କଟକ,୨ା୨(ଶିଳ୍ପା ପ୍ରିୟଦର୍ଶିନୀ): ଆସନ୍ତା ୧୫ ଦିନ ମଧ୍ୟରେ ସିଟି ହସ୍ପିଟାଲ ବା କଟକ ଜିଲା ମୁଖ୍ୟ ଚିକିତ୍ସାଳୟର ନବୀକରଣ କାର୍ଯ୍ୟ ଶେଷ ହେବ। ୭କୋଟି ଟଙ୍କା ବ୍ୟୟରେ ଆର୍ଆଣ୍ଡବି ବିଭାଗ ଏହି କାମ କରୁଛି। ଆମ ହସ୍ପିଟାଲ ଯୋଜନାରେ ଏହି ଚିକିତ୍ସାଳୟକୁ ଗତ ନଭେମ୍ବର ୧୫ରେ ସାମିଲ କରାଯାଇଥିଲା। ନବୀକରଣ କାର୍ଯ୍ୟ ଗତ ଡିସେମ୍ବର ୩୧ ସୁଦ୍ଧା ଶେଷ କରିବା ପାଇଁ ପୂର୍ବରୁ ଧାର୍ଯ୍ୟ କରାଯାଇଥିଲା। ହେଲେ ତାହା ଧାର୍ଯ୍ୟ ସମୟରେ ସମ୍ପୂର୍ଣ୍ଣ ହୋଇପାରିନଥିଲା। ଆମ ହସ୍ପିଟାଲ ଯୋଜନାରେ ସାମିଲ ଥିବା ଚିକିତ୍ସାଳୟଗୁଡ଼ିିକର ନବୀକରଣ କାର୍ଯ୍ୟକୁ ଫେବୃଆରୀ ୨୫ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନ୍ଫରେନ୍ସ ଯୋଗେ ଉଦ୍ଘାଟନ କରିବା ନେଇ ମେଡିକାଲ କର୍ତ୍ତୃପକ୍ଷଙ୍କୁ ଗତ ଜାନୁଆରୀରେ ସୂଚନା ଦିଆଯାଇଥିଲା। ପରେ ଏନେଇ ଜାନୁଆରୀ ୧୦ରେ ପୂର୍ବତନ ଜିଲାପାଳ ନରହରି ସେଠୀଙ୍କ ଅଧ୍ୟକ୍ଷତାରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ତେବେ ଫେବୃଆରୀ ୨୫ରେ ହେବାକୁ ଥିବା ଉଦ୍ଘାଟନ କାର୍ଯ୍ୟକ୍ରମକୁ କୌଣସି କାରଣରୁ ଘୁଞ୍ଚାଇ ଦିଆଯାଇଥିବା ସୂଚନା ମିଳିଛି।
ଏନେଇ ଏଡିଏମ୍ଓ ଡ. ସୁଧାଂଶୁ କୁମାର ଗିରି କହିଛନ୍ତି, ହସ୍ପିଟାଲର ସମସ୍ତ କାମ ସରି ଆସିଲାଣି। ଆସନ୍ତା ୧୫ଦିନ ମଧ୍ୟରେ କାର୍ଯ୍ୟ ସମାପ୍ତ ହୋଇଯିବ। ଗତ ମାସରେ ସୂଚନା ରହିଥିଲା ଯେ, ଫେବୃଆରୀ ୨୫ରେ ଉଦ୍ଘାଟନ କାର୍ଯ୍ୟକ୍ରମ ରହିଛି। ହେଲେ ତାହା ୨୫ ତାରିଖରେ ଉଦ୍ଘାଟନ ହେବନାହିଁ। ତେବେ ଅନ୍ୟ କେଉଁ ତାରିଖ ଧାର୍ଯ୍ୟ କରାଯାଇଛି ତା’ର କୌଣସି ସୂଚନା ଏପର୍ଯ୍ୟନ୍ତ ଆମକୁ ମିଳିନାହିଁ। ଏହି ନବୀକରଣ କାର୍ଯ୍ୟ ଫଳରେ ରୋଗୀ ସେବାରେ ବହୁ ସହାୟକ ହେବା ସହ ରୋଗୀମାନେ ସୁବିଧାରେ ହସ୍ପିଟାଲରେ ଚିକିତ୍ସା ପାଇପାରିବେ ବୋଲି ଗିରି କହିଛନ୍ତି।
ସୂଚନାନୁଯାୟୀ, ଜିଲା ମୁଖ୍ୟ ଚିକିତ୍ସାଳୟ ନବୀକରଣ କାର୍ଯ୍ୟ ଜାରି ରହିଛି। ଚିକିତ୍ସାଳୟ ପରିସରରେ ୮୦ ଜଣ ବସିବା ପାଇଁ ପ୍ରତୀକ୍ଷା ଗୃହ, ମିଲେଟ କାଫେ, ନୂତନ ଫାଟକ, ସୁରକ୍ଷାକର୍ମୀଙ୍କ ଗୃହ, ପଞ୍ଜୀକରଣ ଗୃହ ନିର୍ମାଣ କରାଯାଇଛି। ପଞ୍ଜୀକରଣ ଗୃହରେ ୬ଟି ଧାଡ଼ି ରହିଛି। ତନ୍ମଧ୍ୟରୁ ଗୋଟିଏ ଧାଡ଼ି ସ୍ବତନ୍ତ୍ର ଭାବେ ବରିଷ୍ଠ ନାଗରିକ ଓ ଗୋଟିଏ ଧାଡ଼ି ଭିନ୍ନକ୍ଷମଙ୍କ ନିମନ୍ତେ ଉଦ୍ଦିଷ୍ଟ। ଚିକିତ୍ସାଳୟ ପରିସରରେ ଥିବା ପ୍ରତ୍ୟେକ ୱାର୍ଡରେ ରୋଗୀଙ୍କ ଶୌଚାଳୟ ନୂତନ ଭାବେ ନିର୍ମାଣ କରାଯାଇଛି। ଔଷଧ ବିତରଣ ଗୃହରେ ୪ଟି ଧାଡ଼ି କରାଯାଇଛି ଯାହା ଭିନ୍ନକ୍ଷମ, ମହିଳା, ପୁରୁଷଙ୍କ ଲାଗି ଉଦ୍ଦିଷ୍ଟ। ଚିକିତ୍ସାଳୟ ପରିସରରେ ଆଲୋକୀକରଣ ଓ ସୋଲାର ବ୍ୟବସ୍ଥା, ପାଥୋଲୋଜି ପରିସରରେ ପଞ୍ଜୀକରଣ ଓ ରକ୍ତନମୁନା ସଂଗ୍ରହ ବ୍ୟବସ୍ଥା, ଚକ୍ଷୁ ବିଭାଗର ନୂତନ ଓପିଡି, ମେଡିକାଲ ପରିସରରେ ୨୦ ଜଣ ରୋଗୀ ସମ୍ପର୍କୀୟଙ୍କ ପାଇଁ ରହଣି ଗୃହ, ହାଇମାଷ୍ଟ ଲାଇଟ ସଂଯୋଗ ଏବଂ ଫେଭର ରାସ୍ତା ନିର୍ମାଣ କରାଯାଇଛି।
