ବରଗଡ଼ ଅଫିସ:ଧାମନଗର ବିଧାନ ସଭା ନିର୍ବାଚନ ଫଳ ରବିବାର ପ୍ରକାଶ ପାଇଛି। ଦିବଂଗତ ଭାଜପା ବିଧାୟକ ବିଷ୍ଣୁ ସେଠୀଙ୍କ ପୁଅ ସୂର୍ଯ୍ୟବଂଶୀ ସୂରଜ ଏହି ଆସନରୁ ବିଜୟୀ ହୋଇ ଦଳର ସମ୍ମାନ ରଖିଛନ୍ତି। ଏଥିରେ ଭାଜପା ଉଲ୍ଲସିତ ହୋଇପଡିଥିବା ବେଳେ ବିଜେଡ଼ି ପରାଜୟକୁ ସ୍ବୀକାର କରିଛି। ଏପରିସ୍ଥଳେ ଡିସେମ୍ବର ୫ତାରିଖରେ ହେବାକୁ ଥିବା ପଦ୍ମପୁର ବିଧାନ ସଭା ଉପନିର୍ବାଚନ ଏବେ ତିନି ପ୍ରମୁଖ ଦଳ ପାଇଁ ଅସଲ ପରୀକ୍ଷା ବୋଲି କୁହାଯାଉଛି। ଧାମନଗର ଫଳାଫଳ ପଦ୍ମପୁର ଉପନିର୍ବାଚନକୁ କିଭଳି ପ୍ରଭାବିତ କରିବ ସେ ନେଇ ତିନି ରାଜନୈତିକ ଦଳ ଭାଜପା, ବିଜେଡି ଓ କଂଗ୍ରେସ ନେତୃବୃନ୍ଦ ଯାହା କହିଲେ ତାହାକୁ ନେଇ ଏକ ଉପସ୍ଥାପନା…।
ପରିବର୍ତ୍ତନର ଆଭାସ
ନବୀନ ପଟ୍ଟନାୟକଙ୍କ ନିରବଚ୍ଛିନ୍ନ ୨୨ବର୍ଷ ଶାସନକାଳ ସତ୍ତ୍ବେ ରାଜ୍ୟବାସୀ ସର୍ବନିମ୍ନ ମୌଳିକ ସୁବିଧା ସୁଯୋଗରୁ ବଞ୍ଚିତ ହୋଇଛନ୍ତି। ମିଶନ ଶକ୍ତିର ନାରା ଦିଆଯାଉଛି, ହେଲେ ଆଜି ବି ମହିଳାଙ୍କୁ ସମ୍ମାନ ମିଳୁ ନାହିଁ। ଧାମନଗରବାସୀ ପରିବର୍ତ୍ତନର ନୂଆ ରାସ୍ତା ଦେଖାଇଛନ୍ତି। ଆଗାମୀ ପଦ୍ମପୁର ଉପନିର୍ବାଚନରେ ମଧ୍ୟ ଏହା ପ୍ରତିଫଳିତ ହେବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିକାଶଧାରାରେ ସାମିଲ ହୋଇ ପଦ୍ମପୁରବାସୀ ଭାଜପା ପ୍ରାର୍ଥୀଙ୍କୁ ହିଁ ବିଧାୟକଭାବେ ବାଛିବେ।
ଇରାସିସ୍ ଆଚାର୍ଯ୍ୟ, ଭାଜପା
ଭିନ୍ନ ରାଜନୈତିକ କ୍ଷେତ୍ର
ଧାମନଗର ଏବଂ ପଦ୍ମପୁର ୨ଟି ଭିନ୍ନ ରାଜନୈତିକ କ୍ଷେତ୍ର। ଧାମନଗର ନିର୍ବାଚନ ମଣ୍ଡଳୀରେ ସ୍ବର୍ଗତ ବିଷ୍ଣୁ ସେଠୀଙ୍କ ଲୋକପ୍ରିୟତା ଥିଲା। ତାଙ୍କ ପୁଅ ଉପନିର୍ବାଚନରେ ଜିତିଲେ। ଏଥିରେ ବିଚଳିତ ହେବା ଠିକ୍ ନୁହେଁ। ପଦ୍ମପୁର ନିର୍ବାଚନ ମଣ୍ଡଳୀ ପ୍ରତି ଉଭୟ ରାଜ୍ୟର ବିଜେଡ଼ି ଏବଂ କେନ୍ଦ୍ରର ଭାଜପା ସରକାର ଅବହେଳା କରି ଆସୁଛନ୍ତି। ଫଳରେ ଉଭୟ ଦଳକୁ ତିରସ୍କାର କରି ପଦ୍ମପୁର ନିର୍ବାଚନ ମଣ୍ଡଳୀବାସୀ ଏଥର କଂଗ୍ରେସ ସପକ୍ଷରେ ନିଶ୍ଚୟ ମତଦାନ କରିବେ।
ପାଣ୍ଡବ କର୍ଣ୍ଣ, କଂଗ୍ରେସ
ଜିଲାରେ ରହିବ ବିଜେଡିର ବିଜୟଧାରା
ଗତ ୨୦୧୯ ସାଧାରଣ ନିର୍ବାଚନରେ ବରଗଡ଼ ଜିଲାର ସବୁ ଆସନ ବିଜେଡ଼ି ଦଖଲ କରିଥିଲା। ବିଜେଡ଼ି ପ୍ରତି ଜିଲାବାସୀଙ୍କ ବିଶ୍ୱାସ ଏବେ ମଧ୍ୟ ରହିଛି। ପୂର୍ବତନ ବିଧାୟକ ବିଜୟ ରଞ୍ଜନ ସିଂ ବରିହା ଜନପ୍ରିୟ ଥିଲେ। ଅନେକଥର ବିଜୟ ଲାଭ ମଧ୍ୟ କରିଛନ୍ତି। ମୁଖ୍ୟମନ୍ତ୍ରୀଙ୍କ ବଳିଷ୍ଠ ନେତୃତ୍ୱରେ ପଦ୍ମପୁର ନିର୍ବାଚନ ମଣ୍ଡଳୀର ବିକାଶଧାରା ଆଗେଇ ଚାଲିଛି। ଏଠାରେ ଧାମନଗରର କୌଣସି ପ୍ରଭାବ ପଡ଼ିବ ନାହିଁ। ବିଜେଡ଼ି ପୁଣି ଜିତିବ।
ଦେବେଶ ଆଚାର୍ଯ୍ୟ, ବିଜେଡ଼ି
