ଇସଲାମାବାଦ: ଭାରତ-ପାକିସ୍ତାନ ମଧ୍ୟରେ ସମ୍ପର୍କ ସର୍ବଦା ଜଟିଳ। କଶ୍ମୀର ପ୍ରସଙ୍ଗ ହେଉ ଅବା ଆତଙ୍କବାଦକୁ ପୋତ୍ସାହନ, ସବୁ କ୍ଷେତ୍ରରେ ପାକିସ୍ତାନର ଭୂମିକା ସନ୍ଦେହ ଘେରରେ ରହିଥାଏ। ଏଥିଯୋଗୁ ପାକିସ୍ତାନବାସୀ ଭାରତ ବିଷୟରେ କ’ଣ ଚିନ୍ତା କରନ୍ତି ତାହା ଭାରତୀୟଙ୍କ ମନରେ ପ୍ରଶ୍ନ ଉଠେ। ସେଭଳି ମଧ୍ୟ ଭାରତୀୟଙ୍କ ବିଷୟରେ ପାକିସ୍ତାନର ଲୋକେ ଭାବୁଥାଇପାରନ୍ତି।ଏପରିସ୍ଥଳେ ପାକିସ୍ତାନର ୧୧ ବର୍ଷ ବାଳକଙ୍କ ଏକ ଭିଡିଓ ଭାଇରାଲ ହେଉଛି। ଭିଡିଓରେ ସେ ଭାରତ ବିଷୟରେ କହୁଥିବା ଦେଖାଯାଉଛି। ସେ ଘୃଣା ଭିତରେ ଭଲପାଇବାର ଏକ ନିଚ୍ଛକ ଉଦାହରଣ ବୋଲି ଅନେକ ମତ ରଖୁଛନ୍ତି।
ପାକିସ୍ତାନର ଏହି ୧୧ ବର୍ଷୀୟ ବାଳକ ହେଲେ ଜାକିୟା ଓରଫ ଜ୍ୟାକ୍। ପାକିସ୍ତାନ ଭ୍ରମଣରେ ଯାଇଥିବା ୟୁଟ୍ୟୁବର କାର୍ଲ ରୋକ୍ ତାଙ୍କୁ ଭାରତ ବିଷୟରେ କିଛି କହିବାକୁ କହିଥିଲେ। ଏହାର ଜବାବରେ ସେ ଭାରତରେ ମୋର ଅନେକ ବନ୍ଧୁ ଅଛନ୍ତି। ଭଲ ଓ ଖରାପ ଲୋକ ସବୁଜାଗାରେ ଅଛନ୍ତି। ଏଣୁ କାହାକୁ ନେଇ ଟିପ୍ପଣୀ କରିବା ଉଚିତ ନୁହେଁ ବୋଲି କହିଥିଲେ। ତେବେ ଏତେ କମ୍ ବୟସରେ ଜ୍ୟାକ୍ଙ୍କ ଏହି କଥା ସମସ୍ତଙ୍କ ହୃଦୟ ଜିତୁଛି। କାର୍ଲଙ୍କ ସହ କଥାବାର୍ତ୍ତାରେ ଜ୍ୟାକ୍ ଆହୁରୀ ମଧ୍ୟ କହିଛନ୍ତି, ସେ ତାଙ୍କ ବାପାଙ୍କ ସହ ଭାରତ ବୁଲିଥିଲେ। ଛଅ ବର୍ଷ ପୂର୍ବେ ସେ ଅମୃତସର ଆସିଥିଲେ।
ଦକ୍ଷିଣ ଏସିଆରେ ନିଜର ଯାତ୍ରା ବୃତ୍ତାନ୍ତକୁ ନେଇ ଲୋକପ୍ରିୟ କାର୍ଲ। ମୂଳତଃ ସେ ନ୍ୟୁଜିଲାଣ୍ଡର ଥିବା ବେଳେ ଏବେ ସେ ଭାରତରେ ରହୁଛନ୍ତି। ଏପରିକି ସେ ଭାରତୀୟ ମହିଳାଙ୍କୁ ବିବାହ ମଧ୍ୟ କରିଛନ୍ତି। ସେ ପାକିସ୍ତାନକୁ ବିଭାଜନ ପୂର୍ବର ଭାରତ ବୋଲି କୁହନ୍ତି। ଏବେ ସେ ପାକିସ୍ତାନକୁ ବୁଲି ଯାଇଥିବା ବେଳେ ଅନେକ ଲୋକଙ୍କୁ ଭେଟୁଛନ୍ତି। ଏହି କ୍ରମରେ ଜ୍ୟାକ୍ଙ୍କ ସହ ଲାହୋରରେ ତାଙ୍କର ଦେଖା ହୋଇଥିଲା। ପାକିସ୍ତାନର ଖାଦ୍ୟପେୟ, ସଂସ୍କୃତି ଉପରେ ଆଲୋଚନା କରିବା ପରେ ଭାରତକୁ ନେଇ ସେ କ’ଣ କହିବେ ବୋଲି କାର୍ଲ ପ୍ରଶ୍ନ କରିଥିଲେ, ଯାହାର ଉତ୍ତର ଅନେକଙ୍କ ମନ ଜିଣୁଛି। ତେବେ କାର୍ଲ ନିଜ ୟୁଟ୍ୟୁବ୍ ଚ୍ୟାନେଲରେ ଏହାକୁ ଶେୟାର କରି ଲାହୋର ଯାତ୍ରା ସମୟରେ ଏହି ବାଳକ ସବ୍ସ୍କ୍ରାଇବର ମିଳିଲେ ଯିଏ ଭାରତ ପାଇଁ ଏଭଳି ଭାବନ୍ତି। କମ୍ ବୟସରେ ବଡଙ୍କ ଭଳି କଥା ଆପଣଙ୍କୁ ଚକିତ କରିଦେବ ବୋଲି ଲେଖିଛନ୍ତି।
