ଢେଙ୍କାନାଳ ଅଫିସ,୯।୧୨: ଢେଙ୍କାନାଳ ଜିଲା କଙ୍କଡ଼ାହାଡ଼ ବ୍ଲକର ଜୁଆଙ୍ଗ ବହୁଳ ଦୁର୍ଗମ ପୁଟିପାଳ ଅଞ୍ଚଳର ସର୍ବାଙ୍ଗୀନ ବିକାଶ ପାଇଁ ଅଣ୍ଟା ଭିଡ଼ିଛି ପ୍ରଶାସନ। ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଗୁରୁବାର ଜିଲାପାଳ ସରୋଜ କୁମାର ସେଠୀଙ୍କ ସମେତ ଜିଲା ଓ ବ୍ଲକ ପ୍ରଶାସନର ପଦସ୍ଥ ଅଧିକାରୀ ଗ୍ରାମରେ ପହଞ୍ଚତ୍ ଲୋକଙ୍କ ସମସ୍ୟା ବୁଝିଛନ୍ତି। ଜୁଆଙ୍ଗ ଜନଜାତିର କଲ୍ୟାଣ ପାଇଁ ସେଠାରେ ସ୍ବତନ୍ତ୍ର କାର୍ଯ୍ୟାଳୟ ଖୋଲାଯିବ। ସେମାନଙ୍କୁ ହାତପାଆନ୍ତାରେ ସମସ୍ତ ମୌଳିକ ସୁବିଧା ଯୋଗାଇ ଦିଆଯିବ। ଜୁଆଙ୍ଗ ଜନଜାତିକୁ ସଚେତନ କରିବା ଉଦ୍ଦେଶ୍ୟରେ ଆସନ୍ତା ୧୭ ତାରିଖରେ କାମାକ୍ଷାନଗରରେ ଏକ ମେଳା ଅନୁଷ୍ଠିତ ହେବ ବୋଲି ଜିଲାପାଳ ସୂଚନା ଦେଇଛନ୍ତି।
ଗ୍ରାମବାସୀ ଭୋଗୁଥିବା ସମସ୍ୟା ସମ୍ପର୍କରେ ଜିଲାପାଳ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ। ଅଞ୍ଚଳବାସୀଙ୍କୁ ରୋଗରୁ ରକ୍ଷା ଲାଗି ସେମାନଙ୍କ ସ୍ବାସ୍ଥ୍ୟପ୍ରତି ବିଶେଷ ଧ୍ୟାନ ଦିଆଯାଉଛି। ପିଲାମାନଙ୍କ ଶିକ୍ଷାଦାନ ଲାଗି ଆନୁଷଙ୍ଗିକ ବ୍ୟବସ୍ଥା କରାଯାଇଛି। ଅପହଞ୍ଚ ଅଞ୍ଚଳରେ ଉନ୍ନୟନ ଯୋଜନା ଠିକ୍ ଭାବେ କାର୍ଯ୍ୟକାରୀ କରାଯାଉଛି। ଫଳରେ ପୁଟିପାଳ ଗ୍ରାମର ୩୦ ପିଲା ଶିକ୍ଷାପ୍ରତି ଆଗ୍ରହୀ ହୋଇ ପ୍ରାଥମିକ ବିଦ୍ୟାଳୟରେ ଭର୍ତ୍ତି ହୋଇଛନ୍ତି। ସୋଲାର ବ୍ୟବସ୍ଥା ଦ୍ୱାରା ୫ଟି ଷ୍ଟାଣ୍ଡପୋଷ୍ଟ କରାଯାଇ ପାନୀୟଜଳ ଯୋଗାଣ କରାଯାଉଛି। ଜୀବନ ଜୀବିକାରେ ଉନ୍ନତି ଆଣିବା ପାଇଁ କୁକୁଡା ଚାଷ ନିମନ୍ତେ ଚିଆଁ ଯୋଗାଇ ଦିଆଯାଉଛି। ମା’ ଓ ଶିଶୁଙ୍କୁ ପୁଷ୍ଟିସାଧନ ପାଇଁ ମମତା ଯୋଜନା କାର୍ଯ୍ୟକାରୀ ହେଉଛି। ଅଞ୍ଚଳର ବିକାଶ ପାଇଁ ଦୁଇଟି ଏସ୍ଏଚ୍ଜି କାର୍ଯ୍ୟ କରୁଛି। ଯଥାଶୀଘ୍ର ପୁଟିପାଳ ଗ୍ରାମ ରାସ୍ତାରେ ୩୫ ଲକ୍ଷ ଟଙ୍କା ବ୍ୟୟରେ ଦୁଇଟି ପୋଲ ନିର୍ମାଣ କରାଯିବ। ଛେଳି ଚାଷ ପାଇଁ ଆବଶ୍ୟକ ପ୍ରଶିକ୍ଷଣ ସହ ଛେଳି ଯୋଗାଇ ଦିଆଯିବ। ବିରି, ମୁଗ, ପରିବା, ମାଣ୍ଡିଆ ଚାଷ ଲାଗି ପ୍ରୋତ୍ସାହିତ କରାଯିବ। ଆର୍ଥତ୍କ ବିକାଶ ନିମନ୍ତେ ବ୍ୟାଙ୍କ ଋଣ ପ୍ରଦାନ ବ୍ୟବସ୍ଥା କରାଯିବ ବୋଲି ଜିଲାପାଳ କହିଛନ୍ତି।
