କଟକ ଅଫିସ,୨୮।୮: ସରକାର କହୁଛନ୍ତି ଟେଷ୍ଟ ସଂଖ୍ୟା ବଢିଲେ ପଜିଟିଭ ସଂଖ୍ୟା ବଢିବ। ତେବେ ଯାଇ ଶୀଘ୍ର କରୋନାକୁ ମାତ୍ ଦେଇହେବ। କିନ୍ତୁ କଟକରେ ଏହି କଥାର କିଛି ଗୁରୁତ୍ୱ ଥିଲା ପରି ମନେ ହେଉ ନାହିଁ। କାରଣ ଏଠାରେ ଚଳିତ ସପ୍ତାହର ପ୍ରଥମ ଦିନରୁ ହିଁ ପ୍ରମୁଖ ହସ୍ପିଟାଲ ଗୁଡ଼ିିକରେ ଟେଷ୍ଟ କରିବା ପାଇଁ ଆଣ୍ଟିଜେନ କିଟ୍ର ଅଭାବ ପରିଲକ୍ଷିତ ହୋଇଛି। ଗତ ସୋମବାର କଟକସ୍ଥ ଆଚାର୍ଯ୍ୟ ହରିହର ସ୍ନାତକୋତ୍ତର କର୍କଟ ରୋଗ ପ୍ରତିଷ୍ଠାନରେ କିଟ୍ ନ ଥିବା ନେଇ ଏସ୍ସିବିର ଭିଡିଆର୍ଏଲ୍ ବିଭାଗକୁ ଅବଗତ କରାଯାଇଥିଲା। ଫଳରେ ମଙ୍ଗଳବାର କାମ ଚଳାଇବା ଲାଗି ୫୦ଟି କିଟ୍ ମିଳିଥିଲା। କିନ୍ତୁ ପ୍ରକୃତ ପକ୍ଷେ ଏଠାରେ କାଜୁଆଲିଟି, ଆଉଟଡୋର୍, ରେଡିଓଥେରାପି, କେମୋଥେରାପି ଆଦି ବିଭାଗ ପାଇଁ ଦୈନିକ ୧୫୦ କିଟ୍ ଆବଶ୍ୟକ ପଡ଼ିିଥାଏ। ତେଣୁ ମଙ୍ଗଳବାର କେବଳ ଆଉଟଡୋର୍ରେ ଟେଷ୍ଟ କରିବା ପାଇଁ ୧୦୦ ଜଣ ନାମ ପଞ୍ଜୀକରଣ କରିଥିଲେ। କିନ୍ତୁ ୬୦ଜଣଙ୍କ ଟେଷ୍ଟ ପରେ କିଟ୍ ସରିଯିବାରୁ ଅବଶିଷ୍ଟ ୪୦ଜଣଙ୍କୁ ଫେରାଇ ଦିଆଯାଇଥିଲା। ଗାଡ଼ି ଚଳାଚଳ ସ୍ବାଭାବିକ ନ ହୋଇଥିବାରୁ ସେମାନେ ହଇରାଣ ହୋଇ ଘରକୁ ଫେରିଥିଲେ। ପରେ ବୁଧବାର ଆଉ ୫୦ କିଟ୍ ସିଡିଏମ୍ଓ କାର୍ଯ୍ୟାଳୟରୁ ମିଳିଥିଲା। ଗୁରୁବାର ଆଉଟଡୋରରେ ୯୩ ରୋଗୀ ନାମ ପଞ୍ଜୀକରଣ କରିଥିଲେ। ୫୦ ଜଣଙ୍କ ପରୀକ୍ଷା ସରିବା ପରେ ବାକି ରୋଗୀଙ୍କ ଆର୍ଟିପିସିଆର୍ ବାଧ୍ୟ ହୋଇ କରାଯାଇଥିଲା। ଯାହା ସମୟ ସାପେକ୍ଷ ଥିଲା। ଏଠାରେ ରୋଗୀଙ୍କ ଚିକିତ୍ସା ପକ୍ରିୟା ଆରମ୍ଭ କରିବାକୁ ଅଧିକ ଦିନେ ଦୁଇଦିନ ଅପେକ୍ଷା କରିବାକୁ ପଡୁଛି। କାରଣ ଚିକିତ୍ସା ପୂର୍ବରୁ କରୋନା ପରୀକ୍ଷା ବାଧ୍ୟତାମୂଳକ ରହିଛି।
