ସାଓପାଓଲା,୩୦।୧୨: ବ୍ରାଜିଲର ମହାନ ଫୁଟବଲର ରାଜା ପେଲେଙ୍କ ୮୨ ବର୍ଷରେ ପରଲୋକ ଘଟିଛି। ସେ ଦୀର୍ଘଦିନରୁ କ୍ୟାନ୍ସରରେ ପୀଡ଼ିତ ଥିଲେ। ଡାକ୍ତରଖାନାରେ ଚିକିତ୍ସା ଚାଲୁଥିଲେ ହେଁ ପେଲେଙ୍କ ଶରୀରର ଅନେକ ଅଙ୍ଗ କାମ କରିବା ବନ୍ଦ କରିଦେଇଥିଲା। ଶେଷରେ ତାଙ୍କର ମୃତ୍ୟୁ ସମ୍ପର୍କରେ ଝିଅ କେଲି ନାସିମେଣ୍ଟୋ ଇନଷ୍ଟାଗ୍ରାମ ମାଧ୍ୟମରେ ସୂଚନା ଦେଇଥିଲେ।
ତେବେ ଏହି ମହାନ ଫୁଟବଲର୍ ବ୍ରାଜିଲ ଟିମ୍କୁ ୩ ଥର ଫିଫା ବିଶ୍ୱକପ୍ ବିଜେତା କରାଇଛନ୍ତି। ମଇଦାନରେ ନିଜର ସ୍ବତନ୍ତ୍ର ଖେଳ ପ୍ରଦର୍ଶନ ସହ ଲୋକଙ୍କ ମନରେ ସ୍ବତନ୍ତ୍ର ସ୍ଥାନ ସୃଷ୍ଟି କରିଥିବା ପେଲେ ବ୍ୟକ୍ତିଗତ ଜୀବନରେ ଜଣେ ରୋମାଣ୍ଟିକ ଏବଂ ମିଳାମିଶାକୁ ଭଲପାଉଥିବା ବ୍ୟକ୍ତି ଥିଲେ। ସେ ତାଙ୍କ ଜୀବନରେ ୩ ବିବାହ କରିଥିଲେ। ଏହାଛଡ଼ା ତାଙ୍କର ଅନେକ ମଡେଲ ଏବଂ ଗାୟିକାଙ୍କ ସହ ପ୍ରେମ ସମ୍ପର୍କ ଥିଲା। ୩ ପତ୍ନୀଙ୍କଠାରୁ ପେଲେଙ୍କ ୭ ସନ୍ତାନ ରହିଛି। ସେମାନଙ୍କ ମଧ୍ୟରେ ୫ ଝିଅ ଏବଂ ୨ ପୁଅ ଅଛନ୍ତି। ସମସ୍ତେ ଏକାଠି ଖୁସିରେ ଜୀବନ ଅତିବାହିତ କରୁଛନ୍ତି।
ପେଲେ ରୋଜ୍ମେରି ଦୋସ୍ ରେଇସ୍ ଚୋଲବିଙ୍କ ସହ ପ୍ରଥମେ ବିବାହ କରିଥିଲେ। ୧୯୬୦ରେ ଏହି ବିବାହ ହୋଇଥିଲା। ପ୍ରଥମ ପତ୍ନୀଙ୍କଠାରୁ ତାଙ୍କର ୩ ସନ୍ତାନ ରହିଛି।
ପ୍ରଥମ ବିବାହର କିଛି ବର୍ଷ ପରେ ପେଲେ ବ୍ରାଜିଲ ଗାୟିକା ଜୁକ୍ସାଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ହେଲେ ୧୯୮୬ରେ ଦୁହେଁ ଅଲଗା ହୋଇଥିଲେ।
ପେଲେ ୧୯୯୬ରେ ଆସିରିଆ ଲେମୋସ୍ ସେକ୍ସାସଙ୍କୁ ଦ୍ୱିତୀୟ ବିବାହ କରିଥିଲେ। ଏହି ସମୟରେ ପେଲେ ଯମଜ ସନ୍ତାନର ଜନକ ହୋଇଥିଲେ। ଏହି ବିବାହ ୧୨ ବର୍ଷ ଚାଲିଥିଲା। ପରେ ଦୁହେଁ ଅଲଗା ହୋଇଯାଇଥିଲେ।
ଏହାପରେ ପେଲେ ୨୦୧୬ରେ ତୃତୀୟ ଥର ଲାଗି ମାରସିଆ ସାଇବେଲେ ଆଓକିଙ୍କୁ ବିବାହ କରିଥିବା ସ୍ବୀକାର କରିଥିଲେ। ଏହି ବିବାହରୁ ତାଙ୍କର ଦୁଇଟି ସନ୍ତାନ ରହିଛି। ଏହି ବିବାହରୁ ତାଙ୍କର ଦୁଇ ଝିଅ ଅଛନ୍ତି।
ତେବେ ପେଲେ ନିଜ ପରିବାର ସହ ବହୁତ ଖୁସି ଥିଲେ। ହେଲେ ସେ କ୍ୟାନ୍ସର ସହ ଲଢ଼େଇରେ ହାରି ଯାଇଛନ୍ତି।