ଏହି ଉପଲକ୍ଷେ ସାମାଜିକ ସୁରକ୍ଷା ପ୍ରଦାନ ନିମନ୍ତେ ଓଡ଼ିଶା କୋଠାବାଡ଼ି ନିର୍ମାଣ ଶ୍ରମିକ ବୋର୍ଡରେ ୩୫ ଜଣଙ୍କୁ ଅନ୍ତର୍ଭୁକ୍ତ କରାଇ ଲେବର କାର୍ଡ ଓ ଜାତିଗତ ପ୍ରମାଣପତ୍ର ପ୍ରଦାନ କରାଯାଇଥିଲା। ଛେଳି ବିକ୍ରି ନିମନ୍ତେ ଓଡ଼ିଶା ଜୀବିକା ମିଶନ ପକ୍ଷରୁ ଓଜନ ମେଶିନ ପ୍ରଦାନ କରାଯାଇଛି ା ଲେବର କାର୍ଡ ଦ୍ୱାରା ଶ୍ରମିକଙ୍କ ଝିଅ ବାହାଘର ପାଇଁ ୫୦ ହଜାର ଟଙ୍କା ସହାୟତା ବ୍ୟବସ୍ଥା ରହିଛି। ୬୦ବର୍ଷ ମଧ୍ୟରେ ମୃତ୍ୟୁ ଘଟିଲେ ମୃତକଙ୍କ ପରିବାରକୁ ୨ଲକ୍ଷ ଟଙ୍କାର ସହାୟତା ରାଶି ପ୍ରଦାନ କରାଯିବ। ଭୋଟର ତାଲିକାଭୁକ୍ତ ହୋଇଥିବା ୪ ଜଣଙ୍କୁ ଖୁବ୍ଶୀଘ୍ର ଏଥିରେ ଅନ୍ତର୍ଭୁକ୍ତ କରାଯିବ ବୋଲି ସୂଚନା ଦିଆଯାଇଛି। ଅଧିକାରୀଙ୍କ ଉପସ୍ଥିତିରେ ଗ୍ରାମବାସୀଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇ ଆବଶ୍ୟକ ଔଷଧ ପ୍ରଦାନ କରାଯାଇଥିଲା। ଝିଅଙ୍କୁ ୧୮ବର୍ଷ ବୟସ ପରେ ବିବାହ କରିବା ଏବଂ ସନ୍ତାନ ଜନ୍ମ ପାଇଁ ଅନୂ୍ୟନ ୩ରୁ ୪ ବର୍ଷ ବ୍ୟବଧାନ ରଖିବା ପାଇଁ ପରାମର୍ଶ ଦିଆଯାଇଥିଲା। ଗ୍ରାମବାସୀଙ୍କ ନୃତ୍ୟସଙ୍ଗୀତ ପ୍ରତି ଥିବା ଆଗ୍ରହକୁ ଦେଖି ଜିଲାପାଳ ଦୁଇଟି ଚାଙ୍ଗୁ ବାଦ୍ୟ ପ୍ରଦାନ କରିଥିଲେ। ଗ୍ରାମବାସୀ ଚାଙ୍ଗୁବାଜାର ତାଳେତାଳେ ନୃତ୍ୟ କରି ପରିବେଷଣ କରିଥିଲେ।
ଜିଲା ବନଖଣ୍ଡ ଅଧିକାରୀ ଡ. ପ୍ରକାଶଚାନ୍ଦ ଗୋଗିନେନି, ଜିଲା ପରିଷଦ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ତନ୍ମୟ କୁମାର ଦରଓ୍ବାନ, ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ, କାମାକ୍ଷାନଗର ଉପଜିଲାପାଳ ଜ୍ୟୋତିଶଙ୍କର ସାହୁ, କଙ୍କଡ଼ାହାଡ଼ ବିଡିଓ ଦୁର୍ଗା ଚରଣ ମଲ୍ଲିକ, ବ୍ଲକ ଅଧ୍ୟକ୍ଷା ଚାରୁଲତା ମିଶ୍ର, କାନ୍ତୋଲ ସରପଞ୍ଚ କାମିନୀ ଦେହୁରୀ ପ୍ରମୁଖ ପୁଟିପାଳ ଗସ୍ତରେ ସାମିଲ ହୋଇଥିଲେ।
