ପାରାଦୀପ,୧୦ା୧୧(ସ୍ବ.ପ୍ର.): ପାରାଦୀପର ସମୁଦ୍ର ବେଳାଭୂମିରେ ଚାଲିଥିବା କଳିଙ୍ଗ ବାଲିଯାତ୍ରା ମହୋତ୍ସବ ଗୁରୁବାର ୪ ଦିନରେ ପହଞ୍ଚିଛି। ସାରେ ଲୋକଙ୍କ ଗହଳି ଟିକିଏ ଅଧିକ ହୋଇଥିଲେ ହେଁ ବ୍ୟବସାୟୀମାନେ କିନ୍ତୁ ଖୁସି ନାହାନ୍ତି। କାରଣ ଯେଉଁଭଳି ବେପାର ହେବ ବୋଲି ଆଶା କରୁଥିଲେ ସେପରି ହେଉନାହିଁ ବୋଲି ଅନେକ କହୁଛନ୍ତି। ଏପରି ହେବା ପଛରେ କରୋନା ପରେ ଅର୍ଥ ସଙ୍କଟକୁ ଦାୟୀ କରାଯାଇଛି। ଅନେକ ଲୋକଙ୍କ ରୋଜଗାର ହ୍ରାସ ପାଇଛି। ଏଥିସହ ପୂର୍ବବର୍ଷ ତୁଳନାରେ ଅଧିକ ଷ୍ଟଲ ଖୋଲିଛି। ଚଳିତବର୍ଷ ବାଲିଯାତ୍ରାରେ ୬୦୦ରୁ ଅଧିକ ଷ୍ଟଲ ହୋଇଛି ବୋଲି ଜିଲାପାଳ ପାରୁଲ ପଟାଓ୍ବାରୀ ଉଦ୍ଘାଟନୀ ସଭାରେ ଘୋଷଣା କରିଥିଲେ। କିନ୍ତୁ ବାସ୍ତବରେ ହଜାରରୁ ଅଧିକ ଷ୍ଟଲ ଖୋଲିଛି। ସେଥିମଧ୍ୟରେ ବତିଘର ରାସ୍ତାର ଉଭୟ ପାର୍ଶ୍ୱରେ ୮୫, ବେଳାଭୂମି ରାସ୍ତାରେ ୬୨, ଶୌଚାଳୟ ପାଖରୁ କୂଳ ପର୍ଯ୍ୟନ୍ତ ୨୬୫, କାଠପୋଲ ପାଖ ୧୭୦, ହସ୍ତଶିଳ୍ପର ୨୨, ଅଣୁ କ୍ଷୁଦ୍ର ମଧ୍ୟମ ଉଦ୍ୟୋଗ ଶିଳ୍ପର ୧୦, ନୂଆବଜାର କ୍ଲବ ପିଲାଙ୍କ ଦ୍ୱାରା ୪୦, ମୀନାବଜାର ଅଞ୍ଚଳରେ ୬୦, ପଲ୍ଲିଶ୍ରୀ ମେଳା ୧୬୦, ରୁଚି କମ୍ପାନୀର ୫୨, ଖାଇବା ଷ୍ଟଲ ୭୫ ଏବଂ ବାଲିଯାତ୍ରା କମିଟିର ୩୦୫ଷ୍ଟଲ ବୋଲି ଜଣାପଡିଛି। ଏହାବାଦ ୩୦୦ ଅଧିକ ବେପାରୀ ବାଲି ଉପରେ ବିଭିନ୍ନ ସାମଗ୍ରୀ ପକାଇଛନ୍ତି। ଏଥିରୁ ଅଧିକାଂଶ ଷ୍ଟଲ ୩ ଦିନ ପରେ ମଧ୍ୟ ଖାଲି ରହିଛି।
କେତେକ କ୍ଲବ ପିଲା ଅଲଗା ଭାବେ ଷ୍ଟଲ ନିର୍ମାଣ କରି ଦୋକାନୀକୁ ଭଡା ଦେଇଛନ୍ତି। ପୂର୍ବବର୍ଷ ବାଲିଯାତ୍ରାରେ ହସ୍ତଶିଳ୍ପ ଓ ଶିଳ୍ପକେନ୍ଦ୍ର ଷ୍ଟଲଗୁଡିକ ପଲ୍ଲିଶ୍ରୀ ମେଳା ଭଳି ଗୋଟିଏ ଆବଦ୍ଧ ଅଞ୍ଚଳରେ ହେଉଥିଲା। ଏଥର ସେହି ସ୍ଥାନରେ ଏକ କମ୍ପାନୀ ଷ୍ଟଲ କରି ଥିବାରୁ ଦୁଇ ବିଭାଗର ଷ୍ଟଲ ବିଜୁ ମୀନାର ପାଖରେ ଖୋଲାରେ କରାଯାଇଛି। ମଞ୍ଚରେ ସ୍ଥାନୀୟ କଳାକାର ଗ୍ରୁପକୁ ନେଇ ସାଂସ୍କୃତିକ କାର୍ଯ୍ୟକ୍ରମ ହୋଇଥିଲା। ରାତି ୯ରୁ ସାଢେ ୧୧ଟା ପର୍ଯ୍ୟନ୍ତ ମେଲୋଡି ହୋଇଥିଲା।
