ବଡ଼ବିଲ, ୨୬।୫(ସ୍ବ.ପ୍ର.): କେନ୍ଦ୍ର ସରକାରଙ୍କ ନୂତନ ଏକ୍ସପର୍ଟ ଡ୍ୟୁଟି (ବହିଃ ଶୁଳ୍କ) ଲାଗୁ ହେବା ଯୋଗୁ ବିଭିନ୍ନ ଇସ୍ପାତ ଶିଳ୍ପରେ ଅଚଳାବସ୍ଥା ଦେଖାଦେଇଛି। କେନ୍ଦୁଝର ଜିଲା ବଡ଼ବିଲ ଉପକଣ୍ଠର ଉଲିବୁରୁସ୍ଥିତ ଶ୍ରୀଜଗନ୍ନାଥ ଷ୍ଟିଲ କମ୍ପାନୀର ପିଲେଟ କାରଖାନାରେ ଉତ୍ପାଦନକୁ ବୁଧବାରଠାରୁ ବନ୍ଦ କରାଯାଇଛି। କମ୍ପାନୀ ପକ୍ଷରୁ ଭାରତ ସରକାରଙ୍କର ଏହି ନୂତନ ଏକ୍ସପର୍ଟ ଡ୍ୟୁଟିର ଦ୍ୱାହି ଦେଇ ନୋଟିସ ଜରିଆରେ ସମସ୍ତ ଠିକାଦାର ଓ କର୍ମଚାରୀଙ୍କୁ ଦିନେ ଛଡ଼ା ଦିନେ କାର୍ଯ୍ୟରେ ଯୋଗଦେବାକୁ ନିବେଦନ କରିଛି। ଏତଦ୍ବ୍ୟତୀତ ପ୍ରତ୍ୟେକ ରବିବାର ବାଧ୍ୟତାମୂଳକ ଛୁଟି ବୋଲି କମ୍ପାନୀ ଏହି ନିବେଦନରେ ଜଣାଇଛି। ଆସନ୍ତା ୨୬ ତାରିଖ ଠାରୁ ଏହି ନିୟମ ଲାଗୁ ହେବ ବୋଲି କମ୍ପାନୀର ନୋଟିସରେ ଉଲ୍ଲେଖ ରହିଛି। ଯାହାକି କର୍ମଚାରୀମାନଙ୍କୁ ପରୋକ୍ଷରେ ଛଟେଇ ସଦୃଶ ହୋଇଛି।
୩୦ ଦିନରୁ ଦିନେ ଛଡ଼ା ଦିନେ କାର୍ଯ୍ୟରେ ଯୋଗଦେଲେ ମାତ୍ର ୧୫ ଦିନର ଦରମାରେ କର୍ମଚାରୀମାନେ କିଭଳି ପରିବାର ପ୍ରତିପୋଷଣ କରିବେ ସେ ନେଇ ଚିନ୍ତାରେ ପଡ଼ିଛନ୍ତି। କମ୍ପାନୀର କର୍ମଚାରୀ ସୁଧାଂଶୁ ଶେଖର ରାଉତ କହିଛନ୍ତି ଯେ, ଉକ୍ତ କମ୍ପାନୀରେ ପାଖାପାଖି ୬୦୦ ଶ୍ରମିକ କର୍ମଚାରୀ କାର୍ଯ୍ୟରତ ଅଛନ୍ତି। କେନ୍ଦ୍ର ସରକାରଙ୍କର ଏକ୍ସପର୍ଟ ଡ୍ୟୁଟିରେ ୪୫ ପ୍ରତିଶତ ବୃଦ୍ଧି ଯୋଗୁ କମ୍ପାନୀରେ ଦେଢ ଲକ୍ଷରୁ ଦୁଇ ଲକ୍ଷ ଟନ୍ ପିଲେଟ ରପ୍ତାନୀ ହୋଇ ନ ପାରି ଗଚ୍ଛିତ ହୋଇ ରହିଛି। ଏହାଦ୍ୱାରା କମ୍ପାନୀର କ୍ଷତି ହୋଇଛି। ବହିଃ ଶୁଳ୍କ ବୃଦ୍ଧି ଯୋଗୁ କମ୍ପାନୀ ଉତ୍ପାଦନକୁ ବନ୍ଦ ରଖିଛି ଏବଂ କର୍ମଚାରୀଙ୍କୁ ପୁରା ଦରମା ଦେବାକୁ ପ୍ରସ୍ତୁତ ନାହିଁ। ତେଣୁ ଏନେଇ ସରକାରଙ୍କ ପକ୍ଷରୁ ଶ୍ରମିକ ଓ କର୍ମଚାରୀଙ୍କ ଜୀବିକା ରଖିବା ନିମନ୍ତେ ବିଚାରକୁ ଆଣି ଏହାର ସୁବ୍ୟବସ୍ଥା କଲେ ଉପକୃତ ହେବେ ବୋଲି ରାଉତ ଜଣାଇଛନ୍ତି।
ଜଗନ୍ନାଥ ଷ୍ଟିଲ କମ୍ପାନୀର ଏଚ୍ଆର ମୁଖ୍ୟ ଜ୍ୟୋତି ରଞ୍ଜନ ପାତ୍ରଙ୍କୁ ପଚାରିବାରୁ ୪୫% ଶୁଳ୍କ ଲାଗୁ ହେବା ଯୋଗୁ ଉତ୍ପାଦନ ଉପରେ ଏବଂ ବଜାର ଉପରେ ପ୍ରଭାବ ପକାଇଛି। କମ୍ପାନୀର ବହୁ ପରିମାଣର ମାଲ ବିକ୍ରି ହୋଇ ନ ପାରି ଗଚ୍ଛିତ ହୋଇ ରହିଛି। ଶ୍ରମିକ ଓ କର୍ମଚାରୀମାନଙ୍କୁ ଛଟେଇ ନ କରି କିଭଳି ସେମାନଙ୍କୁ ନିୟୋଜିତ କରିପାରିବୁ ସେ ନେଇ ଦିନେ ଛଡା ଦିନେ କାର୍ଯ୍ୟରେ ଯୋଗ ଦେବାକୁ ଅନୁରୋଧ କରାଯାଇଛି। ଯାହାକି ମଙ୍ଗଳବାର ନୋଟିସ ଦ୍ୱାରା ସମସ୍ତଙ୍କୁ ଅବଗତ କରାଯାଇଛି। ତେବେ ବର୍ତ୍ତମାନର ସ୍ଥିତିକୁ ଆୟତ୍ତରେ ରଖିବାକୁ ଏଭଳି ନିଷ୍ପତ୍ତି ନିଆଯାଇଛି। ଆଗାମୀ ଦିନରେ ଏ ନେଇ କେନ୍ଦ୍ର ସରକାର ଆଉ ଥରେ ଚିନ୍ତା କରି ଏକ୍ସପର୍ଟ ଡ୍ୟୁଟିକୁ ଅପସାରଣ କରନ୍ତୁ, ନଚେତ୍ ଇସ୍ପାତ୍ ଶିଳ୍ପ ଉପରେ ବହୁମାତ୍ରାରେ କୁପ୍ରଭାବ ପକାଇବ।
