କୋରୁକୋଣ୍ଡା,୩ା୫(ଡି.ଏନ୍.ଏ.): ମାଲକାନଗିରି ଜିଲା କୋରୁକୋଣ୍ଡା ବ୍ଲକଠାରେ ବୁଧବାର ପୂର୍ବାହ୍ନରେ ପଞ୍ଚାୟତ ସମିତିର ପଞ୍ଚମ ବୈଠକ ଆୟୋଜନ ହୋଇଥିବା ବେଳେ ବ୍ଲକ ଅଧ୍ୟକ୍ଷ ଜିତୁ ବୁରୁଙ୍କ ମନମୁଖୀ ଶାସନକୁ ନେଇ ପଞ୍ଚାୟତ ସମିତି ବୈଠକ ବର୍ଜନ କରିଥିଲେ ୧୦ ସମିତି ସଭ୍ୟାସଭ୍ୟ। ଏଥିସହିତ ନିଜର ଦାବିଗୁଡ଼ିକ ବିଡିଓଙ୍କ ଜରିଆରେ ଜିଲାପାଳଙ୍କୁ ଅଭିଯୋଗପତ୍ର ପ୍ରଦାନ କରିଥିଲେ। ଏହି ଦାବିଗୁଡ଼ିକ ମଧ୍ୟରେ ସମସ୍ତ ସମିତି ସଭ୍ୟାସଭ୍ୟଙ୍କୁ ବ୍ଲକ ଅଧ୍ୟକ୍ଷ ଜିତୁ ବୁରୁ ଉତ୍ତମ ବ୍ୟବହାର ପ୍ରଦର୍ଶନ କରୁନାହାନ୍ତି, ପଞ୍ଚାୟତ ସମିତିରେ ଆସୁଥିବା ଉନ୍ନୟନ ମୂଳକ କାର୍ଯ୍ୟ ନିଜ ପାଖ ଲୋକଙ୍କୁ ବିକ୍ରି କରି ଦେଉଛନ୍ତି, କାର୍ଯ୍ୟଖସଡ଼ା ଅନୁମୋଦନ ନିଜ ଇଚ୍ଛା ମୁତାବକ ଅନୁସାରେ କରୁଛନ୍ତି, କୌଣସି ବିଷୟରେ ସଭ୍ୟସଭ୍ୟାଙ୍କ ସହ କିଛି ଆଲୋଚନା ମଧ୍ୟ କରୁନାହାନ୍ତି, ସଭ୍ୟାସଭ୍ୟମାନେ ଏକ ବର୍ଷ ହେବ ଚୟନ ହୋଇଥିଲେ ମଧ୍ୟ କୌଣସି ଉନ୍ନୟନମୂଳକ କାର୍ଯ୍ୟ ଅନୁଦାନ ଏଯାଏ ମଧ୍ୟ ମିଳିପାରିନାହିଁ ଆଦି ଅନ୍ତର୍ଭୁକ୍ତ।
ଏହି ଦାବିପତ୍ର ପ୍ରଦାନ ସମୟରେ କୋରୁକୋଣ୍ଡା ବ୍ଳକ ଉପାଧ୍ୟକ୍ଷା ମାନସିକ ପଡ଼ିଆମି, ପର୍ଶୁରାମ ଖେମୁଣ୍ଡୁ, ମଦନ ପଡିଆମି, ରୀନା ମାଡକାମି, ସବିତା ଦାସ, ଲକ୍ଷ୍ମୀ ଖିଲ, ପଦିଆ ସୋଡ଼ି, ଲଇଛନ ସୀସା, ଇର୍ମା ମାଢ଼ି, ସବିତା ସୋଡିଙ୍କ ସମେତ କୋରୁକୋଣ୍ଡା ଜୋନ ଜିଲ ପରିଷଦ ମଙ୍ଗୁ ଖିଲ ମଧ୍ୟ ବୈଠକ ବର୍ଜନ କରିବା ସହ ସମସ୍ତ ସଭ୍ୟାସଭ୍ୟଙ୍କୁ ସମର୍ଥନ କରିଥିଲେ। ତେବେ ତୁରନ୍ତ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ନ୍ୟାୟ ପ୍ରଦାନ ନିମନ୍ତେ ଦାବି ହୋଇଛି।
