ଓ୍ବାଶିଂଟନ୍,୧।୨: ପଡୋଶୀ ଦେଶ ପାକିସ୍ତାନରେ ଅର୍ଥନୀତି ଦିନକୁ ଦିନ ଖରାପ ଆଡକୁ ଗତି କରୁଛି। ଏହାର ଅର୍ଥବ୍ୟବସ୍ଥାକୁ ନିୟନ୍ତ୍ରଣ କରିବା ପାଇଁ ତୁରନ୍ତ କୋଟି କୋଟି ଟଙ୍କା ଆବଶ୍ୟକ, କିନ୍ତୁ ଏତେ ବଡ଼ ଅର୍ଥନୈତିକ ପ୍ୟାକେଜ ପାଇବା କଷ୍ଟସାଧ୍ୟ। ପାକିସ୍ତାନ ସରକାର ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ) ଋଣ ମାଗିଛନ୍ତି, କିନ୍ତୁ ଏହି ଋଣ ପାଇବାକୁ ହେଲେ ଏଭଳି ଅନେକ ସର୍ତ୍ତ ଗ୍ରହଣ କରିବାକୁ ପଡିବ, ଯାହା ପାକିସ୍ତାନରେ ଅଧିକ ଅରାଜକତା ବଢିପାରେ।
ପାକିସ୍ତାନୀ ପ୍ରଧାନମନ୍ତ୍ରୀ ଶେହବାଜ ଶରିଫଙ୍କ ପାଇଁ ଏହା ଏକ ଅଡୁଆ ପରିସ୍ଥିତି ସୃଷ୍ଟି କରିଛି। ଅନ୍ତର୍ଜାତୀୟ ମୁଦ୍ରା ପାଣ୍ଠି ସହ ଡିଲ୍ କରିବେ ନା ନାହିଁ, ତାହା ସେ ନିଷ୍ପତ୍ତି ନେଇପାରୁନାହାନ୍ତି। କାରଣ, ଅନେକ ଅର୍ଥନୈତିକ ବିଶେଷଜ୍ଞ ଶେହବାଜଙ୍କୁ ଆଇଏମଏଫରୁ ଋଣ ନେବା ସର୍ତ୍ତ ଗ୍ରହଣ ନ କରିବାକୁ ଚେତାବନୀ ଦେଇଛନ୍ତି, ନଚେତ୍ ଦେଶ ନଷ୍ଟ ହୋଇଯିବ। ଅନ୍ୟପକ୍ଷରେ ପାକିସ୍ତାନର ଜିଡିପି ହ୍ରାସ ପାଉଛି।
ଆଇଏମଏଫ ୨୦୨୩ ଆର୍ଥିକ ବର୍ଷ ପାଇଁ ପାକିସ୍ତାନର ଜିଡିପି ଅଭିବୃଦ୍ଧି ପୂର୍ବାନୁମାନକୁ ୩.୫% ରୁ ୨% କୁ ହ୍ରାସ କରିଛି। ଆଇଏମଏଫର ୱାଲର୍ଡ ଇକୋନୋମିକ ଆଉଟଲୁକ (ଡବ୍ଲ୍ୟୁଇଓ) ଅନୁଯାୟୀ ଆସନ୍ତା ୨୦୨୩-୨୪ ଆର୍ଥିକ ବର୍ଷରେ ଦେଶର ଜିଡିପି ଅଭିବୃଦ୍ଧି ହାର ୪.୪% କୁ ବୃଦ୍ଧି ପାଇବ।
