ଭୁବନେଶ୍ୱର,୮।୫(ବ୍ୟୁରୋ): ସିଭି ରମଣ ବିଶ୍ୱବିଦ୍ୟାଳୟର ୯୭ ଲକ୍ଷ ଟଙ୍କା ହଡ଼ପ ଘଟଣାରେ ଗିରଫ ହୋଇଥିବା ଆକାଉଣ୍ଟାଣ୍ଟ ପାୟଲ ମହାପାତ୍ର ଓ ପ୍ରେମିକ ବିକାଶ କୁମାରଙ୍କ ପ୍ରଥମ ପର୍ଯ୍ୟାୟର ରିମାଣ୍ଡ ଅବଧି ଶନିବାର ଶେଷ ହୋଇଛି। ଏହାପରେ କମିଶନରେଟ ପୋଲିସ ଉଭୟଙ୍କୁ କୋର୍ଟରେ ହାଜର କରିଥିଲା। କିନ୍ତୁ ୩ଦିନ ଧରି ଜେରା ସମୟରେ ଏହି ପ୍ରେମୀ ଯୁଗଳଙ୍କ କଥାରେ ତାଳମେଳ ରହି ନ ଥିଲା। ସେମାନେ ଠିକ୍ ତଥ୍ୟ ଦେଇ ନ ଥିବା ସନ୍ଦେହ କରି ପୋଲିସ ଅଧିକ ତଦନ୍ତ ପାଇଁ ସେମାନଙ୍କୁ ପୁଣି ୫ ଦିନିଆ ରିମାଣ୍ଡରେ ଆଣିବାକୁ କୋର୍ଟରେ ଆବେଦନ କରିଥିଲା। ଉକ୍ତ ଆବେଦନକୁ କୋର୍ଟ ଗ୍ରହଣ କରି ରିମାଣ୍ଡ ଅନୁମତି ଦେଇଛନ୍ତି। ରବିବାରଠାରୁ ଉଭୟଙ୍କର ଦ୍ୱିତୀୟ ପର୍ଯ୍ୟାୟ ରିମାଣ୍ଡ ଆରମ୍ଭ ହେବ। ଠକେଇର ଆଉ କିଛି ନୂଆ ଗୁମର ଖୋଲିବ ବୋଲି ପୋଲିସ ଆଶା ରଖିଛି।
ଅପରପକ୍ଷେ ଅଭିଯୁକ୍ତ ପ୍ରେମିକ ବିକାଶ ପ୍ରେମିକା ପାୟଲଙ୍କ ହ୍ବାଟସ୍ଆପ୍କୁ ବିଭିନ୍ନ ସମୟରେ ଜାଲ୍ ଡକ୍ୟୁମେଣ୍ଟ ପଠାଉଥିଲେ, ଯାହାକି ତାଙ୍କର ମୋବାଇଲ ଫୋନ୍ରେ ନ ଥିବା ପୋଲିସ ତଦନ୍ତବେଳେ ଜାଣିବାକୁ ପାଇଛି। ତେଣୁ ପୋଲିସ ଏହାର ଠିକ୍ ତଥ୍ୟ ପାଇବା ଲାଗି ହ୍ବାଟ୍ସ୍ଆପ୍ କମ୍ପାନୀକୁ ଏକ ପତ୍ର ଲେଖିଛି। ଏଥିସହ ବିଭିନ୍ନ ବ୍ୟାଙ୍କ ଖାତା ମଧ୍ୟ ଯାଞ୍ଚ କରାଯାଉଛି। ସେହିଭଳି ଅନ୍ଲାଇନ ଗେମ୍ରେ ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ କରିଥିବା ବିକାଶ ପୋଲିସକୁ କହିଥିଲା। ଏହାର ସତ୍ୟାସତ୍ୟ ଜାଣିବା ପାଇଁ ବିକାଶଙ୍କୁ ମୋବାଇଲ ମାଗିବାବେଳେ ହଜିଯାଇଥିବା କହିଥିଲେ। ସେହିପରି ଉଭୟ ଚେନ୍ନାଇ, ବେଙ୍ଗାଲୁରୁ, ଜମ୍ମୁକଶ୍ମୀର ଆଦି ସ୍ଥାନକୁ ଯାଇ ମଉଜ କରୁଥିବା ଫଟୋ ପୋଲିସ ପାଇଥିଲେ ମଧ୍ୟ ଏତେ ଟଙ୍କା ବୁଲାବୁଲିରେ ଖର୍ଚ୍ଚ କରିଥିବା ପୋଲିସ ସହଜରେ ଗ୍ରହଣ କରିପାରୁନାହିଁ। ଏସବୁ ଦିଗରେ ପୋଲିସ ଖୋଳତାଡ ଜାରି ରଖିଥିବାବେଳେ ଏହି ୫ଦିନିଆ ରିମାଣ୍ଡରେ ସେମାନଙ୍କ ମୁହଁରୁ ସତ ବାହାର କରିବାକୁ ଚେଷ୍ଟା କରିବ ପୋଲିସ।
ସୂଚନାଯୋଗ୍ୟ, ପାୟଲ ଛାତ୍ରୀଛାତ୍ରଙ୍କଠାରୁ ଟ୍ୟୁଶନ ଫି ଓ ଆଡ୍ମିଶନ ବାବଦକୁ ଆଦାୟ ହେଉଥିବା ଟଙ୍କାକୁ ବିଶ୍ୱ ବିଦ୍ୟାଳୟ ଆକାଉଣ୍ଟ୍ରେ ଜମା ନ କରି ନିଜ ନାମରେ ଥିବା ଏକାଧିକ ଆକାଉଣ୍ଟରେ ଜମା କରୁଥିଲେ। ପରେ ତାହାକୁ ପ୍ରେମିକ ବିକାଶଙ୍କ ପାଖକୁ ଫୋନ ପେ ମାଧ୍ୟମରେ ପଠାଉଥିଲେ। ବାର୍ଷିକ ଅଡିଟ୍ରୁ ଟଙ୍କାର ହିସାବ ନ ମିଳିବାରୁ କଲେଜ ପକ୍ଷରୁ ତମାଣ୍ଡୋ ଥାନାରେ ଅଭିଯୋଗ କରାଯାଇଥିଲା। ପୋଲିସ ତଦନ୍ତ କରି ପ୍ରଥମେ ପାୟଲଙ୍କୁ ନିଜ ଅଫିସ୍ରୁ ଓ ପରେ ବିକାଶଙ୍କୁ ଝାଡ଼ଖଣ୍ଡରୁ ଗିରଫ କରିଥିଲା।
