ନୂଆଦିଲ୍ଲୀ,୧୨ ।୧: ସାରା ଦେଶରେ ଜାନୁୟାରୀ ୧୬ରୁ ଆରମ୍ଭ ହେବାକୁ ଯାଉଛି କରୋନା ଟିକାକରଣ ଅଭିଯାନ ଏହା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ପଷ୍ଟ କରିଛନ୍ତି ଯେ ପ୍ରଥମ ଭାଗରେ ସ୍ୱାସ୍ଥ୍ୟକର୍ମୀ ଓ ଫ୍ରଣ୍ଟଲାଇନ୍ ୱାରିୟର୍ସଙ୍କୁ ଟିକା ଦିଆଯିବ । ଏମିତି ୩ କୋଟି ଲୋକଙ୍କୁ ଟିକା ଦିଆଯିବା ପରେ ଅନ୍ୟମାନଙ୍କ କଥା ଚିନ୍ତା କରାଯିବ । ତେବେ ଏମାନଙ୍କ ମଧ୍ୟରେ କୌଣସି ଜନପ୍ରତିଦନିଧି ଜବରଦସ୍ତ ପ୍ରବେଶ କରିବାକୁ ଯେଭଳି ଚେଷ୍ଟା ନ କରନ୍ତି ବୋଲି ମୋଦି କହିଛନ୍ତି । ଏହାଦ୍ୱାରା ମୋଦି ସିଧାସିଧା କହିଛନ୍ତି ଯେ ଏମିତି କଲେ ଲୋକଙ୍କ ନିକଟକୁ ଖରାପ ସଙ୍କେତ ଯିବ । ପ୍ରତ୍ୟେକ୍ଷ ଭାବେ ବିଧାୟକ ଓ ଏମ୍ପିମାନଙ୍କୁ ପ୍ରଥମ ପର୍ଯ୍ୟାୟରେ ଟିକା ଦିଆଯିବ ନାହିଁ ବୋଲି ମୋଦି ଏକ ପ୍ରକାର ସ୍ପଷ୍ଟ କରିଛନ୍ତି । ସୂଚନାଯୋଗ୍ୟ, ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କୋଭିଡ ଟିକାକରଣ ଅଭିଯାନକୁ ନେଇ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଥିଲେ । ଏହି ସମୟରେ ପୁଡୁଚେରୀ ମୁଖ୍ୟମନ୍ତ୍ରୀ ବି ନାରାୟଣସ୍ୱାମୀ କହିଥିଲେ ଏମ୍ପି ଓ ବିଧାୟକଙ୍କୁ ପ୍ରାଥମିକତା ଆଧାରରେ କୋଭିଡ ଟିକା ଦେବା ଦରକାର । କାରଣ ସେମାନେ ନିଜ ନିଜ ନିର୍ବାଚନ ମଣ୍ଡଳି ଯାଇ ଲୋକଙ୍କ ସହ ମିଳାମିଶା କରୁଛନ୍ତି । ହେଲେ ଏହି ପ୍ରସ୍ତାବକୁ ମୋଦି ଗ୍ରହଣ କରି ନାହାଁନ୍ତି ।
