ଚଣ୍ଡିଖୋଲ,୧୮ା୯(ପ୍ରଦୀପ୍ତ କୁମାର ପୃଷ୍ଟି): ଗ୍ରାମାଞ୍ଚଳରେ ଦେଖିବାକୁ ମିଳୁଛି ସ୍ବାସ୍ଥ୍ୟସେବାର ବିକଳ ଚିତ୍ର। ସମସ୍ତେ ନିଯୁକ୍ତି ପାଇଛନ୍ତି। ହେଲେ କାହାର ଦେଖା ମିଳୁନାହିଁ ବୋଲି ଅଭିଯୋଗ କରିଛନ୍ତି ଗ୍ରାମବାସୀ। ରୋଗୀଙ୍କ ଏକମାତ୍ର ଭରସା ପାଲଟିଛନ୍ତି ଆୟୁଷ ଡାକ୍ତର। ସେ କାମଚଳା ରୋଗୀ ଦେଖୁଛନ୍ତି। ହେଲେ ଜରୁରୀକାଳୀନ ଚିକିତ୍ସା ବେଳେ ହାତ ଟେକି ଦେଉଛନ୍ତି। ଏଲୋପାଥିକ ଡାକ୍ତର ନିଯୁକ୍ତ ଥିବାବେଳେ ଚିକିତ୍ସାରୁ ବଞ୍ଚିତ ହେଉଛନ୍ତି ରୋଗୀ। ଏଭଳି ଦୃଶ୍ୟ ଦେଖିବାକୁ ମିଳିଛି ଯାଜପୁର ଜିଲା ବଡ଼ଚଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନ ଦର୍ପଣୀ ଡାକ୍ତରଖାନାରେ। ଏହି ଡାକ୍ତରଖାନାକୁ ଅଧିକ ସଂଖ୍ୟକ ରୋଗୀ ଆସୁଥିବାରୁ ବିଭାଗ ପକ୍ଷରୁ ଜଣେ ସ୍ଥାୟୀ ଏଲୋପାଥିକ ଡାକ୍ତର, ଜଣେ ଆୟୁଷ ଡାକ୍ତର ଓ ଫାର୍ମାସିଷ୍ଟଙ୍କୁ ନିଯୁକ୍ତ କରାଯାଇଛି।
ଆୟୁଷ ଡାକ୍ତର ନିୟମିତଭାବେ ରୋଗୀଙ୍କୁ ଚିକିତ୍ସା କରି ଔଷଧ ଦେଉଥିବା ବେଳେ ନିଯୁକ୍ତ ମହିଳା ଫାର୍ମାସିଷ୍ଟ ସପ୍ତାହରେ ଏକାଧିକ ଦିନ ଅସୁସ୍ଥତା ଦର୍ଶାଇ ଅନୁପସ୍ଥିତ ରହୁଛନ୍ତି। ମହିଳା ଫାର୍ମାସିଷ୍ଟ ଜଣକ ସରକାରୀ ଡାକ୍ତରଖାନାରେ ଅନୁପସ୍ଥିତ ରହି ଏକ ଘରୋଇ ଚିକିତ୍ସାଳୟରେ କାମ କରିବାନେଇ ଗ୍ରାମବାସୀ ଅଭିଯୋଗ କରିଛନ୍ତି। ସମସ୍ତ ସ୍ବାସ୍ଥ୍ୟକେନ୍ଦ୍ରକୁ ୫-ଟିରେ ଅନ୍ତର୍ଭୁକ୍ତ କରାଯାଇଥିଲେ ମଧ୍ୟ କର୍ମଚାରୀଙ୍କ ଲାଭଖୋର ମନବୃତ୍ତି ଯୋଗୁ ସରକାରୀ ଡାକ୍ତରଖାନା ଉପରୁ ରୋଗୀଙ୍କ ଭରସା ତୁଟି ଯାଉଥିବା ଅଭିଯୋଗ ହୋଇଛି। ସବୁଠାରୁ ସମ୍ବେଦନଶୀଳ ଘଟଣା ହେଉଛି ଏହି ଡାକ୍ତରଖାନା ଉପରେ ନିର୍ଭର କରୁଥିବା ଏକାଧିକ ଗାଁ ଲୋକଙ୍କ ସମେତ ଦୁର୍ଘଟଣା ଜନିତ ରୋଗୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏଠାରେ ନିଯୁକ୍ତ ହୋଇଥିବା ଏଲୋପାଥିକ ଡାକ୍ତରଙ୍କୁ କେହି କେବେବି ଗୋଟିଏ ଦିନ ଦେଖି ନ ଥିବା କହୁଥିବା ବେଳେ ଆଉ କେତେଜଣ ଲୋକ କହୁଛନ୍ତି କଁାଭାଁ ସପ୍ତାହର ମଙ୍ଗଳବାର ପୂର୍ବାହ୍ନ ୧୦ଟାରେ ଆସି ମଧ୍ୟାହ୍ନ ୧୨ଟାରେ ଡାକ୍ତର ପଳାଇଯାଉଛନ୍ତି। ବଡ଼ଚଣା ମେଡିକାଲ ଅଫିସରଙ୍କୁ ଅନ୍ଧାରରେ ରଖି ଡାକ୍ତର ଜଣକ କର୍ତ୍ତବ୍ୟରେ ବହୁ ଅବହେଳା କରୁଥିବା ନେଇ ଗ୍ରାମବାସୀ ଅଭିଯୋଗ କରିଛନ୍ତି। ତେଣୁ ଏଥିପ୍ରତି ଯାଜପୁର ଜିଲାପାଳ ଓ ଜିଲା ମୁଖ୍ୟ ଚିକିତ୍ସା ଅଧିକାରୀ ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି। ଏ ସମ୍ପର୍କରେ ବଡ଼ଚଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଚିକିତ୍ସା ଅଧିକାରୀ ଅଶୋକ କୁମାର ମିଶ୍ରଙ୍କୁ ପଚାରିବାରୁ ସେ କହିଛନ୍ତି, ଟ୍ରେନିଂରେ କଟକରେ ଅଛନ୍ତି। ଫେରିଲା ପରେ କିଛି କହିପାରିବେ।
