ନୂଆଦିଲ୍ଲୀ,୧୦।୯: ଆଇସିସି ଚାମ୍ପିୟନ୍ସ ଟ୍ରଫିରେ ଅଂଶ ଗ୍ରହଣ କରିବା ପାଇଁ ପାକିସ୍ତାନ ଗସ୍ତ କରିବାକୁ ବିସିସିଆଇ ମନା କରିଦେବା ପରେ ପାକିସ୍ତାନ କ୍ରିକେଟ ବୋର୍ଡ(ପିସିବି) କୋର୍ଟ ଅଫ ଆର୍ବିଟେସନ ଫର ସ୍ପୋର୍ଟ(କାସ୍) ଦ୍ୱାରସ୍ତ ହୋଇପାରେ। ଏହି ପ୍ରତିଯୋଗିତାରେ ଭାରତୀୟ କ୍ରିକେଟ୍ ଦଳର ସମ୍ଭାବ୍ୟ ଅଂଶଗ୍ରହଣକୁ ନେଇ ଅନେକ ଚର୍ଚ୍ଚା ଚାଲିଛି କାରଣ ରାଜନୈତିକ ତିକ୍ତତାକୁ ନେଇ ଦୁଇ ଦଶନ୍ଧିରୁ ଅଧିକ ସମୟ ମଧ୍ୟରେ ଉଭୟ ପକ୍ଷ କୌଣସି ଦ୍ୱିପାକ୍ଷିକ ସିରିଜ୍ ଖେଳି ନାହାଁନ୍ତି। ୨୦୨୩ ଦିନିକିଆ ବିଶ୍ୱକପ ପାଇଁ ପାକିସ୍ତାନ ଭାରତ ଗସ୍ତରେ ଆସିଥିଲା ୨୦୨୫ ମସିହାରେ ଭାରତ ପାକିସ୍ତାନ ଯାତ୍ରା କରିବ କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ମିଡିଆ ରିପୋର୍ଟରେ ଅନୁଯାୟୀ ବିସିସିଆଇ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) କୁ ‘ହାଇବ୍ରିଡ୍’ ଉପାୟରେ ଦୁବାଇଠାରେ ଭାରତ ମ୍ୟାଚ୍ ଆୟୋଜନ କରିବାକୁ ପରାମର୍ଶ ଦେଇଥିଲା। ତେବେ ପିସିବି ମୁଖ୍ୟ ମୋହସିନ୍ ନାକଭି ଏଭଳି ଯୋଗାଯୋଗକୁ ଅସ୍ୱୀକାର କରି କହିଛନ୍ତି ଯେ, ପାକିସ୍ତାନ ବାହାରେ ପ୍ରତିଯୋଗିତାର କୌଣସି ମ୍ୟାଚ୍ ଅନୁଷ୍ଠିତ ହେବ ନାହିଁ।
ଏହାପୂର୍ବରୁ ପିଟିଆଇ ରିପୋର୍ଟ କରିଥିଲା ଯେ ବିସିସିଆଇ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) କୁ ସୂଚନା ଦେଇଛି ଯେ ଏହି ପ୍ରତିଯୋଗିତା ପାଇଁ ଭାରତ ପାକିସ୍ତାନ ଯିବ ନାହିଁ। ସେପଟେ ବର୍ତ୍ତମାନର ସରକାରରେ ଫେଡେରାଲ୍ ଆଭ୍ୟନ୍ତରୀଣ ମନ୍ତ୍ରୀ ଥିବା ନକଭି କହିଛନ୍ତି ଯେ ଯଦି ଭାରତ ପାକିସ୍ତାନକୁ ଆସେ ନାହିଁ ତେବେ ତାଙ୍କୁ ଆଗାମୀ ନିଷ୍ପତ୍ତି ପାଇଁ ତାଙ୍କ ସରକାରଙ୍କ ସହ ପରାମର୍ଶ କରିବାକୁ ପଡିବ।
