ନୂଆଦିଲ୍ଲୀ,୧୮।୨: କେନ୍ଦ୍ର ସରକାର ବିଭିନ୍ନ ବର୍ଗର ଲୋକଙ୍କ ପାଇଁ କଲ୍ୟାଣକାରୀ ଯୋଜନା ଚଳାଉଛନ୍ତି। ଏବେ ସାରା ଦେଶର ଅସଂଗଠିତ ଶ୍ରମିକଙ୍କ ପାଇଁ ଏକ ବଡ଼ ଖୁସିଖବର ଆସିଛି। ଭାରତରେ ଏପରି ଅନେକ ଲୋକ ଅଛନ୍ତି ଯେଉଁମାନଙ୍କର ଭବିଷ୍ୟତ ସେମାନଙ୍କର ବର୍ତ୍ତମାନର ଆୟ ଆଧାରରେ ନିର୍ଣ୍ଣୟ କରାଯାଏ। ଏପରି ଲୋକଙ୍କ ପାଇଁ ସରକାର ୨୦୧୯ ମସିହାରେ ପ୍ରଧାନମନ୍ତ୍ରୀ ଶ୍ରମ ଯୋଗୀ ମାନଧନ ଯୋଜନା ଆରମ୍ଭ କରିଥିଲେ। ଏହି ଯୋଜନା ମାଧ୍ୟମରେ ଶ୍ରମିକମାନଙ୍କୁ ପ୍ରତି ମାସରେ ପେନସନ ଦିଆଯାଏ। ଏଠାରେ ଆମେ ଆପଣଙ୍କୁ କହିବାକୁ ଯାଉଛୁ ଯେ କେଉଁ ଶ୍ରମିକ ଏହି ଯୋଜନାର ଲାଭ ପାଇପାରିବେ ? ସେମାନେ ଏହି ଯୋଜନା ପାଇଁ କିପରି ଆବେଦନ କରିବେ?
ପ୍ରଧାନମନ୍ତ୍ରୀ ଶ୍ରମ ଯୋଗୀ ମାନଧନ ଯୋଜନାର ଲାଭ ମୁଖ୍ୟତଃ ଦେଶର ଅସଂଗଠିତ କ୍ଷେତ୍ରରେ କାମ କରୁଥିବା ଶ୍ରମିକମାନେ ପାଇଥାନ୍ତି। ଏହି ଯୋଜନା ମାଧ୍ୟମରେ ଶ୍ରମିକମାନଙ୍କୁ ପ୍ରତି ମାସରେ ୩୦୦୦ ଟଙ୍କା ପର୍ଯ୍ୟନ୍ତ ପେନସନ ଦିଆଯାଇଥାଏ। ହେଲେ ଶ୍ରମିକମାନଙ୍କୁ ପ୍ରତି ମାସରେ ଏହି ଯୋଜନା ପାଇଁ contribution (ଅବଦାନ) ଜମା କରିବାକୁ ପଡିବ। ସରକାର ମଧ୍ୟ ଶ୍ରମିକମାନଙ୍କ ଦ୍ୱାରା ଦିଆଯାଇଥିବା ଅବଦାନର ସମାନ ପରିମାଣ ପ୍ରଦାନ କରିଥାନ୍ତି।
ପ୍ରଧାନମନ୍ତ୍ରୀ ଶ୍ରମ ଯୋଗୀ ମାନଧନ ଯୋଜନାର ଲାଭ ମୁଖ୍ୟତଃ ଦୋକାନୀ, ରିକ୍ସା ଚାଳକ, ମୋଚି, ଦର୍ଜୀ, ଧୋବା ଏବଂ ନାପିତ ଭଳି ବୃତ୍ତିରେ କାମ କରୁଥିବା ଲୋକଙ୍କୁ ଦିଆଯିବ। ଆପଣଙ୍କୁ ଜଣାଇ ଦେଉଛୁ ଯେ ଏହି ଯୋଜନାର ଲାଭ ପାଇବା ପାଇଁ ବୟସ ସୀମା ୧୮ ରୁ ୪୦ ବର୍ଷ ପର୍ଯ୍ୟନ୍ତ ସ୍ଥିର କରାଯାଇଛି। ଏହି ଯୋଜନାରେ contributionକୁ ଅତି କମରେ ୨୦ ବର୍ଷ ପାଇଁ ଜମା କରିବାକୁ ପଡିବ। ନିବେଶ ଆଧାରରେ ୬୦ ବର୍ଷ ବୟସ ପୂରଣ କରିବା ପରେ ଲୋକଙ୍କୁ ପ୍ରତି ମାସରେ ପେନସନ ଦିଆଯାଏ।
କିପରି ଆବେଦନ କରିବେ?
ପ୍ରଧାନମନ୍ତ୍ରୀ ଶ୍ରମ ଯୋଗୀ ମାନଧନ ଯୋଜନାରେ ଆବେଦନ କରିବାକୁ ଆପଣଙ୍କୁ ଆପଣଙ୍କର ନିକଟସ୍ଥ ସାଧାରଣ ସେବା କେନ୍ଦ୍ର (CSS) କୁ ଯିବାକୁ ପଡିବ। ଏହି ଯୋଜନା ପାଇଁ ଆବେଦନ କେବଳ ସାଧାରଣ ସେବା କେନ୍ଦ୍ରକୁ ଯାଇ କରାଯାଇପାରିବ। ଆବେଦନ କରିବା ପାଇଁ ଲୋକଙ୍କୁ ଆଧାର କାର୍ଡ, ପାନ୍ କାର୍ଡ ଏବଂ ବ୍ୟାଙ୍କ ଆକାଉଣ୍ଟ ପାସବୁକ୍ କିମ୍ବା ଚେକବୁକ୍ ଭଳି ଆବଶ୍ୟକୀୟ କାଗଜପତ୍ର ସାଙ୍ଗରେ ନେବାକୁ ପଡିବ। ଆବେଦନ ସଫଳ ହେବା ପରେ, ଆପଣଙ୍କୁ ଏକ ଶ୍ରମ ଯୋଗୀ କାର୍ଡ ପ୍ରଦାନ କରାଯିବ। ମନେରଖନ୍ତୁ, ପ୍ରତି ମାସରେ ଯୋଜନା ପାଇଁ ନିର୍ଦ୍ଧିଷ୍ଟ ପରିମାଣ ଆପଣଙ୍କ ବ୍ୟାଙ୍କ ଆକାଉଣ୍ଟରୁ କଟାଯିବ।
