ପୁରୁଷୋତ୍ତମପୁର,୨୯।୪(ଡି.ଏନ.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଅଞ୍ଚଳରେ ଘନ ଘନ ଚୋରି ଘଟଣା ଯୋଗୁ ଲୋକଙ୍କ ନିିଦ ହଜିଯାଇଛି। ଏହାକୁ ନେଇ ଲୋକେ ପୋଲିସରେ ଅଭିଯୋଗ କରୁଥିଲେ ପୋଲିସ ଏଥିପ୍ରତି ଆଦୌ ଗୁରୁତ୍ୱ ଦେଉ ନ ଥିଲା କି ଚୋରକୁ ଧରୁ ନ ଥିଲା। ଏପରିକି ଲୋକଙ୍କ ଲିଖିତ ଅଭିଯୋଗକୁ ରେଜିଷ୍ଟ୍ରେସନ ମଧ୍ୟ କରୁନାହାନ୍ତି। ଏହାକୁ ନେଇ ଏଠାରେ ଜନ ଅସନ୍ତୋଷ ଲାଗିରହିଛି । ପୋଲିସ ଉପରୁ ଭରସା ତୁଟାଇ ଲୋକେ ନିଜେ ଚୋରକୁ ଧରିବା ଲାଗି ରାତି ରାତି ନ ଶୋଇ ଜଗି ରହିବାରେ ଲାଗିଛନ୍ତି। ଇତିମଧ୍ୟରେ ବୁଧବାର ରାତିରେ କାଳୀ ମନ୍ଦିର ଛକ ନିକଟରେ ଥିବା ଅଖିଳ ଦାଶଙ୍କ ପରିବାର ଲୋକେ ଘର ବାହାରେ ବସି କଥାବାର୍ତ୍ତା ହେଉଥିବା ବେଳେ ଏହାର ସୁଯୋଗ ନେଇ ଦୁଇ ଜଣ ଯୁବକ ବାରିପଟୁ ଘରେ ପଶି ଆଲମାରି ଭାଙ୍ଗି ସୁନା ଗହଣା ବାହାର କରୁଥିବା ବେଳେ ଶବ୍ଦ ହୋଇଥିଲା। ଏହା ଶୁଣି ସମସ୍ତେ ଘର ମଧ୍ୟକୁ ଯାଇ ଦେଖିବା ବେଳେ ଚୋର ମାନେ ଚମ୍ପଟ ମାରିବାକୁ ଉଦ୍ୟମ କରିଥିଲେ। ଅନ୍ଧାରର ସୁଯୋଗ ନେଇ ଜଣେ ଚମ୍ପଟ ମାରିଥିବା ବେଳେ ଅନ୍ୟ ଜଣକୁ ଗୋଡାଇ ଗୋଡାଇ କାବୁ କରିଥିଲେ। କାବୁ କରିଥିବା ଯୁବକ ହେଲେ ପୁରୁଷୋତ୍ତମପୁର ମେନ ରୋଡ ହନୁମାନ ବଜାରର ହୃଷିକେଶ ପଣ୍ଡା ଓରଫ ହୃଷି। ତାଙ୍କ ଠାରୁ ୨୦ ଗ୍ରାମର ସୁନା ହାରକୁ ଉଦ୍ଧାର କରିବା ସହ ଅଟକ ରଖି ଗ୍ରାମବାସୀ ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳକୁ ଯିବା ପରେ ହୃଷିକୁ ଜିମା ଦେଇଥିଲେ। ଏଥିନେଇ ଅଖିଳ ପୋଲିସରେ ଲିଖିତ ଅଭିଯୋଗ ମଧ୍ୟ କରିଛନ୍ତି। ସେ ପୂର୍ବରୁ ଏଭଳି ବିଭିନ୍ନ ସ୍ଥାନରେ ଚୋରି କରି ବହୁବାର ଜେଲ ଯାଇଛନ୍ତି। ଏହି ଘଟଣା ଏଠାରେ ଚର୍ଚ୍ଚାର ବିଷୟ ପାଲଟିଛି।
