ଦେବଗଡ,୧୮ା୪(ଶଶାଙ୍କ ଶେଖର ଝାଙ୍କର): ଏକ ବୋଲେରୋ ପିକ୍ଅପ୍ ଯୋଗେ ବେଆଇନ ମହୁଲ ଚାଲାଣବେଳେ ଅବକାରୀ ବିଭାଗ ପକ୍ଷରୁ ଶୁକ୍ରବାର ଜବତ କରାଯିବା ସହ ଚାଳକଙ୍କୁ ଅଟକ ରଖାଯାଇଛି । ଅବକାରୀ ବିଭାଗ ପକ୍ଷରୁ ପ୍ରାପ୍ତ ସୂଚନା ଅନୁଯାୟୀ ଏକ ବେଆଇନ ମହୁଲ ବୋଝେଇ ପିକ୍ଅପ୍ ଗାଡି ଦେବଗଡ ଥାନାଂଚଳ ବ୍ରଜମୋହନପୁର ଗ୍ରାମ ପଟୁ ଅନ୍ୟତ୍ର ଯାଉଥିବା କୌଣସି ସୂତ୍ରରୁ ଅବକାରୀ ବିଭାଗକୁ ସୂଚନା ମିଳିଥିଲା । ସୂଚନା ଆଧାରରେ ଅବକାରୀ ବିଭାଗ କର୍ମଚାରୀମାନେ ବ୍ରଜମୋହନପୁର ଗ୍ରାମ ନିକଟରେ ଯାନ ବାହାନ ଯାଞ୍ଚ କରୁଥିଲେ । ଏହି ସମୟରେ ଏକ ବୋଲେରୋ ପିକ୍ଅପ୍ ଗାଡି (ନଂ-ଓଡି ୧୫ ଏବି-୮୧୦୧)ସେହି ରାସ୍ତାରେ ଆସୁଥିବା ଦେଖି ତାକୁ ଅଟକାଇ ଯାଞ୍ଚ କରାଯାଇଥିଲା । ଯାଞ୍ଚ ସମୟରେ ସେଥିରେ ପ୍ରାୟ ୫ କୁଇଣ୍ଟାଲ ମହୁଲ ଥିବା ଜଣାପଡିଥିବା ବେଳେ ଏହାର ଚାଳକ ରାଜେଶ ଲାକ୍ରା ଉକ୍ତ ମହୁଲ ସମ୍ବନ୍ଧିତ କୌଣସି ବୈଧ କାଗଜପତ୍ର ଦେଖାଇ ପାରିନଥିଲେ । ଫଳରେ ଅବକାରୀ କର୍ମଚାରୀମାନେ ଉକ୍ତ ମହୁଲ ବୋଝେଇ ପିକ୍ଅପ୍ ଗାଡିଟିକୁ ଜବତ କରି ବିଭାଗୀୟ କାର୍ଯ୍ୟାଳୟକୁ ଆଣିବାସହ ଚାଳକ ରାଜେଶକୁ ଅଟକ ରଖି ଅଧିକ ପଚରାଉଚରା କରୁଥିବା ଜଣାପଡିଛି ।
