ପାଟନା,୨୯।୪: କରୋନା ସଂକ୍ରମଣ ଯୋଗୁ ଦିନକୁ ଦିନ ସ୍ଥିତି ସଙ୍କଟ ଜନକ ହେବାରେ ଲାଗିଛି। କରୋନା ଆକ୍ରାନ୍ତଙ୍କ ମୃତ୍ୟୁ ଘଟଣା ହୃଦୟ ବିଦାରକ ହେବାରେ ଲାଗିଛି। ବିହାର ପାଟନାରେ ଜଣେ ୬ ବର୍ଷ ବୟସ୍କ କୁନିଝିଅ କରୋନାରେ ଆକ୍ରାନ୍ତ ବାପାଙ୍କ ମୃତଦେହକୁ କୁଣ୍ଢାଇ ରାତିସାରା ଶୋଇ ରହିବା ଭଳି ଘଟଣା ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ଏହି ଘଟଣା ଲୋକଙ୍କୁ ଭାବୁକ କରିବା ସହିତ ଆଖିଲେ ଲୁହ ଆଣି ଦେଇଛି। ବାପାଙ୍କର ଯେ, ମୃତ୍ୟୁ ହୋଇ ସାରିଛି ତାହା କୁନିଝିଅକୁ ଅଜଣା। ସେ ସକାଳେ ଉଠି ଅନ୍ୟଦିନ ଭଳି ପାଖରେ ଥିବା ବିସ୍କୁଟ ଖାଇ ପାଣି ପିଇ ବାପାଙ୍କ ମୋବାଇଲରେ ଗେମ୍ ଖେଳିବା ଆରମ୍ଭ କରିଥିଲା। ମୃତକ ଜଣକ ହେଉଛନ୍ତି ପ୍ରଭାତ କୁମାର। ତାଙ୍କ ସାଙ୍ଗ ଭିଡ଼ିଓ କଲ୍ କରିବାରୁ କୁନିଝିଅ ବାପା ଶୋଇଥିବା କହିଥିଲେ। ସାଙ୍ଗ ପ୍ରଭାତଙ୍କ ଆଡ଼କୁ ମୋବାଇଲ ଦେଖାଇବାକୁ ଝିଅକୁ କହିଥିଲେ। ପ୍ରଭାତଙ୍କ ନିଶ୍ଚଳ ଶରୀର ଦେଖି ସାଙ୍ଗ ଜଣକ କୋଭିଡ୍ ହେଲ୍ପ୍ ଲାଇନ୍କୁ ଫୋନ୍ କରି ସୂଚନା ଦେଇଥିଲେ। ପରେ କବାଟ ଭାଙ୍ଗି ମୃତଦେହ ଉଦ୍ଧାର କରାଯାଇଥିଲା। ସ୍ଥାନୀୟ ରାମକୃଷ୍ଣ ନଗର ଥାନା ଅଞ୍ଚଳର ବଧୁବନ କଲୋନୀରେ ପ୍ରଭାତ ବାସ କରୁଥିଲେ। ଘର କଳି ଯୋକୁ କିଛି ଦିନ ତଳେ ତାଙ୍କ ସ୍ତ୍ରୀ ରୁଷି ବାପ ଘରକୁ ଚାଲିଯାଇଥିଲେ। ପ୍ରଭାତଙ୍କ ଅନ୍ତିମ ସଂସ୍କାର କରାଯିବା ସହିତ ଛୋଟ ଝିଅକୁ ଘର ମାଲିକଙ୍କ ଜିମା ଦିଆଯାଇଛି। ତାଙ୍କର କରୋନା ପରୀକ୍ଷା କରାଯିବ। ମା’ ଆସିଲେ ତାଙ୍କୁ କୁନିଝିଅଙ୍କୁ ହସ୍ତାନ୍ତର କରାଯିବ ବୋଲି ଘଟଣାର ତଦନ୍ତ କରୁଥିବା ପୋଲିସ କହିଛନ୍ତି। ପ୍ରଭାତଙ୍କଠାରେ ୫ ଦିନ ତଳେ କରୋନା ଲକ୍ଷଣ ପ୍ରକାଶ ପାଇଥିବା ତାଙ୍କ ସାଙ୍ଗ କହିଛନ୍ତି।
