ଭଞ୍ଜନଗର/ବୁଗୁଡ଼ା/ପାଟପୁର, ୪।୫(ବାବୁଲା ପ୍ରଧାନ/କାଳିଚରଣ ଦାସ/ସୀମାଞ୍ଚଳ ସାହୁ): ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ ଶୁକ୍ରବାର ଗଞ୍ଜାମ ଜିଲାକୁ ତୋଫାନୀ ଗସ୍ତରେ ଆସି ଭଞ୍ଜନଗର, ବୁଗୁଡ଼ା, ସାନଖେମୁଣ୍ଡି ନିକଟସ୍ଥ ପଳାସପୁର ଛକ ଏବଂ ସୋରଡ଼ାରେ ଦଳୀୟ ସଭାରେ ଯୋଗଦେଇ ବିରୋଧୀ ଦଳକୁ ଟାର୍ଗେଟ କରିଛନ୍ତି। କେନ୍ଦ୍ର ସରକାର କାଳିଆ ଯୋଜନା, ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସ୍କେୱାଇ), ମିଶନ ଶକ୍ତି ଯୋଜନା ଏବଂ ଲକ୍ଷ୍ମୀ ବସ୍ ସେବାକୁ ବନ୍ଦ କରିଦେବା ପାଇଁ ଯୋଜନା ଚଳାଇଛନ୍ତି। ବିରୋଧୀ ଦଳଗୁଡ଼ିକ ବିକାଶ ବିରୋଧୀ। ଆଗାମୀ ନିର୍ବାଚନରେ ଓଡ଼ିଶାବାସୀ ତାହାର ଉଚିତ ଜବାବ ଦେବେ। ବିରୋଧୀ ଯେତେ ଅପପ୍ରଚାର କଲେ ମଧ୍ୟ କାମ ଦେବନାହିଁ ବୋଲି ପାଣ୍ଡିଆନ କହିଛନ୍ତି। ଭଞ୍ଜନଗର ସଭାରେ ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ ଯୋଗଦେଇ ନିଜ ପାଇଁ ଏବଂ କନ୍ଧମାଳ ବିଜେଡି ଏମପି ପ୍ରାର୍ଥୀ ଡ଼.ଅଚ୍ୟୁତ ସାମନ୍ତଙ୍କ ପାଇଁ ଭୋଟ ଭିକ୍ଷା କରିଥିଲେ। ସାରା ରାଜ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହାୱା ବହୁଛି। ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା, ମିଶନ ଶକ୍ତି, ମଧୁ ବାବୁ ପେନସନ୍ ଏବଂ ଲକ୍ଷ୍ମୀ ବସ୍ ସେବା ଭଳି ଜନମଙ୍ଗଳ ଯୋଜନାଗୁଡ଼ିକୁ ବନ୍ଦ କରିବା ପାଇଁ ଭାଜପା ଷଡ଼ଯନ୍ତ୍ର କରୁଛି। ରାଜ୍ୟ ସରକାର ବର୍ଷକୁ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ବାବଦକୁ ୩ ହଜାର କୋଟି ଟଙ୍କା ଖର୍ଚ୍ଚ କରୁଛନ୍ତି। କିନ୍ତୁ କେନ୍ଦ୍ର ସରକାରଙ୍କ ସ୍ବାସ୍ଥ୍ୟବୀମା ଯୋଜନାରେ ବର୍ଷକୁ ୩ଶହ କୋଟି ଦେଉଛନ୍ତି। ଭଞ୍ଜନଗର ନିର୍ବାଚନମଣ୍ଡଳୀରେ ବିକାଶର ଧାରା ଚାଲିଛି। ଆଗାମୀ ଦିନରେ ବିକାଶର ଧାରାକୁ ଆଗକୁ ନେବାପାଇଁ ଆସନ୍ତା ୨୦ ତାରିଖରେ ମୋତେ ଏବଂ ବିଜେଡି ଏମପି ପ୍ରାର୍ଥୀ ଡ.ଅଚ୍ୟୁତ୍ ସାମନ୍ତଙ୍କୁ ଯୋଡ଼ି ଶଙ୍ଖରେ ଭୋଟ ଦେବା ପାଇଁ ବିକ୍ରମ ନିବେଦନ କରିଥିଲେ। ସେହିଭଳି କନ୍ଧମାଳ ଏମପି ଡ଼.ସାମନ୍ତ କହିଥିଲେ ରଥି ଏବଂ ସାରଥି ମଧ୍ୟରେ ସମନ୍ବୟ ରହିଲେ ବିକାଶ ଆଗକୁ ଯାଇପାରିବ। ବର୍ତ୍ତମାନ ପାଣ୍ଡିଆନ ସାରଥି ଭୂମିକା ଠିକ୍ ଭାବେ ନିଭାଉଥିତ୍ବା ଯୋଗୁ ରାଜ୍ୟରେ ବିକାଶ ହେଉଛି ବୋଲି ଡ. ସାମନ୍ତ କହିଥିଲେ। ଏହାପରେ ପାଣ୍ଡିଆନ ବୁଗୁଡ଼ା ଅଭିମୁଖେ ଯାଇ ସେଠାରେ ପୋଲସରା ବିଧାୟକ ପ୍ରାର୍ଥୀ ଶ୍ରୀକାନ୍ତ ସାହୁ ଏବଂ ଆସିକା ଏମପି ପ୍ରାର୍ଥତ୍ନୀ ରଞ୍ଜିତା ସାହୁଙ୍କୁ ଶଙ୍ଖ ଚିହ୍ନରେ ଭୋଟ ଦେବା ପାଇଁ ନିବେଦନ କରିଥିଲେ। ପରେ ସାନଖେମୁଣ୍ଡି ଅଭିମୁଖେ ଯାଇ ସେଠାରେ ମଧ୍ୟ ସାନଖେମୁଣ୍ଡି ବିଧାୟକ ପ୍ରାର୍ଥତ୍ନୀ ସୁଲକ୍ଷଣା ଗୀତାଞ୍ଜଳି ଦେବୀ ଏବଂ ଏମପି ପ୍ରାର୍ଥତ୍ନୀଙ୍କ ପାଇଁ ଭୋଟ ଭିକ୍ଷା କରିଥିଲେ। ଏହାପରେ ସୋରଡ଼ାରେ ବିଜେଡି ବିଧାୟକ ପ୍ରାର୍ଥୀ ସଂଘମିତ୍ରା ସ୍ବାଇଁ ଏବଂ ଏମପି ପ୍ରାର୍ଥତ୍ନୀଙ୍କ ପାଇଁ ଭୋଟ ମାଗିଥିଲେ। ଏହି ଅବସରରେ ବିଧାୟକ ପୂର୍ଣ୍ଣଚନ୍ଦ୍ର ସ୍ବାଇଁ, ଆସିକା ଏମପି ପ୍ରମିଳା ବିଷୋୟୀ ପ୍ରମୁଖ ଉପସ୍ଥିତ ଥିଲେ।
