ବାଲିଚନ୍ଦ୍ରପୁର,୧୮ା୫(ସ୍ବ.ପ୍ର.): ଚଣ୍ଡିଖୋଲ-ପାରାଦୀପ ୫୩ନଂ. ଜାତୀୟ ରାଜପଥର ଯାଜପୁର-କେନ୍ଦ୍ରାପଡ଼ା ଜିଲା ସୀମାନ୍ତ ଇଲାକାରେ ବ୍ୟାପକ ଚୋରା ପେଟ୍ରୋଲ, ଡିଜେଲ କାରବାର ହେଉଥିବା ଅଭିଯୋଗ ହୋଇଛି। ଯାଜପୁର ଜିଲାର ଶେଷ ଭାଗ ହେଉଛି ପାରିପଲେଇ ଛକ ଓ କେନ୍ଦ୍ରାପଡ଼ା ଜିଲାର ଆରମ୍ଭ ସ୍ଥାନଟି ହେଉଛି ପଞ୍ଚୁପାଣ୍ଡବ ଛକ। ପଞ୍ଚୁପାଣ୍ଡବ ଛକଟି ଡେରାବିଶ ଥାନା ଅଧୀନରେ ରହିଥିବାବେଳେ ପାରିପଲେଇ ଅଞ୍ଚଳଟି ବାଲିଚନ୍ଦ୍ରପୁର ଥାନା ଅଧୀନରେ ରହିଛି। ପଞ୍ଚୁପାଣ୍ଡବ ଛକଠାରୁ ଳକ୍ଷ୍ମୀନାରାୟଣପୁର ପର୍ଯ୍ୟନ୍ତ ଡେରାବିଶ ଥାନା ଅଞ୍ଚଳରେ ବହୁଳମାତ୍ରାରେ ଏହି ଚୋରା ତେଲ କାରବାର ହେଉଛି। ପଞ୍ଚୁପାଣ୍ଡବ ଛକ ଉପରେ ରହିଛି ଏକ ହୋଟେଲ। ଏହି ହୋଟେଲ ପଛପଟେ ଦୈନିକ ୧୦/୨୦ ତେଲ ବୋଝେଇ ଟ୍ୟାଙ୍କର ଘଣ୍ଟାକୁ ଘଣ୍ଟା ପସୁଛନ୍ତି ବାହାରୁଛନ୍ତି। ହୋଟେଲର ନା କେବଳ ଲେଖାଯାଇଛି। ମାତ୍ର ପଛପଟେ ଟ୍ୟାଙ୍କରରୁ ବିପୁଳ ପେଟ୍ରୋଲ, ଡିଜେଲ ବାହାର କରାଯାଉଛି। ଡେରାବିଶ ପୋଲିସ ପାଟ୍ରୋଲିଂ କରୁଥିଲେ ମଧ୍ୟ ଦେଖି ନ ଦେଖିଲା ପରି ଚାଲିଯାଉଛି। ପରୋକ୍ଷରେ ପୋଲିସ ସୁରକ୍ଷା ବଳୟରେ ଏହି କାରବାର ହେଉଥିବା ପଞ୍ଚୁପାଣ୍ଡବ ଛକରେ ଚର୍ଚ୍ଚା ହେଉଛି। ଅପରପକ୍ଷେ ବାଲିଚନ୍ଦ୍ରପୁର ଥାନା ଇଲାକାର ପାରିପଲେଇ ଛକ ଗୋବରୀ ନଦୀକୂଳ ନିକଟରେ ଉକ୍ତ ଗ୍ରାମର କେତେଜଣ ଯୁବକ କ୍ୟାବିନ ପକାଇ ଜଗିବସୁଛନ୍ତି ତେଲ ବୋଝେଇ ଟ୍ୟାଙ୍କରକୁ। ଯାହାର ଯେଉଁ ଗାଡ଼ି ସହିତ ଯୋଗାଯୋଗ ଅଛି ସେମାନେ ସେହି କ୍ୟାବିନ ପାଖରେ ଅଟକି ରହି ପେଟ୍ରୋଲ, ଡିଜେଲ ଦିନ ଦ୍ୱିପ୍ରହରରେ କାଢୁଥିବା ଦେଖିବାକୁ ମିଳୁଛି।
କିଛି ଦିନ ବାଲିଚନ୍ଦ୍ରପୁର ଥାନା ଅଞ୍ଚଳରେ ଏହି କାରବାର ବନ୍ଦ ଥିବାବେଳେ ଏବେ ପୁଣି ସକ୍ରିୟ ହୋଇଉଠିଛନ୍ତି ମାଫିଆ। ଏମାନେ ଟ୍ୟାଙ୍କରରୁ ବ୍ୟାରେଲ ଯୋଗେ ତେଲ କାଢିନେଇ ନିଜ ଗାଁ ପାରିପଲେଇରେ ଗଚ୍ଛିତ ରଖୁଛନ୍ତି। ଗ୍ରାମାଞ୍ଚଳରେ ଯେଉଁଠି ତେଲର ଆବଶ୍ୟକତା ପଡ଼େ ଏହି ମାଫିଆମାନେ ସେଠାରେ ନେଇ ପହଞ୍ଚାଇଦେଇ ଆସୁଛନ୍ତି। ସେହିପରି ବାଲିଚନ୍ଦ୍ରପୁର ଥାନା କଟିକଟା ଛକ ଜାତୀୟ ରାଜପଥ କଡ଼ରେ ଏକ ବରଗଛ ମୂଳେ ଥିବା ପରିତ୍ୟକ୍ତ ଢାବାରେ ମଧ୍ୟଏହି କାରବାର ଚାଲୁଥିବା ଦେଖାଯାଉଛି। ଏମାନଙ୍କ ନିକଟରେ ଟ୍ୟାଙ୍କରୁ ତାଲା ଖୋଲିବାର ଅବିକଳ ନକଲ ଚାବି ରହିଥିବାରୁ ସହଜ ଉପାୟରେ ତେଲ କାଢିପାରୁଛନ୍ତି ବୋଲି ଶୁଣିବାକୁ ମିଳୁଛି। ଏଥିପାଇଁ ତୈଳକମ୍ପାନୀ, ଟାଙ୍କି ଓ ଟ୍ୟାଙ୍କର ମାଲିକମାନେ କ୍ଷତି ସହୁଥିବା ପ୍ରକାଶ କରିଛନ୍ତି। ଏ ସମ୍ପର୍କରେ ବାଲିଚନ୍ଦ୍ରପୁର ଓ ଡେରାବିଶ ଥାନା ଅଧିକାରୀଙ୍କ ପ୍ରତିକ୍ରିୟା ମିଳି ପାରିନାହିଁ। ତେଣୁ ଏହି ଚୋରା ତେଲ କାରବାର ବନ୍ଦ ପାଇଁ ଉଭୟ ଜିଲାର ଏସ୍ପି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।
