ଭଞ୍ଜନଗର,୧୧।୮(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ଥାନା ଅନ୍ତର୍ଗତ ମୁଜାଗଡ଼ ପେଟ୍ରୋଲ ପମ୍ପ ନିକଟରେ ମଙ୍ଗଳବାର ସକାଳେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏଥିରେ ଜଣେ ମହିଳା ମୃତ୍ୟୁବରଣ କରିଥିବାବେଳେ ୩ ଜଣ ଆହତ ହୋଇଛନ୍ତି। ଆହତ ମାନଙ୍କୁ ଭଞ୍ଜନଗର ମେଡିକାଲରେ ପ୍ରାଥମିକ ଚିକିତ୍ସା କରାଯିବା ପରେ ଅଧିକ ଚିକିତ୍ସା ପାଇଁ ବ୍ରହ୍ମପୁର ବଡ ମେଡିକାଲକୁ ପଠାଇ ଦିଆଯାଇଛି। ମୃତ ମହିଳା ଜଣକ କୋଟଗଡ ଅଞ୍ଚଳର ଅମିତା ସିଂ।
ଘଟଣାରୁ ପ୍ରକାଶ ଯେ, ଆନନ୍ଦ ବର୍ଷାରଙ୍କ ସାଥିରେ ଜଣେ ମହିଳା ଅମିତା ଏବଂ ଜଣେ ଶିଶୁ ମିଶି ଏକ କାର ଯୋଗେ ବ୍ରହ୍ମପୁର ଯାଉଥିଲେ। ଏହି ସମୟରେ ମୁଜାଗଡ ନିକଟରେ ବିପରୀତ ଦିଗରୁ ଆସୁଥିବା ଏକ ପିକଅପ ଗାଡ଼ି ସହ ମୁହାଁମୁହିଁ ଧକ୍କା ହୋଇଥିଲା। ଏହାପରେ ସମ୍ପୃକ୍ତ ଅଞ୍ଚଳବାସୀ ଉଭୟ ଗାଡ଼ିର ୪ ଜଣ ଆହତଙ୍କୁ ଉଦ୍ଧାର କରି ଚିକିତ୍ସା ପାଇଁ ଭଞ୍ଜନଗର ହସ୍ପିଟାଲ ଆଣିଥିଲେ। ଏଠାରୁ ସମସ୍ତଙ୍କୁ ବ୍ରହ୍ମପୁର ବଡ ମେଡିକାଲକୁ ଅଧିକ ଚିକିତ୍ସା ପାଇଁ ନେବାବେଳେ ମହିଳା ଜଣକ ମୃତ୍ୟୁବରଣ କରିଛନ୍ତି। କେଉଁ କାରଣରୁ ଉକ୍ତ ଦୁର୍ଘଟଣା ଘଟିଛି ତାହାର ସଠିକ କାରଣ ଜଣାପଡ଼ିନାହିଁ।
Dharitri – Odisha’s No.1 Odia Daily
