ନୂଆଦିଲ୍ଲୀ, ୨୬।୧୧(ପି.ଟି.): ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣକୁ ୧୨ ବର୍ଷ ପୂରିଥିଲେ ସୁଦ୍ଧା ଭାରତ ପକ୍ଷରୁ ଦିଆଯାଇଥିବା ପ୍ରମାଣକୁ ପାକିସ୍ତାନ ଏଯାଏ ଗ୍ରହଣ କରିନାହିଁ। ଫଳରେ ପୀଡିତଙ୍କ ପରିବାର ସମ୍ପୂର୍ଣ୍ଣ ନ୍ୟାୟ ପାଇପାରି ନାହାନ୍ତି।
ନଭେମ୍ବର ମାସର ଆଜିର ଦିନରେ ପାକିସ୍ତାନରୁ ୧୦ ଜଣ ଆତଙ୍କବାଦୀ ସମୁଦ୍ର ପଥରେ ଆସି ଭାରତର ଅର୍ଥନୈତିକ ରାଜଧାନୀ ମୁମ୍ବାଇ ମହାନଗରୀ ଉପରେ ଆକ୍ରମଣ କରିଥିଲେ। ସେମାନେ ଦୀର୍ଘ ୬୬ ଘଣ୍ଟା ଧରି ଆତଙ୍କ ଖେଳାଇଥିଲେ। ସେମାନଙ୍କ ଆକ୍ରମଣରେ ୧୬୬ ଜଣଙ୍କ ମୃତ୍ୟୁ ହେବା ସହ ୩୦୦ରୁ ଅଧିକ ଆହତ ହୋଇଥିଲେ। ଭାରତୀୟ ସୁରକ୍ଷା ବଳର କାର୍ଯ୍ୟାନୁଷ୍ଠାନରେ ୯ ଆତଙ୍କବାଦୀ ନିହତ ହୋଇଥିବାବେଳେ ଜୀବନ୍ତ ଧରାପଡ଼ିଥିବା ଅଜମଲ କସବଙ୍କୁ ବିଚାର ପରେ ଫାଶୀ ଦିଆଯାଇଛି। ସେହି ଅନୁଯାୟୀ କହିବାକୁ ଗଲେ ଭାରତ ଏହି ମାମଲାରେ ସମ୍ପୂର୍ଣ୍ଣ ନ୍ୟାୟ ଦେଇଛି, କିନ୍ତୁ ତାହା ଯଥେଷ୍ଟ ନୁହେଁ। ଆକ୍ରମଣର ମାଷ୍ଟରମାଇଣ୍ଡ ତଥା ଏହାର ପାକିସ୍ତାନୀ ପରିଚାଳକ ଲଶ୍କର-ଇ-ତୋଇବା କମାଣ୍ଡର ହାଫିଜ ସୟିଦ ଏବଂ ଜାକିଉର୍ ହେରମନ ଲଖ୍ଭି ଏବେ ବି ମୁକୁଳାରେ ବୁଲୁଛନ୍ତି। ଭାରତ ଯଥେଷ୍ଟ ତଥ୍ୟ ପ୍ରମାଣ ଯୋଗାଇଥିଲେ ହେଁ ପାକିସ୍ତାନ ସରକାର ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିନାହାନ୍ତି। ତେଣୁ ୫୦ ପ୍ରତିଶତ ନ୍ୟାୟ ମିଳିଛି ବୋଲି ଉକ୍ତ ମାମଲା ଲଢ଼ିଥିବା ସ୍ବତନ୍ତ୍ର ପବ୍ଲିକ୍ ପ୍ରସିକ୍ୟୁଟର ଉଜ୍ଜ୍ୱଲ ନିକମ କହିଛନ୍ତି। ସେମାନଙ୍କୁ ଆଇନର କାଠଗଡ଼ାକୁ ଆଣିଲେ ପୂର୍ଣ୍ଣ ନ୍ୟାୟ ମିଳିବ ବୋଲି ସେ ମତ ଦେଇଛନ୍ତି। ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନୂଆଦିଲ୍ଲୀ କିଛିଦିନ ପୂର୍ବରୁ ଇସ୍ଲାମାବାଦ ନିକଟରେ ଦାବି କରିଥିଲା।
