ଶାହାଜହନପୁର,୧୮ ।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଉତ୍ତର ପ୍ରଦେଶର ଶାହଜହାନପୁରରେ ଗଙ୍ଗା ଏକ୍ସପ୍ରେସ ୱେର ଶିଳାନ୍ୟାସ କରିଛନ୍ତି । ପାଖାପାଖି ୫୯୪ କିଲୋମିଟର ଲମ୍ବା ଏହା ୬ ଲେନ ବିଶିଷ୍ଟ ହେବ । ଏହି କାର୍ଯ୍ୟକ୍ରମରେ ସମ୍ବୋଧନ ଦେବା ଅବସରରେ ମୋଦି କହିଥିଲେ ଏହି ଏକ୍ସପ୍ରେସ ୱେ ମାଧ୍ୟମରେ ୟୁପିର ବିକାଶର ରାସ୍ତା ଖୋଲିବ । ମୋଦି ଆହୁରି ମଧ୍ୟ କହିଥିଲେ ମା’ ଗଙ୍ଗା ସମସ୍ତ ମଙ୍ଗଳ, ଉନ୍ନତି ପ୍ରଗତିର ସ୍ରୋତ । ମା’ ଗଙ୍ଗା ସବୁ ସୁଖ ଦେଇଥାଆନ୍ତି ଓ ସବୁ ଦୁଃଖ ହରଣ କରିଥାଆନ୍ତି । ସେହିପରି ଗଙ୍ଗା ଏକ୍ସପ୍ରେସ୍ ୱେ ଉତ୍ତର ପ୍ରଦେଶର ସମସ୍ତ ପ୍ରଗତିର ବାଟ ଫିଟାଇବ । ଆଜିର ଦିନ ଶହାଜହାନପୁର ପାଇଁ ଐତିହାସିକ ଦିନ । ପାଖାପାଖି ୬୦୦ କିଲୋମିଟର ଲମ୍ବ ଏହି ଏକ୍ସପ୍ରେସ ୱେ ପାଇଁ ୩୬ହଜାର କୋଟି ଟଙ୍କା ଖର୍ଚ୍ଚ କରାଯିବ ।
ଏହି ଅବସରରେ ମୋଦି କହିଥିଲେ, ପ୍ରଥମେ ଏମିତି ପରିଯୋଜନା କାଗଜରେ ଏଇଥିପାଇଁ ଆରମ୍ଭ ହେଉଥିଲା କି ସେମାନେ ସେମାନଙ୍କ ଟ୍ରେଜେରି ଭରୁଥିଲେ । ଏବେ ଏହା ୟୁପି ଜନତାଙ୍କ ଟଙ୍କା ବଞ୍ଚାଉଛି । ଆଜି ଡବଲ ଇଞ୍ଜିନ ସରକାରରେ ୟୁପିର ବୃଦ୍ଧି ହେଉଥିବା ସମାର୍ଥ୍ୟ ଆମେ ସମସ୍ତେ ଦେଖୁଛୁ । ପୂର୍ବଞ୍ଚଳ ଏକ୍ସପ୍ରେସ୍ ୱେ ଅବା ଦିଲ୍ଲୀ-ମେରଠ ଏକ୍ସପ୍ରେସ୍ୱେ, କୁଶିନଗର ଇଣ୍ଟର ନ୍ୟାଶନାଲ ଏୟାର ପୋର୍ଟ ହେଉ ଅବା ଡେଡିକେଟେଡ ଫ୍ରେଟ କରିଡର ଏ ସମସ୍ତ ଜନତାଙ୍କ ସେବା ପାଇଁ ସମର୍ପିତ । ସମଗ୍ର ୟୁପି ଏକା ସାଙ୍ଗେ ବଢୁଛି ତ ଦେଶ ଆଗକୁ ବଢୁଛି । ସେଥିପାଇଁ ଡବଲ ଇଞ୍ଜିନର ସରକାର ୟୁପିର ବିକାଶ ଉପରେ ଫୋକସ କରୁଛି । ସବକା ସାଥ ସବାକା ବିକାଶ, ସବକା ବିଶ୍ୱାସ ଓ ସବକା ପ୍ରୟାସ ମନ୍ତ୍ର ସହ ଆମେ ୟୁପିରେ ବିକାଶ ପାଇଁ ପ୍ରୟାସ କରୁଛୁ ।
