ବରୀ,୧୪ା୫(ମହେନ୍ଦ୍ର ସ୍ବାଇଁ: ଯାଜପୁର ଜିଲା ବରୀ ବ୍ଲକ ଅନ୍ତର୍ଗତ ଅଭିମନ୍ୟୁ ସାମନ୍ତସିଂହାର ଡିଗ୍ରୀ ମହାବିଦ୍ୟାଳୟରେ ଓଡ଼ିଆ ଭାଷା ସାହିତ୍ୟ ବିଭାଗରେ ଓଡ଼ିଆ ପାଠ୍ୟକ୍ରମରେ ଅନର୍ସ ନାହିଁ। ପାସ୍ ଓ ସମ୍ମାନ ଶ୍ରେଣୀରେ ଓଡ଼ିଆ ବିଷୟ ନ ଥିବାରୁ ବିଦ୍ୟାର୍ଥୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଜଣେ ଓଡ଼ିଆ ସାହିତି୍ୟକ ତଥା ବିଦଗ୍ଧ କବି ଅଭିମନ୍ୟୁ ସାମନ୍ତସିଂହାରଙ୍କ ନାମରେ ନାମିତ ଏହି ଡିଗ୍ରୀ କଲେଜରେ ଓଡ଼ିଆ ଅନର୍ସ ପାଠ୍ୟକ୍ରମ ପାଇଁ ବହୁ ଦିନରୁ ଦାବି ହୋଇ ଆସୁଛି। ହେଲେ ଉଚ୍ଚ ଶିକ୍ଷା ବିଭାଗ ଏଥିପ୍ରତି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ଥିବା ଛାତ୍ରୀଛାତ୍ରମାନେ ଅଭିଯୋଗ କରିଛନ୍ତି। ସବୁଠୁ ଆଶ୍ଚର୍ଯ୍ୟର କଥା ଉକ୍ତ କଲେଜରେ ଶିକ୍ଷାଦାନ କରାଯାଉଥିବା ସମସ୍ତ ବିଷୟ ଅନର୍ସରେ ରୁପାନ୍ତରିତ ହୋଇଥିବା ବେଳେ ଅର୍ଥନୀତି ଓ ଇତିହାସ ବିଭାଗରେ ୧୬ଟି ଲେଖାଏଁ ଅନର୍ସ ସିଟ୍ ରହିଥିଲା। ଗତ ଶିକ୍ଷାବର୍ଷରେ ବିଜ୍ଞାନ ବିଭାଗରେ କେତେକ ବିଷୟରେ ୬ଟି ଲେଖାଏ ସିଟ୍ ଅନର୍ସ ପାଇଁ ଅନୁମତି ମିଳିଥିଲା । ହେଲେ ଓଡ଼ିଆ ଅନର୍ସ ପାଇଁ ଅନୁମତି ମିଳିନାହିଁ। ଚଳିତ ଶିକ୍ଷା ବର୍ଷରେ ଅର୍ଥନୀତି ବିଭାଗରେ ୪୮ଟି ଅନର୍ସ ସିଟ୍ ପାଇଁ ଅନୁମତି ମିଳିଥିବା ବେଳେ ଶିକ୍ଷାରେ ୪୯, ଇଂଲିଶ ୩୨,ଇତିହାସରେ ୪୮, ରାଜନୀତି ବିଜ୍ଞାନରେ ୪୮, ସଂସ୍କୃତରେ ୩୨, ବଟାନିରେ ୬୪, ଜୁଲୋଜିରେ ୬୪, ବାଣିଜ୍ୟରେ ୪୮, କେମେଷ୍ଟ୍ରିରେ ୪୮, ଗଣିତରେ ୩୨, ଫିଜିକ୍ସରେ ୪୮ ଟି ଲେଖାଏ ଅନର୍ସ ସିଟ୍ ରେ ନାମ ଲେଖାଇବା ପାଇଁ ଉଚ୍ଚ ଶିକ୍ଷା ବିଭାଗ ପକ୍ଷରୁ ଅନୁମତି ମିଳିଛି। ତେବେ ଜଣେ ଓଡିଆ କବିଙ୍କ ସ୍ମୃତିରେ ପ୍ରତିଷ୍ଠା ହୋଇଥିବା ଏହି କଲେଜର ଓଡ଼ିଆ ବିଭାଗ ନାହିଁ କହିଲେ ଚଳେ । ଚଳିତ ଶିକ୍ଷାବର୍ଷରେ ଛାତ୍ରୀଛାତ୍ରମାନେ ନାମ ଲେଖା ପୂର୍ବରୁ ଏ ସଂକ୍ରାନ୍ତରେ ରାଜ୍ୟ ଉଚ୍ଚ ଶିକ୍ଷା ବିଭାଗ ପଦକ୍ଷେପ ନେବାକୁ ଦାବି ହୋଇଛି। ନଚେତ୍ ଆନ୍ଦୋଳାତ୍ମକ ପନ୍ଥା ଗ୍ରହଣ କରାଯିବ ବୋଲି ଅଭିଭାବକମାନେ କହିଛନ୍ତି।
