ଦିଗପହଣ୍ଡି,୧୦।୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡିସ୍ଥିତ ଅବସରପ୍ରାପ୍ତ ସରକାରୀ କର୍ମଚାରୀ ସଂଘ ପକ୍ଷରୁ ଆଲୋଚନା ସଭା ଅନୁଷ୍ଠିତ ହୋଇଯାଇଛି। ଆୟୋଜିତ ସଭାରେ ଦିଗପହଣ୍ଡି ଅବସରପ୍ରାପ୍ତ କର୍ମଚାରୀ ସଂଘ ସଭାପତି ଡ. ଯୁଧିଷ୍ଠିର ସ୍ବାଇଁ ଅଧ୍ୟକ୍ଷତା କରିଥିଲେ। ଆଇନଜୀବୀ ଅଶେଷ ନାଥ ମିଶ୍ର ନିମନ୍ତ୍ରିତ ଅତିଥିଭାବେ ମଞ୍ଚାସିନ ଥିଲେ। ସଂଘର ବରିଷ୍ଠ ସଦସ୍ୟା ସୁଷମା ପାଠୀ ସୁଲଳିତ କଣ୍ଠରେ କେନ୍ଦ୍ର ସରକାରଙ୍କ ଘୋଷିତ ଭାଲିଡେସନ ଆକ୍ଟ ବିରୋଧରେ ସଙ୍ଗୀତ ଗାନ କରିଥିଲେ। ସମ୍ପାଦକ କେ.ନାଗେଶର ରାଓ ଗତ ବୈଠକରେ ଗୃହୀତ ବିବରଣୀ ପାଠ କରିବା ସହ ସଂଘର ଆୟ ବ୍ୟୟ ରିପୋର୍ଟ ଉପସ୍ଥାପନ କରିଥିଲେ। ଗତ ୨୦୨୫ ମାର୍ଚ୍ଚ ୨୫ରେ କେନ୍ଦ୍ର ସରକାର ସଂସଦରେ ଅର୍ଥ ବିଲ ପାରିତ ସମୟରେ ତରବରିଆ ଭାବେ ଭାଲିଡେସନ ଆକ୍ଟ ପାରିତ କରାଇଥିଲେ।
ଦେଶର କୋଟି କୋଟି ପେନସନଭୋଗୀଙ୍କ ପେନସନ ବ୍ୟବସ୍ଥାକୁ ସଙ୍କୁଚିତ କରାଯିବା ସହ ସେମାନଙ୍କ ମଧ୍ୟରେ ବିଭାଜନ ସୃଷ୍ଟି କରିବା ପାଇଁ ଏହି ଆକ୍ଟ ପ୍ରଣୟନର ଅସଲ ଉଦ୍ଦେଶ୍ୟ ବୋଲି ସଂଘର କର୍ମକର୍ତ୍ତା ବୃନ୍ଦ କହିଥିଲେ। କର୍ମଚାରୀ ଓ ଶିକ୍ଷୟିତ୍ରୀ ଶିକ୍ଷକ ବୃନ୍ଦ ସରକାରଙ୍କ ସମସ୍ତ ନିର୍ଦ୍ଦେଶକୁ ସଫଳତାର ସହ କାର୍ଯ୍ୟକାରୀ ସହ ୩୦ ରୁ ୩୫ ବର୍ଷ ପର୍ଯ୍ୟନ୍ତ ନିରବଛିନ୍ନ ଭାବେ ସରକାରୀ ନିର୍ଦ୍ଦେଶନାମାକୁ ଅନୁପାଳନ କରିବାର ଏହା କଣ ପ୍ରତିଫଳନ ବୋଲି ସଂଘ ପକ୍ଷରୁ ପ୍ରଶ୍ନ କରାଯାଇଛି । ସମ୍ଭିଧାନର ୧୪ ଧାରା ପ୍ରକାରେ ପେନସନଭୋଗୀ ସମ୍ମାନର ସହ ବଞ୍ଚିବାର ଅଧିକାର ବୋଲି ଉଚ୍ଚତମ ନ୍ୟାୟାଳୟ ପୂର୍ବରୁ ଆଦେଶ ଦେଇଛନ୍ତି । ସରକାର ୨୦୨୬ ଜାନୁୟାରୀ ୧ ତାରିଖଠାରୁ ଅଷ୍ଟମ ବେତନ ଲାଗୁ କରିବା ପାଇଁ ଘୋଷଣା କରିଛନ୍ତି। ଯେଉଁମାନେ ୨୦୨୬ ଜାନୁୟାରୀ ୧ ତାରିଖ ପରେ ଅବସର ନେଇଥିବେ କେବଳ ସେମାନଙ୍କ ପାଇଁ ଉଦ୍ଦିଷ୍ଟ ବୋଲି ଉଲ୍ଲେଖ କରାଯାଇଛି। କମିଶନଙ୍କ ରିପୋର୍ଟ ଆସିବା ପୂର୍ବରୁ ସରକାର ଭାଲିଡେସନ ଆକ୍ଟ ୨୦୨୫ ଲାଗୁ କରି ପେନସନଭୋଗୀଙ୍କ ମନରେ ଭୟ ସୃଷ୍ଟି କରିଛନ୍ତି। ସରକାରଙ୍କ ଇଚ୍ଛା ଉପରେ ପେନସନ ବ୍ୟବସ୍ଥା ନିର୍ଭର କରିବ।
ଏହା ପେନସନ ଭୋଗୀଙ୍କ ଅଧିକାର ନୁହେଁ ବୋଲି ସରକାର କହିଥିବାରୁ ଏହା ସରକାରଙ୍କ ମନ୍ଦ ଉଦ୍ଦେଶ୍ୟ ବୋଲି ସଭାରେ ମତପ୍ରକାଶ ପାଇଥିଲା। ସଂଘର ଉପସଭାପତି ସୁବାଷ ଚନ୍ଦ୍ର ପାଢୀ, ସହ ସମ୍ପାଦକ ଭବାନୀ ପ୍ରସାଦ ପାଢ଼ୀ, କାର୍ଯ୍ୟକର୍ତ୍ତା ପଦ୍ମଚରଣ ମେକାପ, ସୁଷମା ପାଠୀ, ଭାସ୍କର ପାଢ଼ୀ, ଜନାର୍ଦ୍ଦନ ପଣ୍ଡା, ବସନ୍ତ ପଟ୍ଟନାୟକ, ଗୌରହରି ପାତ୍ର, ଅମୂଲ୍ୟ ଦୋରା, ରାଜ କିଶୋର ଚୌଧୁରୀ ପ୍ରମୁଖ ସଂଘର ୪୩ ଜଣ ସଦସ୍ୟ ଉପସ୍ଥିତ ଥିଲେ। ଶେଷରେ ପଦ୍ମଚରଣ ମେକାପ ଧନ୍ୟବାଦ ଅର୍ପଣ କରିଥିଲେ।
Dharitri – Odisha’s No.1 Odia Daily
