ନୂଆଦିଲ୍ଲୀ,୨୩ା୯: ଜରୁରିକାଳୀନ ସ୍ଥିତିରେ ପ୍ରଧାନମନ୍ତ୍ରୀଙ୍କ ନାଗରିକ ସହାୟତା ଏବଂ ରିଲିଫ୍ ଫଣ୍ଡ୍ ବା ପିଏମ୍-କେୟାର୍ସ ପାଣ୍ଠି ସରକାରୀ ଅର୍ଥ ନୁହେଁ। ଏହା ଦ୍ୱାରା ସଂଗୃହୀତ ଅର୍ଥ ଭାରତର କନ୍ସୋଲିଡେଟେଡ୍ ଫଣ୍ଡ୍କୁ ଯାଏ ନାହିଁ । ଏ ନେଇ କେନ୍ଦ୍ର ସରକାର ଦିଲ୍ଲୀ ହାଇକୋର୍ଟଙ୍କୁ ଜଣାଇଛନ୍ତି। ପିଏମ୍-କେୟାର୍ସ ଫଣ୍ଡ୍ ପରିଚାଳନାରେ ସ୍ବଚ୍ଛତା ପାଇଁ ତାହାକୁ ସମ୍ବିଧାନର ଅନୁଚ୍ଛେଦ ୧୨ ଅଧୀନକୁ ଆଣି ସରକାରୀ ପାଣ୍ଠି ଭାବେ ଘୋଷଣା କରାଯିବାକୁ ହାଇକୋର୍ଟରେ ସମ୍ୟକ ଅଗ୍ରଓ୍ବାଲ ନାମକ ଜଣେ ବ୍ୟକ୍ତି ଆବେଦନ କରିଥିଲେ। ଏଭଳି ପ୍ରଧାନମନ୍ତ୍ରୀ, ସ୍ବରାଷ୍ଟ୍ର, ପ୍ରତିରକ୍ଷା ଏବଂ ଅର୍ଥମନ୍ତ୍ରୀଙ୍କ ଭଳି ଟ୍ରଷ୍ଟିମାନଙ୍କ ଦ୍ୱାରା ସ୍ଥାପିତ ଏହି ପାଣ୍ଠିକୁ ସରକାରୀ ଘୋଷଣା କରାଯାଇଥିବାବେଳେ ଏଥିରେ ସରକାରୀ ନିୟନ୍ତ୍ରଣ ନାହିଁ। ଏଥିସହ ପିଏମ୍-କେୟାର୍ସକୁ ସୂଚନା ଅଧିକାରୀ ଆଇନ ପରିସରକୁ ଅଣାଯିବା କଥା ବୋଲି ଆବେଦନକାରୀ କହିଥିଲେ। ଏ ନେଇ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଅନୁସଚିବ ପ୍ରଦୀପ କୁମାର ଶ୍ରୀବାସ୍ତବ ହାଇକୋର୍ଟରେ ଏକ ସତ୍ୟପାଠ ଦାଖଲ କରିଛନ୍ତି।
ଏଥିରେ ଦର୍ଶାଯାଇଛି, ପିଏମ୍-କେୟାର୍ସ ଫଣ୍ଡ୍ ଏକ ଚାରିଟେବୁଲ ସଂସ୍ଥା। ଏହି ଟ୍ରଷ୍ଟ ସ୍ବଚ୍ଛତାର ସହ କାର୍ଯ୍ୟ କରେ। ଜଣେ ଅଡିଟରଙ୍କ ଦ୍ୱାରା ପାଣ୍ଠିର ଅଡିଟ୍ କରାଯାଏ। ଭାରତର ନିୟନ୍ତ୍ରକ ଏବଂ ଅଭିଲେଖାଗାରଙ୍କ ଦ୍ୱାରା ଗଠିତ ପ୍ୟାନେଲର ଆକାଉଣ୍ଟାଣ୍ଟ ଅଡିଟର ଭାବେ କାମ କରିଥାନ୍ତି। ଟ୍ରଷ୍ଟକୁ ଅନ୍ଲାଇନ ପେମେଣ୍ଟ, ଡିମାଣ୍ଡ ଡ୍ରାଫ୍ଟ, ଚେକ୍ ଆଦି ମାଧ୍ୟମରେ ଅର୍ଥ ଆସିଥାଏ। ପାଣ୍ଠି ପରିଚାଳନାରେ ସ୍ବଚ୍ଛତା ସୁନିଶ୍ଚିତ କରିବା ପାଇଁ ଟ୍ରଷ୍ଟର ଅଫିସିଆଲ ଓ୍ବେବସାଇଟ୍ରେ ଅଡିଟ୍ ହୋଇଥିବା ରିପୋର୍ଟ ଅପଲୋଡ୍ କରାଯାଏ। ଏଥିରେ ପାଣ୍ଠିରୁ ଖର୍ଚ୍ଚ ହୋଇଥିବା ସମସ୍ତ ଟଙ୍କାର ହିସାବ ରହିଥାଏ ବୋଲି ଶ୍ରୀବାସ୍ତବ କହିଛନ୍ତି। ମୁଖ୍ୟ ବିଚାରପତି ଡି. ଏନ୍. ପଟେଲ ଏବଂ ଜଷ୍ଟିସ୍ ଅମିତ ବଂଶଲଙ୍କୁ ଗଠିତ ଖଣ୍ଡପୀଠ ଆସନ୍ତା ୨୭ ତାରିଖରେ ଏହାର ଶୁଣାଣି କରିବାକୁ ଦିନ ଧାର୍ଯ୍ୟ କରିଛନ୍ତି।
