ଇସଲାମାବାଦ/କାବୁଲ,୩।୧୧: ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ସପ୍ତାହବ୍ୟାପୀ ଶତ୍ରୁତା ପରେ ଅନୁଷ୍ଠିତ ଶାନ୍ତି ଆଲୋଚନାରେ ଫଳାଫଳ ଶୂନ୍ୟ ରହିଥିବାବେଳେ ଦୁଇଟି ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି। ଆଫଗାନିସ୍ତାନ ତାଲିବାନ ଅଧିକାରୀଙ୍କ ଦାବି ଅନୁଯାୟୀ, ଗୋଟିଏ ପଟେ ଆମେରିକା ଡ୍ରୋନ୍ ଆକ୍ରମଣ ପାଇଁ ପାକିସ୍ତାନୀ ବାୟୁସୀମା ବ୍ୟବହାର କରୁଛି ଏବଂ ଅନ୍ୟ ପଟେ, ପାକିସ୍ତାନର ଶକ୍ତିଶାଳୀ ସେନା ମୁଖ୍ୟ ଆସିମ ମୁନୀରଙ୍କ ନେତୃତ୍ୱରେ ସେନା ପ୍ରଧାନମନ୍ତ୍ରୀ ଶାହବାଜ୍ ଶରିଫ୍ଙ୍କ ନାଗରିକ ସରକାରଙ୍କୁ ବାଇପାସ୍ କରି କାବୁଲ୍ ସହ ତିକ୍ତତା ସୃଷ୍ଟି କରୁଛି।
ତାଲିବାନ ମୁଖପାତ୍ର ଜବିହୁଲ୍ଲା ମୁଜାହିଦ୍ ପ୍ରକାଶ କରିଛନ୍ତି ଯେ ଆମେରିକୀୟ ଡ୍ରୋନ୍ ଗୁଡ଼ିକ ଆଫଗାନିସ୍ତାନରେ ଲକ୍ଷ୍ୟଭେଦ ପାଇଁ ପାକିସ୍ତାନୀ କ୍ଷେତ୍ର ଦେଇ ଯାଉଛି। ଏହାକୁ ରୋକିବାରେ ଇସଲାମାବାଦ୍ ନିଜର ଅସହାୟତା ପ୍ରକାଶ କରିଛି।
ମୁଜାହିଦ୍ ଏହା ମଧ୍ୟ ଅଭିଯୋଗ କରିଛନ୍ତି ଯେ ପାକିସ୍ତାନ ସେନା ଭିତରେ ଥିବା ଏକ ନିର୍ଦ୍ଦିଷ୍ଟ ଗୋଷ୍ଠୀ ଉଭୟ ଦେଶ ମଧ୍ୟରେ ସମ୍ପର୍କକୁ ଖରାପ କରିବା ପାଇଁ ଉଦ୍ଦେଶ୍ୟମୂଳକ ଭାବରେ କାମ କରୁଛନ୍ତି। ତାଙ୍କ କହିବାନୁସାରେ, ନାଗରିକ ସରକାର ସମ୍ପର୍କ ସ୍ଥାପନ କରିବାକୁ ଚାହୁଁଥିବାବେଳେ ସେନା ଏହାକୁ ସମ୍ଭବ କରୁନାହିଁ।
ତାଲିବାନ ଅନୁଯାୟୀ, ପାକିସ୍ତାନର ସ୍ୱତନ୍ତ୍ର ଦୂତ ସାଦିକ୍ ଖାନ୍ କାବୁଲରେ ସକାରାତ୍ମକ ଆଲୋଚନା କରୁଥିବା ସମୟରେ, ପାକିସ୍ତାନ ଆଫଗାନ୍ ମାଟି ଉପରେ ଆକ୍ରମଣ ଜାରି ରଖିଥିଲା, ଯାହା ସେନା ନାଗରିକ ନେତୃତ୍ୱକୁ ଏଡ଼ାଇ ଯାଉଥିବାର ସୂଚନା ଦେଉଛି।
ନିକଟରେ ପାକିସ୍ତାନ ଆଫଗାନିସ୍ତାନର କାବୁଲ୍ ବାହାରେ ଏବଂ ପାକଟିକା ପ୍ରଦେଶରେ ବୋମାମାଡ଼ ଏବଂ ଗୁଳି ଚଳାଇଥିଲା, ଯେଉଁଥିରେ ଅନେକ ସାଧାରଣ ନାଗରିକ ପ୍ରାଣ ହରାଇଥିଲେ। ସେପ୍ଟେମ୍ବର-ଅକ୍ଟୋବର ଯୁଦ୍ଧରେ ୨୫୦ରୁ ଅଧିକ ଲୋକଙ୍କର ମୃତ୍ୟୁ ଘଟିଥିବା ରିପୋର୍ଟ ହୋଇଥିଲା। ଏହି ଘଟଣା ପରେ ଉଭୟ ପକ୍ଷ କାତାର ଏବଂ ତୁର୍କୀରେ ଆଲୋଚନା ପାଇଁ ବସିଥିଲେ, କିନ୍ତୁ କୌଣସି ଠୋସ୍ ସମାଧାନ ହୋଇପାରିନାହିଁ।
