ଇସଲାମାବାଦ,୧୬ ।୭: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ତଥା ପାକିସ୍ତାନ ତହରିକ-ଏ-ଇନସାଫ ପାର୍ଟି ମୁଖ୍ୟ ଇମ୍ରାନ ଖାଁଙ୍କ ସମସ୍ୟା ବେଳକୁ ବେଳ ବଢିବାରେ ଲାଗିଛି । ପାକିସ୍ତାନ ସରକାର ଏବେ ତାଙ୍କ ବିରୋଧରେ ଦେଶଦ୍ରୋହ କାର୍ଯ୍ୟାନୁଷ୍ଠାନ ନେବାକୁ ପ୍ରସ୍ତୁତ ହେଉଥିବା ଜଣାପଡିଛି । ଶୁକ୍ରବାର ପାକିସ୍ତାନ ସରକାର ଏକ ସମିତି ଗଠନ କରିଛନ୍ତି, ଯିଏ କି ଇମ୍ରାନ ଖାଁଙ୍କ ବିରୋଧରେ ଦେଶଦ୍ରୋହ କାର୍ଯ୍ୟାନୁଷ୍ଠାନ ଆରମ୍ଭ କରିବା ସମ୍ପର୍କରେ ନିଷ୍ପତ୍ତି ନେବ ।
ସୂଚନା ମନ୍ତ୍ରୀ ମରିୟମ ଔରଙ୍ଗଜେବ ଖବରଦାତାଙ୍କୁ କହିଛନ୍ତି, ଏହି ସମିତି ଗଠନ କରିବାର ନିଷ୍ପତ୍ତି ମନ୍ତ୍ରିମଣ୍ଡଳ ପକ୍ଷରୁ ନିଆଯାଇଛି । ଏହି ସମିତି ସ୍ଥିର କରିବ ଯେ ପିଟିଆଇ ନେତୃତ୍ୱ ସମ୍ବିଧାନର ଅନୁଚ୍ଛେଦ ୬ର ଉଲ୍ଲଂଘନ କରିବାରେ ଦୋଷି କି ନା ।
ପାକିସ୍ତାନର ସମ୍ବିଧାନରେ ଅନୁଚ୍ଛେଦ ୬ ଅନୁଯାୟୀ, ଯଦି କୌଣସି ବ୍ୟକ୍ତି ବଳପୂର୍ବକ ବା ଅନ୍ୟ କୌଣସି ଅସମ୍ବିଧାନକ ଉପାୟରେ ସମ୍ବିଧାନକୁ ଅଯୋଗ୍ୟ କରିଥାଏ, ଉଲ୍ଲଂଘନ କରିଥାଏ, ନିଲମ୍ବିତ କରିଥାଏ, ସ୍ଥଗିତ କରିଥାଏ ବା ଏମିତି ଯୋଜନା କରିଥାଏ ତେବେ ସେ ଦେଶଦ୍ରୋହରେ ଦୋଷୀ ହୋଇଥାଆନ୍ତି । ଏହି ଦୋଷରେ ଦୋଷୀ ସାବ୍ୟସ୍ତ ହେଲେ ମୃତ୍ୟୁଦଣ୍ଡ ଦେବାର ବ୍ୟବସ୍ଥା ରହିଛି ।
