ନିଶ୍ଚିନ୍ତକୋଇଲି,୩୦।୫(ସ୍ବ.ପ୍ର.): କଟକ ଜିଲା ନିଶ୍ଚିନ୍ତକୋଇଲି ବ୍ଲକ ନତକାଇ ପଞ୍ଚାୟତରେ ଏକ ପୋଖରୀରେ କୌଣସି ଦୁର୍ବୃତ୍ତ ବିଷ ପକାଇ ଲକ୍ଷାଧିକ ଟଙ୍କାର ମାଛ ମାରିଦେଇଥିବା ଅଭିଯୋଗ ହୋଇଛି। ଏହାକୁ ଭିତ୍ତି କରି ପୋଲିସ ଥାନାରେ ମାମଲା (ନଂ. ୯୬/୨୩) ରୁଜୁ କରି ତଦନ୍ତ ଆରମ୍ଭ କରିଛି।
ନତକାଇ ପଞ୍ଚାୟତ ବାଘୁଆ ପୋଖରୀକୁ ସ୍ଥାନୀୟ ଗ୍ରାମର ମା’ବୁଢୀ ଜାଗୁଳାଇ ସ୍ବୟଂ ସହାୟିକା ଗୋଷ୍ଠୀର ସଭ୍ୟମାନେ ନିଲାମରେ ନେଇ ମାଛଚାଷ କରିଥିଲେ। ମହିଳା ସ୍ବୟଂ ସହାୟିକା ଗୋଷ୍ଠୀ ଋଣ କରି ଏହି ପୋଖରୀରେ ମାଛଚାଷ କରିଥିଲେ। ତେବେ କୌଣସି ବ୍ୟକ୍ତି ପ୍ରତିହିଂସା ପରାୟଣ ହୋଇ ଏହି ପୋଖରୀରେ ବିଷ ପକାଇ ଦେଇଥିବା ଅଭିଯୋଗ ହୋଇଛି। ଫଳରେ ପୋଖରୀରେ ମାଛ ସମେତ ସାପ ଓ ଅନ୍ୟାନ୍ୟ ଜୀବଜନ୍ତୁ ମରି ଭାସୁଥିବା ଦେଖିବାକୁ ମିଳିଛି। ଏନେଇ ମହିଳା ସ୍ବୟଂ ସହାୟିକା ଗୋଷ୍ଠୀର ସଭାନେତ୍ରୀ ସ୍ବର୍ଣ୍ଣଲତା ସେନାପତି ନିଶ୍ଚିନ୍ତକୋଇଲି ଥାନାରେ ଲିଖିତ ଅଭିଯୋଗ କରିଛନ୍ତି।
