ପଟ୍ଟାମୁଣ୍ଡାଇ,୮ା୮(ସ୍ବ.ପ୍ର.): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ତହସିଲକୁ ମାଳ ମାଳ ଅଭିଯୋଗ ଆସୁଛି, ହେଲେ ସମାଧାନ ହେଉନି। ନ୍ୟାୟ ପାଇବାରୁ ବଞ୍ଚିତ ହେଉଛନ୍ତି ସ୍ଥାନୀୟ ଜନସାଧାରଣ। ଏମିତି କି ବରିଷ୍ଠ ନାଗରିକମାନଙ୍କ କଥା ବିଭାଗୀୟ ଅଧିକାରୀମାନେ ଶୁଣୁନାହାନ୍ତି। ନ୍ୟାୟ ପାଇଁ ତହସିଲକୁ ଦୌଡି ଦୌଡି ସେମାନେ ନୟାନ୍ତ ହେଉଛନ୍ତି ବୋଲି ଅଭିଯୋଗ ହୋଇଛି।
ଆଇନଜୀବୀ ପ୍ରମୋଦ ସାହୁ କହିଛନ୍ତି, ପଟ୍ଟାମୁଣ୍ଡାଇ ତହସିଲ କାର୍ଯ୍ୟାଳୟର କାର୍ଯ୍ୟକାରିତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଏହି ତହସିଲ ଚାଲିଛି ଆଜି ଆସ-କାଲି ଆସରେ। ଜନସାଧାରଣ ସୁବିଧାରେ ଜମିବାଡି ସଂକ୍ରାନ୍ତୀୟ କାଗଜପତ୍ର ଓ ବିଭିନ୍ନ କାର୍ଯ୍ୟ କରିବାର ଅତ୍ୟାବଶ୍ୟକ ସରକାରୀ କାର୍ଯ୍ୟାଳୟ ହେଉଛି ତହସିଲ। ଦୂର ଦୂରାନ୍ତରୁ ଲୋକମାନେ ବିଭିନ୍ନ ସାର୍ଟିଫିକେଟ ଆଉ ଜମିବାଡି ସଂକ୍ରାନ୍ତୀୟ କାର୍ଯ୍ୟ ପାଇଁ ଏଠାରେ ପହଞ୍ଚତ୍ଥାନ୍ତି। ଦୁର୍ଭାଗ୍ୟ ତଥା ପରିତାପର ବିଷୟ ଏଠାରେ କର୍ମଚାରୀମାନଙ୍କ ଅସହଯୋଗ, ଡାଟା ଏଣ୍ଟ୍ରି ଅପରେଟରଙ୍କ ମନମାନିକୁ ନେଇ ସାଧାରଣ ଲୋକଙ୍କୁ ବହୁ ଅସୁବିଧାରେ ସମ୍ମୁଖୀନ ହେବାକୁ ପଡୁଛି। ବାରମ୍ବାର ତହସିଲକୁ ଆସିବା ସତ୍ତ୍ୱେ ଠିକ୍ ଭାବେ ଜନସାଧାରଣଙ୍କ କାର୍ଯ୍ୟ କରାଯାଉନାହିଁ। କିଛିଦିନ ତଳେ ପୋଖରିଆପଡା ଗାଁର ଜଣେ ଯୁବକ ଗ୍ରାମର ଗୋଚର ଜମିକୁ ଜବରଦସ୍ତ ଅକ୍ତିଆର କରି ଘର କାର୍ଯ୍ୟ ଆରମ୍ଭ କରିଥିଲେ। ଏ ବବାଦରେ ପୋଖରିଆପଡା ଯୁବକମାନେ ତହସିଲଦାରଙ୍କ ନିକଟରେ ଲିଖିତ ଅଭିଯୋଗ କରିଥିଲେ। ମାତ୍ର ତହସିଲଦାର ଆଜି ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ କିମ୍ବା ଘଟଣାସ୍ଥଳରେ ନ ପହଞ୍ଚତ୍ବାରୁ ଏହାର ସୁଯୋଗ ନେଇ ଉକ୍ତ ଜାଗାରେ ଘର କାର୍ଯ୍ୟ ଶେଷ ହେବାକୁ ବସିଲାଣି। କର୍ମୀ ପ୍ରତାପ ପାଢୀ କହିଛନ୍ତି, ପଟ୍ଟାମୁଣ୍ଡାଇ ତହସିଲ ଅଞ୍ଚଳର ବିଭିନ୍ନ ସ୍ଥାନରେ ସରକାରୀ ଗୋଚର, ଅନାବାଦୀ, ଜଙ୍ଗଲ ଓ ଶ୍ମଶାନ ଜମିକୁ କେତେଜଣ ମୁଷ୍ଟିମେୟ ଲୋକ ଜବରଦଖଲ କରିଚାଲିଛନ୍ତି। ଅନେକ ସ୍ଥାନରେ ମଧ୍ୟ ବେଆଇନ ଭାବେ ସ୍ଥାୟୀ ପକ୍କାଘର କରିବା ସହ ସରକାରୀ ଜମିକୁ ଚଞ୍ଚକତା କରି ନିଜ ନାମରେ ପଟ୍ଟା କରିନେବା ଆଦି ଘଟଣା ସାମ୍ନାକୁ ଆସିଛି। ଏହାର କାରଣ ଜାଣିବାକୁ ଚାହିଁଲେ ଆଗ ତହସିଲଦାର ଓ କର୍ମଚାରୀଙ୍କ ସମୟରେ କ’ଣ ହୋଇଥିଲା ଆମେ କହିପାରିବୁ ନାହିଁ ବୋଲି କୁହାଯାଉଛି। ଅପରପକ୍ଷେ ବର୍ତ୍ତମାନ ଥିବା ଅଧିକାରୀ ଓ କର୍ମଚାରୀମାନଙ୍କ ମଧ୍ୟରେ ଜନସାଧାରଣଙ୍କୁ ସୁବିଧାରେ ସେବା ଯୋଗାଇ ଦେବାର ମନୋବୃତ୍ତି ବା ଇଚ୍ଛାଶକ୍ତିର ଅଭାବ ଲୋକମାନଙ୍କୁ ଖର୍ଚ୍ଚାନ୍ତ କରାଇବା ସହ ବିଭିନ୍ନ ଅସୁବିଧାରେ ପକାଉଛନ୍ତି। ଏଠାକୁ ଆସି କାମ ହେଉ ନ ଥିବା ଲୋକମାନେ ଅଭିଯୋଗ କରୁଛନ୍ତି। ସାମାଜିକ କର୍ମୀ କ୍ଷୀରୋଦ ମଲିକ କହିଛନ୍ତି, ମଙ୍ଗଳବାର କିଛି ଲୋକ ଏ ସମ୍ପର୍କରେ ଅସନ୍ତୋଷ ପ୍ରକାଶ କରିବା ସହ ଅଭିଯୋଗ ଆଣିଛନ୍ତି। ତହସିଲ ଅଫିସ ଆସିଥିବା ଜଣେ ମହିଳା କହିଛନ୍ତି, ଜମିର ପଟ୍ଟା ଅଛି ଖଜଣା ଦିଆହେଉଛି କିନ୍ତୁ ରେସିଡେନ୍ସିଆଲ ସାର୍ଟିଫିକେଟ ପାଇଁ ଦୁଇ ଦୁଇ ଥର ଆସିଥିଲେ ମଧ୍ୟ ଡାଟାଏଣ୍ଟ୍ରିରେ ତ୍ରୁଟି ଲାଗି ପାଇପାରୁ ନାହାନ୍ତି। ଏହି କାରଣରୁ ନିରାଶ ହୋଇ ଫେରିବାକୁ ପଡୁଛି। ଲୋକମାନଙ୍କ ଏହି ସମସ୍ୟାର ସମାଧାନ ପାଇଁ କର୍ମଚାରୀମାନଙ୍କ ଆଗ୍ରହ ନାହିଁ କିମ୍ବା ପର୍ଯ୍ୟାପ୍ତ କର୍ମଚାରୀ ନାହାନ୍ତି ଏହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏଥିରୁ ତହସିଲ କାର୍ଯ୍ୟାଳୟ ଜନସାଧାରଣଙ୍କୁ କେମିତି ସେବା ଯୋଗାଇ ପାରୁଛି ତାହା ସହଜରେ ଅନୁମେୟ। ଏ ସମ୍ପର୍କରେ ତହସିଲଦାର ଦିଲୀପ ସେଠୀଙ୍କୁ ପଚାରିିବାରେ ବର୍ତ୍ତମାନ ଥିବା ଅଧିକାରୀ ଓ କର୍ମଚାରୀମାନେ ଜନସାଧାରଣଙ୍କୁ ସୁବିଧାରେ ସେବା ଯୋଗାଇ ଦେବାକୁ ଚେତାଇ ଦିଆଯାଇଛି। ଅନ୍ୟପକ୍ଷରେ ପୋଖରିଆପଡା ଗାଁର ଜଣେ ବ୍ୟକ୍ତି ଯଦି ସରକାରୀ ଜାଗାରେ ଘର କରିଥିବେ ତା’ହେଲେ ଆଇନ ଅନୁସାରେ ଦୃଢ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି ସେ କହିଥିଲେ।
