ନୂଆଦିଲ୍ଲୀ,୨।୨: ଟି-୨୦ ବିଶ୍ୱକପ ୨୦୨୨ ଶେଷ ହେବା ପରଠାରୁ ହାର୍ଦ୍ଦିକ ପାଣ୍ଡ୍ୟା ଏପର୍ଯ୍ୟନ୍ତ ଭାରତୀୟ ଦଳକୁ ଏହି ଫର୍ମାଟରେ ୩ଟି ସିରିଜରେ ଅଧିନାୟକତ୍ୱ କରିଛନ୍ତି ଏବଂ ଦଳ ୩ଟି ଯାକ ଜିତିଛି। ଏହି ସମୟ ମଧ୍ୟରେ ହାର୍ଦ୍ଦିକ ଉଭୟ ବ୍ୟାଟ ଏବଂ ବଲ ସହିତ ଚମତ୍କାର ପ୍ରଦର୍ଶନ କରି ଦଳର ବିଜୟରେ ଉଲ୍ଲେଖନୀୟ ଅବଦାନ ଦେଇଛନ୍ତି।
ନ୍ୟୁଜିଲାଣ୍ଡ ବିପକ୍ଷରେ ଶେଷ ହୋଇଥିବା ସିରିଜରେ ହାର୍ଦ୍ଦିକଙ୍କୁ ପ୍ଲେୟାର ଅଫ ଦି ସିରିଜ ଆଖ୍ୟା ଦିଆଯାଇଛି। ଏହି ସିରିଜରେ ବ୍ୟାଟିଂରେ ହାର୍ଦ୍ଦିକ ୬୬ ରନ ସଂଗ୍ରହ କରିଥିବା ବେଳେ ବୋଲିଂରେ ମୋଟ ୫ ଉଇକେଟ ନେଇଥିଲେ। ଏଥି ସହିତ ହାର୍ଦ୍ଦିକଙ୍କ ନାମରେ ଆଉ ଏକ ରେକର୍ଡ ଯୋଡି ହୋଇଛି। ଟି-୨୦ ଫର୍ମାଟରେ ୪ ହଜାରରୁ ଅଧିକ ରନ ଏବଂ ୧୦୦ରୁ ଅଧିକ ଉଇକେଟ ନେଇଥିବା ପ୍ରଥମ ଭାରତୀୟ ଖେଳାଳି ହୋଇଛନ୍ତି।
ଆଇପିଏଲରେ ନିଜର ଚମତ୍କାର ପ୍ରଦର୍ଶନ ଆଧାରରେ ଭାରତୀୟ ଦଳରେ ସ୍ଥାନ ପାଇଥିବା ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ ବର୍ତ୍ତମାନ ବିଶ୍ୱ କ୍ରିକେଟର ସବୁଠାରୁ ବିପଜ୍ଜନକ ଖେଳାଳି ଭାବେ ଗଣାଯାଉଛି। ଆଇପିଏଲ ୨୦୨୨ ସିଜନରେ ନିଜକୁ ଅଧିନାୟକ ଭାବରେ ଦର୍ଶାଇ ହାର୍ଦ୍ଦିକ ଗୁଜରାଟ ଟାଇଟାନ୍ସକୁ ତାଙ୍କର ପ୍ରଥମ ଆଇପିଏଲ ସିଜନରେ ବିଜେତା କରିଥିଲେ।
