ନୂଆଦିଲ୍ଲୀ,୨୦।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏପ୍ରିଲ ୨୪-୨୫ ତାରିଖରେ ମଧ୍ୟପ୍ରଦେଶ, କେରଳ, ଦାଦ୍ରା ଏବଂ ନଗର ହାଭେଳି ଏବଂ ଡାମନ ଏବଂ ଡିୟୁ ଗସ୍ତ କରିବାର କାର୍ଯ୍ୟକ୍ରମ ରହିଛି। ଏହି ଅମସରରେ ପ୍ରଧାନମନ୍ତ୍ରୀ ମଧ୍ୟପ୍ରଦେଶର ରେୱାଠାରେ ସୋମବାର ଅର୍ଥାତ୍ ୨୪ ତାରିଖରେ ଜାତୀୟ ପଞ୍ଚାୟତିରାଜ ଦିବସ କାର୍ଯ୍ୟକ୍ରମରେ ସାମିଲ ହେବେ। ସେଠାରୁ ପ୍ରଧାନମନ୍ତ୍ରୀ ସିଧା କେରଳ ଯିବେ। କାର୍ଯ୍ୟସୂଚୀ ଅନୁଯାୟୀ, ପ୍ରଧାନମନ୍ତ୍ରୀ ସା ୫.୩୦ରେ କୋଚିରେ ଏକ ରୋଡ ଶୋ’ କରିବେ। ଏହାପରେ ସା ୬ଟାରେ ଯୁବ କନକ୍ଲେଭରେ ଯୋଗ ଦେବେ। ଏହାକୁ କେରଳରେ ଭାଜପା ଦ୍ୱାରା ଶକ୍ତି ପ୍ରଦର୍ଶନ ବୋଲି କୁହାଯାଉଛି। ତେବେ ପ୍ରଧାନମନ୍ତ୍ରୀ କୋଚିର ତାଜ ମାଲାବାରରେ ରାତ୍ରି ଯାପନ କରିବେ ବୋଲି ଜଣାପଡିଛି। ପରଦିନ ମଙ୍ଗଳବାର ଅର୍ଥାତ୍ ୨୫ରେ ପୂର୍ବାହ୍ନ ୧୦.୩୦ ସମୟରେ ପ୍ରଧାନମନ୍ତ୍ରୀ ଥିରୁଭାନନ୍ତପୁରମ କେନ୍ଦ୍ରୀୟ ରେଳ ଷ୍ଟେଶନରୁ ବନ୍ଦେ ଭାରତ ଏକ୍ସପ୍ରେସକୁ ସବୁଜ ପତାକା ଦେଖାଇ ଶୁଭାରମ୍ଭ କରିବେ। ଏହା କେରଳର ପ୍ରଥମ ବନ୍ଦେ ଭାରତ ଏକ୍ସପ୍ରେସ ହେବ, ଯାହା କାସରଗୋଡ ଏବଂ ଥିରୁଭାନନ୍ତପୁରମ ମଧ୍ୟରେ ଚାଲିବ।
