କବିସୂର୍ଯ୍ୟନଗର,୧୨ା୭(ଡି.ଏନ୍.ଏ.)- ଗଞ୍ଜାମ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ହୁ ହୁ ହୋଇ ବଢୁଛି। କବିସୂର୍ଯ୍ୟନଗର ବ୍ଲକ ଓ ଏନ୍ଏସିରେ ସଂକ୍ରମଣ ସଂଖ୍ୟା ବୃଦ୍ଧି ପାଉଛି। ଶନିବାର ଏନ୍ଏସିରୁ ୪ ଓ ବ୍ଲକରୁ ୭ ଜଣ ପଜିଟିଭ ଚିହ୍ନଟ ହୋଇଛନ୍ତି। ବୁଢ଼ାମ୍ବ ୨, ବୋଲସର ୩, ସିନ୍ଦୁରିଆପଡ଼ା ଓ ଗୁଡ଼ିଆଳିରୁ ଜଣେ ଲେଖାଏଁ ରହିଛନ୍ତି। ମୋଟ ଆକ୍ରାନ୍ତଙ୍କ ସଂଖ୍ୟା ୨୨୭ ଛୁଇଁଛି। ସେଥିମଧ୍ୟରୁ ଏନ୍ଏସିରୁ ୧୨୭ ଓ ବ୍ଲକ ଅଞ୍ଚଳରୁ ୧୦୦ ଜଣ ରହିଛନ୍ତି। ୧୫୦ ଜଣ ସୁସ୍ଥ ହୋଇ ଫେରିଲେଣି। ଅଞ୍ଚଳରେ ୮ ଜଣଙ୍କ କରୋନାରେ ମୃତ୍ୟୁ ହୋଇଥିବା ବେଳେ ସେଥିମଧ୍ୟରୁ ୨ଜଣ ଶିକ୍ଷକ ଅଛନ୍ତି। ମାତ୍ର ଏପର୍ଯ୍ୟନ୍ତ ଏନ୍ଏସି ଓ ବିଭିନ୍ନ ପଞ୍ଚାୟତ ବିଶୋଧନ ହେଉନାହିଁ। ଏପରିକି ଲକ୍ଷଣ ଦେଖାଯାଉଥିଲେ ବି ସ୍ବାବ୍ ପରୀକ୍ଷା ପାଇଁ ଯିବାକୁ ଲୋକେ ଭୟ କରୁଛନ୍ତି। ଯାହାକି ଆଗାମୀ ଦିନରେ ବଡ ବିପଦ ଡାକିଆଣିବ। ସଂକ୍ରମିତ ଅଞ୍ଚଳକୁ ବିଶୋଧନ ନ କରିବା, କରୋନା ସନ୍ଦେହ ମୃତକଙ୍କ ସଂସ୍କାର ଲାଗି ଟିମ୍ ଗଠନ ନ କରିବା, ହୋମ୍ କ୍ବାରାଣ୍ଟାଇନରେ ନ ରହି ବୁଲିବା ଆଦି କାର୍ଯ୍ୟ ଠିକ୍ ଭାବେ ପ୍ରଶାସନ ତୁଲାଉନଥିବା ସ୍ଥିତିକୁ ଆହୁରି ଗମ୍ଭୀର କରିବ ବୋଲି ସାଧାରଣରେ ଆଲୋଚନା ହେଉଛି।
