା ହାଇସ୍କୁଲ ନିକଟରୁ ଧରିବାରେ ସକ୍ଷମ ହୋଇଥିଲା। ଏପରି କି ଏକ ଘରୋଇ ଯାତ୍ରୀବାହୀ ବସ୍ରେ ଚଢି ଫେରାର ମାରୁଥିବା ଇନ୍ଦ୍ରମଣୀଙ୍କୁ ପୋଲିସ ତ୍ରିମୂର୍ତ୍ତି ଛକରୁ ଧରିଥିଲେ। ଲୁଟର ଶିକାର ହୋଇଥିବା ବସନ୍ତଙ୍କ ଅଭିଯୋଗକୁ ଭିତ୍ତି କରି ପୋଲିସ ଗିରଫ ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିଲା। ଏନେଇ କେସିଙ୍ଗା ଥାନା ପୋଲିସ ଏକ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚଲାଇଛି।