କେବଳ ଆଚାର୍ଯ୍ୟ ହରିହର ସ୍ନାତକୋତ୍ତର କର୍କଟ ରୋଗ ପ୍ରତିଷ୍ଠାନ ନୁହେଁ ଏସ୍ସିବିରେ ମଧ୍ୟ ସମାନ ସ୍ଥିତି। ଏଠାରେ ଆଣ୍ଟିଜେନ କିଟ୍ ନ ଥିବାରୁ ଗୁରୁବାର ସୁପର୍ ସ୍ପେସିଆଲିଟି ଆଉଟଡୋର୍ରେ ଶତାଧିକ ରୋଗୀ ହଇରାଣ ହୋଇଛନ୍ତି। ଉଭୟ ନ୍ୟୁରୋଲୋଜି ଓ ନେଫ୍ରୋଲୋଜି ବିଭାଗ ଆଉଟଡୋର୍ରେ ଡାକ୍ତରଙ୍କ ପରାମର୍ଶ ପାଇଁ ରାଜ୍ୟ ତଥା ରାଜ୍ୟ ବାହାରୁ ଅନେକ ରୋଗୀ ଆସିଥିଲେ। କିନ୍ତୁ ମାତ୍ର ୨୦ଜଣଙ୍କ ଆଣ୍ଟିଜେନ ପରୀକ୍ଷା କରାଯିବା ପରେ କିଟ୍ ସରିଗଲା। ଫଳରେ ହସ୍ପିଟାଲ କର୍ତ୍ତୃପକ୍ଷ ବିକଳ୍ପ ଭାବେ ଆର୍ଟିପିସିଆର୍ କରାଇଥିଲେ। ରିପୋର୍ଟ ବିଳମ୍ବରେ ଆସିବା ଯୋଗୁ ଯେଉଁମାନେ ସେହି ଦିନ ଘରକୁ ଫେରିବାର ଥିଲା ସେମାନେ ବାଧ୍ୟ ହୋଇ ଅଟକି ରହିଲେ। ଏବେ ଉଭୟ ମେଡିକାଲ୍ କର୍ମଚାରୀ ଓ ରୋଗୀ କିଟ୍ ନ ଥିବା କାରଣରୁ ପ୍ରତିଦିନ ହନ୍ତସନ୍ତ ହେଉଛନ୍ତି। କିଟ୍ ଅଭାବ ଅଭିଯୋଗକୁ ଆଚାର୍ଯ୍ୟ ହରିହର ସ୍ନାତକୋତ୍ତର କର୍କଟ ରୋଗ ପ୍ରତିଷ୍ଠାନ, ଏସ୍ସିବି କର୍ତ୍ତୃପକ୍ଷ ଏବଂ କଟକ ଜିଲା ମୁଖ୍ୟ ଚିକିତ୍ସାଧିକାରୀ ସ୍ବୀକାର କରିଛନ୍ତି। ଏ ନେଇ ସିଡିଏମ୍ଓ ଡା. ସତ୍ୟବ୍ରତ ଚ୍ଛୋଟରାୟ କହିଛନ୍ତି, ଆମେ ଶୁଣୁଛୁ କିଟ୍ ଭୁବନେଶ୍ୱରରେ ଯଥେଷ୍ଟ ଅଛି, କିନ୍ତୁ କଟକରେ ଅଭାବ। ତଥାପି ସମସ୍ୟା ଶୀଘ୍ର ସମାଧାନ ହୋଇଯିବ ବୋଲି ଆଶା ରଖିଛୁ।
